粤语之中保留咗唔少古代语嘅语音语法，因此唔少粤语词并非“本地土特产”，而来源于各种汉语典籍或典故。
唔讲你唔知，原来呢啲粤语词咁有文化！
搵周公/见周公
广东人习惯将瞓觉讲成「搵周公/见周公」，既典雅又谐谑，但其实呢个咁通俗嘅词语出自《论语》。
甚矣，吾衰也！久矣，吾不复梦见周公！
——《论语·述而》
注：周公系指姬旦，周文王嘅儿子，周礼嘅创制者，同时系孔子心目中嘅圣人。
用现代话语翻译就系：
我真是老啦，身体唔掂啦！同埋已经很耐都冇梦见我偶像周公啦！
孔子自年青时就立志恢复周礼，晚上经常梦见偶像周公，但到咗老年自知理想无法实现，加上事务繁忙，淡化咗年少嘅梦想，就冇再梦见周公。
因此后人用「梦周公」一词形容瞓觉，后来仲延伸咗「搵周公」、「见周公」嘅讲法。
非礼
「非礼」同样来源于《论语》，就系大家非常熟悉嘅——
非礼勿视，非礼勿听，非礼勿言，非礼勿动。
——《论语·颜渊》
呢度嘅「非礼」系动词+名词，意思系不符合礼教嘅事，全句意思系：
唔符合礼教规定嘅嘢，不可以睇，唔可以听，唔可以讲，唔可以郁。
不过我哋依家讲嘅「非礼」已经变为一个动词，经过意义引申，未经对方同意嘅轻佻猥亵，相当于普通话之中嘅“耍流氓”。
捉伊人
粤语嘅「捉伊人」就系人人细个都玩过嘅“捉迷藏”，入边嘅“伊人”出自《诗经》，我哋每个人中学都背过嘅：
蒹葭苍苍，白露为霜。 所谓伊人，在水一方。
——《诗经·秦风·蒹葭》
「捉伊人」虽然系孩童游戏，不过佢嘅来源就足见粤语嘅古雅文艺。
而广东人为求响亮，经常将词语读音变调，所以「捉伊人」嘅读音更贴近“捉依因”。
老而不
「老而不」，系香港用语，用嚟讽刺顽固执着、倒行逆施、连累他人嘅老人家。其来源为——
幼而不孙弟，长而无述焉，老而不死，是为贼。
——《论语·宪问》
此句常被后世人误用嚟歧视老者，但实际上孔子原意系指责旧友原壤：
年幼不讲孝悌，长大又无作为，年老而又不死，一生好似“贼”一样。
而“贼”唔系依家所讲嘅小偷小贼，而系指为祸人间、毫无建树嘅坏人。
香港人从原句截出「老而不」三字，隐藏嘅“死”字就说明讲话者内心渴望呢位老人家快啲卖咸鸭蛋，所以大家都系慎用啦。
大阵仗
源自北方话嘅「大阵仗儿」，由于粤语冇“儿化音”，就变成「大阵仗」，最初系出自《红楼梦》。
只这一个女孩儿，十分娇养，也识得几个字，见不得大阵仗儿，常在屋里不出来的。
—— 《红楼梦》第八四回
《红楼梦》中嘅「大阵仗儿」系指大世面、大场面，粤语中嘅「大阵仗」扩大咗原意，指排场阵势非常隆重。
大头虾
喺广东，「大头虾」经常被用嚟形容一个人粗心大意、善忘懵懂。
而「大头虾」本名为罗氏沼虾，系一种头比身大嘅虾，点解「大头虾」被用于指代粗心之人？
16世纪嘅《广东通志》中曾经记载：
不晓事者曰大头虾。
明代理学家陈白沙曾撰《大头虾说》，入边系咁样形容「大头虾」：
甘美不足，丰乎外，馁乎中，如人之不务实者然。
由此可见，好耐之前，广东人已经用「大头虾」形容外强中干，不务实而行为浮奢嘅人，后人由此引申为指一个人粗心大意、不动脑筋、不懂事理等。
虽然大头虾系嘅贬义词，不过大头虾本身真的好好食，大家都系唔好歧视佢哋啦！
各位自己友，
你觉得以上边个词最有文化？
素材出自《香港粤语惯用语研究》、维基百科等
羊城网负责整理编辑
最新评论