广东话有唔少俗语，“符碌”、“豆泥”、“丫呜”平时就听得多，但系究竟点嚟嘅你又知唔知呢啲俗语点嚟噶？

“丫呜”源于“坳胡”，系南朝时期一个将军刘胡嘅别号。

细个嗰阵，阿妈成日都话如果小朋友唔乖，就会畀丫呜婆捉咗去。咁究竟丫呜呢个俗语有乜由来呢？好多人以为“丫呜”系将乌鸦调转嚟写，其实系错噶，“丫呜”意思并非乌鸦，而是南朝时期一个将军刘胡嘅别号。据《南史》记载，呢位刘将军块面“坳黑似胡”，正宗黑炭头一个，所以就被叫做“坳胡”。

由于佢够勇猛，加上个样都几靓仔，去讨伐诸蛮时搞到班蛮夷都怕咗佢。到咗后来就有人用佢嚟吓细路：「小儿啼，语云刘胡来便止。」再后来，啲人就会用“坳胡”或丫呜嚟吓细路，而且仲话人丑样唔靓。所以，丫呜呢个俗语其实系由“坳胡”演化过嚟。

“豆泥”，香港人用作形容品质差嘅嘢或者人，其实佢嘅真身系糕点馅料。

话说，以前南方人整饼，好多时都会将啲馅放入去，其中以莲子制成嘅馅最高级，叫莲蓉；以红豆制成嘅馅叫豆沙；最平嘅就系以黄豆制成嘅馅。由于北方糕点有枣肉做嘅枣泥比较高档，于是就有人借“泥”呢个字套用落黄豆嘅馅，美其名“豆泥”。

不过，下栏野始终系下栏野，豆泥好快就畀人用嚟形容价钱平，品质差嘅嘢。

“符碌”来自英文，系英式桌球术语Fluke。

打桌球有时会有啲好彩嘅入波，桌球术语称呢种情况叫Fluke。后嚟慢慢演化成足球嘅术语，意指侥幸嘅入波。后嚟香港人接触咗呢个英文词，就将佢本土化，成为广州话读音嘅符碌喇！后来成为好彩，侥幸嘅代用词。

洗太平地

“洗太平地”同香港19世纪一场严重疫症有关。

话说香港喺19世纪末发生咗场鼠疫，死咗好多人。政府发现好多死者同受感染者都系住喺太平山街一带嘅华人，由于佢哋住嘅环境狭窄污糟，搞到嗰度有好多老鼠，成为鼠疫重灾区。

为咗应对疫情，政府派人去呢个区清洗街道同房屋，进行消毒，仲将部分房屋夷为平地，之后有人就将呢次清洗消毒行动叫做“洗太平地”。后嚟，香港人就钟意以“洗太平地”嚟形容扫荡罪恶黄赌毒嘅行动。

来源：topick.hket.com