摘要：我就大你六个六，够姜你反劈我啊！
讲起酒呢样嘢，我会饮酒，但唔算一个好酒之徒，如果出去同人摸杯底，我都会饮两杯，不过通常都系嗒酒咁饮。
摸杯底：聚餐交谈、宴请他人
嗒酒：品酒
最近，夏天聚会多，经常有人组织食饭唱K宵夜直落，当你陪一班蒲精出去癫，你就会见识到广东人劈酒有几癫，分分钟狼死过黑社会劈友！
劈酒：劈系形容豪饮嘅俗语，表现为好似唔要命咁疯狂饮酒，通常会一边玩髀盅，一边劈
一掂酒，一班平时斯（扮）斯（晒）文（叉）文（烧）嘅人，就丧失理智，毫无人性！
此时，你会突然明白好耐之前睇过嘅一句话——
大家饮饱食醉去唱K，唱下唱下K，自然有人觉得无聊，撩起玩骰盅，只要开始玩大话骰，噩梦就从此开始！
大话骰就系一种互相试探对方底牌，以估得准确为胜者嘅骰盅游戏，输者罚饮酒（又叫被劈）！
一开始玩可能仲细细哋，输就罚一杯，玩high咗之后，为咗大对方，就开始加码啦，从两三杯甚至七八杯都有。
输者唯有起身自队，大话骰劈酒一般都系上不封顶，迟饮一秒，直接队你！
队酒：灌他人饮酒，「劈酒」同「队酒」均为黑社会术语，两个表达都可以加强气势
自队三杯：自己灌自己饮三杯酒
半打酒直接空咗，酒精一上脑，场面就越嚟越激动，广东人直接挽袖除衫，企凳上台，玩大话骰玩到好似黑社会讲数咁！
后来觉得唔够喉，从罚三杯，变成直接支吹，输嘅人二话不说直接吹喇叭，十分钟唔够，直接消灭一打酒！
支吹：正所谓“唔用杯，成支吹”，“吹”就系成支酒一口气饮晒！
吹喇叭：酒樽形状好似喇叭，一个人攞起只酒队，其形象好似吹喇叭
有啲人劝酒抵死，明明劝人饮，仲要讲埋啲大道理：“人生好似劈酒咁，太执着只会赢咗冇酒饮，输咗饮到呕，唔好太在意输赢，做人最紧要就系开心！所以，饮胜佢！”
饮胜：干杯之意，据考究“胜”原为“圣”，指代酒，亦有人话系因为“干”字唔好意头，所以用“胜”。
劈酒无非系两个字，唔系“劈”同“酒”，而系“横”同“竖”，醉嘅横瞓喺地上，冇醉就竖住返屋企。
醉嘅人往往千奇八怪，精彩过动物世界，有人怼一打都气定神闲，最多wing wing哋，有人光荣到顶，啤啤夫瘫低，好似条死尸咁。
Wing wing哋：微醉，仍可以保持清醒，伴有“wing wing”嘅耳鸣声
到顶：到咗自己嘅极限
啤啤夫：形容醉酒后头晕脑胀、神志不清
仲有人直接劏咗，去厕所呕到七国大封相咁，你仲要睇住佢！
劏咗：“劏”系「劏白鹤」嘅简称，指人醉酒后呕到一塌糊涂。
其实「劏白鹤」系官话“汤白喝”嘅音译，“汤”喺北方俗语中指代“酒”，饮落肚嘅“汤”最后呕返晒出嚟，等于系“白喝了”。
冧低嘅人系幸福嘅，因为最惨嘅通常都系仲清醒嘅人，佢哋名副其实要carry全场，睇住成班醉猫！
冧低：喝醉酒倒下，已经丧失活动同思考能力
醉猫：烂醉如泥嘅人，由于猫经常懒洋洋、软绵绵瘫喺地上，好似醉汉嘅姿态。
呢个呕咗，要清理全场，阿个瞓咗，要拖返屋企，最恐怖嘅系啲发酒癫嘅人，口口声声话自己冇醉，下一秒开始做傻事！
我见过最搞笑嘅醉猫，系我一个同学饮醉揽住个男人，错认系自己前女友，差啲嘴落去！
重点系，呢班醉猫第二日起身都会断片，完全唔记得佢哋琴晚嘅壮举，而你就被佢哋搞咗成晚，冇教好瞓！
醉酒真系唔系一件好事，但好多人就饮过醉过下次依然会卷土重来，其实呢啲咪叫作“生仔姑娘醉酒佬——唔要又要，唔制又制”！
生仔姑娘醉酒佬：好多女性生产话坚决唔再生，但后来都系想继续生，正如酗酒之人，知道醉酒好辛苦，誓神劈愿唔再掂酒，但过后都系会继续饮，比喻人知错而不改，控制力低。
所以酗酒之人，真系好难劝，我哋啲做老友嘅，唯有帮手照顾下佢哋啦！
最后送首诗畀各位自己友，
你中意边种酒呢？
顺便讲下你嘅奇葩醉酒经历！
建六酒筲箕，
在此恭候你挑战！
↓扫一扫↓
本文看点由羊城网原创
特此声明
最新评论