唔知有冇记得，我之前曾经讲过，我系一个唔好酒，但会饮酒嘅人。

我成年之后先开始饮酒，但好少饮醉。我觉得好大程度同基因遗传有关，因为我屋企一屋都系酒鬼。

我阿妈中意饮红酒，老窦中意劈啤酒，而我阿公最劲，直接怼白酒，但佢年纪大之后就知惊，为咗身体健康慢慢就戒咗酒。

我阿公戒酒之前，从细听佢讲得最多嘅一次词叫

玉冰烧

玉冰烧系一种源自佛山嘅白酒，每次我阿公食烧腊，必定买返支玉冰烧，攞出个酒杯，斟好半杯白酒，然后一啖肉一啖酒，偶尔眯住眼叹一声

“呀~~过瘾！”

细个好奇，就要阿公畀少少我饮，结果我一饮即刻辣到出唔到声，又攻鼻又辣喉，仲有啲油腻。

见到我一脸厌恶，阿公笑呵呵同我讲：“傻女，玉冰烧系用嚟嗒，唔系饮，你仲细个，唔识欣赏个啦！”

每次见到阿公白酒送烧腊，情景就好似玉冰烧最出名最洗脑嘅广告歌——

 就如广告入边所讲，几十年前，斩料加餸、大排档、聚会嘅标配酒，唔系青岛纯生，更唔系哈啤RIO，而系玉冰烧。

好长一段时间，我畀玉冰烧呃咗，觉得呢个名文化水平特别高，甚至可能来源于某句诗句。

后来先知道，佢其实就系用肥猪肉酿酒（冇睇错，真系肥猪肉）！

两样风马牛不相及嘅嘢，点解就畀人放埋一齐，仲创造咗广东一大名酒？

据说玉冰烧系清末石湾陈太吉苑第三代东主陈如岳所创。

陈如岳年轻时学富五车，曾担任翰林学士，后重拾祖辈嘅酿酒业，佢发现广东人中意用蛇肉浸酒，于是突发奇想尝试用猪肉浸酒。

猪肉释放嘅油可吸附酒中杂质，油脂浮面，醇酒沉淀，时日愈久，沉淀越彻底，米酒就越香醇，仲有股独特嘅油香。

从此，以玉冰烧为首嘅豉香型白酒问世，其酿制工艺沿用至今。

由于肥猪肉好似晶莹剔透嘅冰块，该酒最初得名为肉冰烧，后来觉得唔够文雅，“肉”、“玉”又同音，就改名为玉冰烧，又可用嚟形容酒质冰清玉洁、清亮透明。

听过有老鼠酒、蛇酒、蜈蚣酒，但肥猪肉酒恐怕亦剩系广东先有。

要酿制出醇和滋味嘅玉冰烧，重点系三大元素：

最重要嘅莫过于玉冰烧嚿“肉”，每一块酿酒嘅肥猪肉都可以用好多年，越老越陈嘅肥猪肉，浸出嘅玉冰烧越幼滑，豉香越浓郁。

所以行家老店酿制玉冰烧，佢哋嘅猪肉用到几乎冇办法成块攞起。

战后百废待兴、生活困苦，而酒可以一醉解千愁，暂时忘却现实，米酒业因此逆市而起，特别系方便亲民嘅散装米酒，曾经街头巷尾总会有间店卖酒。

于是，玉冰烧趁此崛起，成为劳苦大众嘅杯中物、心头好。

▲70年代嘅玉冰烧广告

好多人一日劳累过后，都会饮返几両烧酒，醒神又解愁。有时朋友相聚，既要有肉亦要有酒，大家谈天说地，把酒论人生吗，偶尔做返次“酒肉朋友”。

直到依家，好多老广东人嘅一日，都系从一杯玉冰烧开始。

早上去到茶楼，好多老人家都会喺台面放支玉冰烧，叫碟油鸡卤味、一盅两件送烧酒。

一打开酒盖，就可以闻一阵透着腥气嘅肥猪肉味，但入口一试，反而油腻感比想象中轻，混有米酒嘅清香，余味甘爽，一日能量都由此而来。

虽然玉冰烧拥趸无数，但并非人人都可以接受佢嘅油滑腻气。

特别系谂起酒缸之中竟然系一大嚿肥猪肉，饮酒嘅人会唔会多少觉得有啲搞笑？

直到依家，我都仲记得，阿公嗰句“你仲细个，唔识欣赏个啦！”

问题系我大个啦，依然唔系饮唔出玉冰烧嘅猪肉香，依然冇办法理解点解酒只可以用嚟嗒，唔可以用嚟饮。

但我开始理解，玉冰烧嘅存在，其实就系老一代广东人辛劳岁月中嘅“安慰剂”。

既然生活如此艰难，就唔好逼得自己咁紧，不如偶尔用酒精放空下自己。

你印象中嘅玉冰烧系点？

你同玉冰烧之间有冇故事？

你有冇嗒得出玉冰烧嘅猪肉香？

（如果有，麻烦形容下……） 

最后做个小科普，2012年广东省酒类行业协会曾评选过广东十大名酒，唔知有冇你嘅家乡名酒？

素材出自信报、饮食男女等

羊城网负责整理编辑