不知不觉，10月尾喇，又到咗明明同你冇咩关系、但系啲商家为咗搵钱不断宣传搞活动嘅万圣节！
因为西洋传统上认为万圣夜系鬼怪世界最接近人间嘅时间，所以亦都有唔少人将万圣节当做西方嘅“七月十四”。
而讲到七月十四，就不得不提一下细细个嘅童年阴影！印象最深刻嘅莫过于星爷代表力作——
《回魂夜》
你话呢出剧好恐怖，但佢其实又唔系好恐怖，细细个睇嘅时候真系好得人惊，但依家大个睇返，真系笑到停唔到，完全唔惊！最啱嗰啲又屎又烂瘾（例如我）嘅人睇。
电影一开始，就讲到有一对夫妇唔小心杀害咗自己嘅阿妈，所以呢个阿妈就返嚟报仇。而饰演呢个阿妈嘅正系星爷嘅御用婆婆——侯焕玲。
而电影其中一个镜头系个小朋友匿埋喺厨房偷食鸡髀，似乎印照着之后发生嘅事情，系因为畀自己嫲嫲上身。
之后佢仲坐喺佢嫲嫲生前最鍾意嘅摇椅度摇下摇下。
而嫲嫲出现喺电视机中嘅场景，经已系电影之中最恐怖嘅镜头了。
以前细细个睇嘅时候，觉得入面嘅情节都好恐怖，啲鬼怪块面白雪雪。
但依家睇返会发现睇到嘅嘢变得唔一样，例如：唔擅于使用电器会导致咩后果喇。
如果发现有人锁住你，你要点样自救喇。
不过，呢一出时长82分钟嘅恐怖片，只用咗电影开头嘅16分钟嚟认真咁搞恐怖，剩低嘅所有时间，全！部！用！嚟！搞！笑！（你话死唔死）
其中包括，如何怂恿身边嘅人搽蓝色眼影嘅方法。
论男扮女装嘅妙用。
死人头嘅由来。
（入面装住阿婆个头）
嗌醒人嘅正确方法实地试验。
电击学嘅妙用。
人肉挡箭牌嘅正确使用方法。
以及，如何制止仇家上门收数嘅指定动作。
点解香港80、90年代电影会特别精彩？
明明布景简陋、特效又鸡、演员嚟嚟去去都嗰几个，但系每一部都非常认真……
不得不承认，80、90年代嘅香港恐怖片，其实有好多都系“认真在恐怖”。香港恐怖片非常善于利用华人文化嘅价值取向去引起观众嘅共鸣（就好似婆媳纠纷之类嘅），营造恐怖嘅自我心理暗示。
所以，当年嘅童年阴影有唔少都系嚟自香港嘅，明明知道好恐怖都要去睇！（冇错，又系讲紧我自己）
万圣节好快就到喇，不如一齐嚟睇下呢啲恐怖片/惊悚片，你哋睇过几多部喇！（PG家长指引：以下图片可能令到各位自己友情绪不安，请搵个大胆嘅朋友陪你一齐睇。）
-01-
《人肉叉烧包》
呢出电影系根据“八仙饭店灭门案”案情进行拍摄，当年黄秋生将呢出电影入面心理变态、极度残忍嘅杀人魔演得惟妙惟肖，就算依家睇返都觉得毛骨悚然！
前段时间，黄秋生拍咗自己“变态生涯”中嘅最后一出戏——《失眠》，同样演得深入人心，唔知会成为几多小朋友心目中新嘅童年阴影。
-02-
《阴阳路》
讲到香港恐怖电影，一定好多人会谂到罗兰姐。作为香港恐怖电影嘅御用角色，罗兰姐可谓系贯穿香港恐怖电影嘅人物，好多恐怖电影都可以搵到罗兰姐。
▲《龙婆》系列电影剧照
喺1997年上映嘅电影《阴阳路》中，当年虽然布景粗糙，但系搭配上灯光同埋恐怖嘅音乐，罗兰姐一出场就令人觉得十分恐怖。
-03-
《僵尸道长》
恐怖片，点少得林正英道长？佢拍嘅僵尸片已经到咗前无古人，后无来者嘅地步，而且道长嘅形象早就深入民心。
对于当时冇接触过太多恐怖电影嘅观众嚟讲，当时嘅化妆技术已经可以吓坏好多人。（所以我就拣咗冇咁得人惊嘅僵尸仔仔嚟用）
-04-
《咒乐园》
相信好多人都系因为睇过呢出恐怖片，先开始对小丑产生恐惧。小丑唔再系一种快乐嘅象征，仲带埋恐怖嘅氛围。
就算系依家大个咗，睇到小丑都有啲惊惊哋！
再加上电影里面出现过嘅相机呢样日常电子产品，真系唔敢乱影相。
-05-
《山村老尸》
就算有黎姿加持，呢出戏当时都系好恐怖！
（冇错，就系呢一幕！）
正如呢位豆瓣网友所讲，冇睇过嘅人永远唔知“楚人美”呢三个字有几恐怖。
影片最后楚人美从湖里伸出嘅手以及嗰段令人难忘嘅粤剧一直成为好多人心目中嘅经典场景。
-06-
《三更之饺子》
如果话呢出电影恐怖嘅话，不如话佢刷新咗自己三观。
睇过呢出戏之后，食饺子都会有少少阴影，即使呢出电影已经上映咗14年之后，而且每次听到《洪湖水浪打浪》，成个人都忍唔住打个突。
-07-
亚视《危险人物》
唔知道有几多自己友睇过呢部单元剧呢？呢部系以香港经典真实奇案为基础改编嘅系列单元剧，每一集都系一个独立嘅案件（有啲会用两集），所以对于香港人嚟讲，体验会更加强烈。
片中讲述嘅犯罪事实都系以多年嚟香港发生嘅真实个案为原型，犯罪人嘅作案手法、破案嘅难度之大、造成社会不良影响之广泛，呢啲喺案发当年都震撼咗香港社会各界。
而其中令我印象最深刻嘅系《屯门色魔》，曾经好长一段时间导致我对屯门产生阴影。
-08-
亚视《我和僵尸有个约会》
除咗单元剧《危险人物》之外，喺更早之前嘅1998年，亚视仲有一出当时红极一时嘅连续剧《我和僵尸有个约会》。呢出电视剧开创咗新嘅僵尸风潮，同林正英道长嘅僵尸大有不同。
（呢个系第一季变成咗僵尸嘅平妈，睇完吓到成晚瞓唔着觉。）
编辑部嘅少女们以前都会守喺电视机前面睇！
-09-
TVB《奇幻潮》
2005年TVB都同样推出咗一部单元剧，类似于日本嘅《世界奇妙物语》。
其中异想天开嘅故事真系同阿妈讲自己知嘅古仔一模一样。例如《羡慕死人》中，就系因为女主人公路过墓地乱咁讲嘢，导致之后发生嘅悲剧。
而《四人归西》更系令到办公室嘅雀友有一段时间放弃过自己嘅宏图伟业（成为赌神）。
《回魂夜》周星驰曾经讲过，我哋之所以觉得鬼恐怖，都系因为周围嘅人一直讲鬼就系恐怖嘅一样！
所以，就算系鬼节，
大家都唔好自己吓自己，
怪力乱神其实大多系心理作用
而且
……
……
……
我哋广东人贫穷（同加班）都未惊过，
鬼又有咩好惊喔！
广东最恐怖又知名度最高嘅鬼，
乜唔系我哋班穷鬼咩！
最后同大家讲个
我今年听到最恐怖嘅鬼古：
仲有两个月就2019年，
年初定落嚟嘅目标基本冇实现过！
明明日日加班2018依然穷到窿！
2018年我究竟做咗啲咩啊！
各位自己友，
除咗上述所讲嘅电影或人物
你哋仲有咩电影系你哋嘅童年阴影？
边一个桥段令你觉得最恐怖？
快啲留言同大家分享喇！
最新评论