唔知各位自己友有冇发现，有啲古诗词用普通话读会觉得拗口，反而用粤语读会更加顺口、押韵？

比如话杜牧嘅《赠别》之二：

多情却似总无情，唯觉尊前笑不成。

蜡烛有心还惜别，替人垂泪到天明。

虽然唔系所有古诗词都有呢种情况，不过粤语的确保留咗唔少古汉语嘅发音，所以有啲诗词用粤语读会更加押韵。

其实粤语唔单止可以用嚟朗读古诗词，仲可以直接攞嚟写诗！

有学者将用粤语写嘅诗歌叫做粤语方言诗，经历过民歌、新民歌（即粤讴，系广东珠三角地区曲艺说唱之一）、旧体方言诗、自由体方言诗嘅演变。

▲《粤讴》内页，图片来源见水印

根据已有资料，喺19世纪，岭南地区已经有人尝试用粤语口语嚟写诗，由于粤语俗语、歇后语、典故非常多，形容词十分生动有趣，因此写入诗中唔似一般诗歌咁文绉绉，反而令人觉得诙谐盏鬼。

在上世纪三四十年代，粤语诗盛极一时，不少岭南嘅文人雅士都用粤语入诗以嬉笑怒骂、针砭时弊，粤语诗一度与国语讽刺诗诗齐头并进。

但系对于大多数人嚟讲，反而对呢种市井气十足嘅粤语艺术感到陌生，甚至会觉得：“吓？乜原来仲有呢味嘢？”

今日就同大家介绍呢味，盏鬼又风趣嘅粤语诗，欣赏粤语入诗可以有几玄妙好玩！

讲到粤语入诗嘅代表人物，绝对唔少得以啜核无情对出名、被誉为“粤语入诗”祖师爷嘅何淡如啦！

你唔好睇佢同老婆改名“人菊”就以为佢冇料到啊（“人淡如菊”，问你服未？），淡如兄嘅捻手绝技——无情对，真系有料又顶瘾：

开头仲以为佢乱咁噏，连国家名、云吞都用嚟对对，认真一睇先发觉，无论系词性定意思，每个字都对得啱啱好！

之不过，文人始终系文人，淡如兄一旦认真起嚟，绝对唔同你讲笑：

注：沈展云认为“狡”应写作“姣”，即普通话中的“骚”。

大家不妨估下，呢首诗讲紧乜嘢？

A：有人个老婆跟佬走

B：有只猪乸走失咗

C：红拂女、卓文君嘅风流史

呢首《代人访失猪母赏帖七律》，语言朴实简单，一眼就睇得出（其实睇唔出）系一首“寻猪启事”啦，唔拣B，你话仲可以拣咩？！

用红拂女“发姣”、卓文君“跟佬走”比喻母猪走失咗，完全冇考虑过红拂女同卓文君嘅感受！

搞到人睇完笑完都唔知仲记唔记得去搵猪，“何·啜核鬼才·淡·笔下无情·如”果然名不虚传！

民国时期，粤语诗嘅代表人物就有廖恩焘，以“珠海梦余生”做笔名，出咗《嬉笑集》呢本书，收录咗佢早年用粤语写嘅七言律诗，囊括唔同题材，比如话《自由女》，就系写当时嘅时尚女郎：

又有讲历史人物嘅《范增》：

好似“掘尾龙”、“两头舂”呢啲极具地方特色嘅表达，如果唔熟悉粤语，又点会感受到佢哋喺诗里面嘅魅力？

廖恩焘唔单止会用特色嘅粤语字词入诗，仲兼顾埋诗歌嘅对仗：“湿水马骝”对“烂泥菩萨”，认真贴切！

除咗有何淡如、廖恩焘两位专家之外，余祖明嘅《广东历代诗钞》仲记载咗胡汉民、李蟠等粤语诗“业余”爱好者，同样有佳作。

胡汉民写过一首《韩信》：

佢仲有一首《垓下诗》：

“后生哥”、“行埋”、“唔慌”、“冇面”等都系粤语特有嘅用法。

睇到诗之前，你有冇谂过原来咁样用粤语嚟评价韩信同项羽？

而李蟠就有一首写于抗战期间嘅《闻捷》：

“氹氹”喺粤语里面就见得多啦，至于叠字用嘅“棍棍”……

你有冇发觉呢首粤语诗莫名多咗几分可爱趣怪嘅感觉？

粤人写粤语诗唔出奇，你又想唔想象到，以前连来自安徽嘅胡适都试过写粤语诗呢？

胡适1935年嚟广东旅游，闲时睇到一本叫《粤讴》嘅书，一时兴起就用从书入面学到嘅广州话写咗首《黄花岗》：

胡适后来提到，原本第三句佢写嘅系“咪话火把唔够亮”，后来将“亮”改为“猛”，成首诗嘅粤语韵味先算系完全体现出嚟！

而讲到离我哋最近嘅粤语诗创作者，点少得霑叔！

佢最最最经典嘅粤语诗作品，同时亦系大家最熟悉、印象最深刻嘅——

（特别邀请表演嘉宾：唐伯虎）

呢首诗由于某种你同我都明嘅原因，就唔另作解释啦。有啲嘢，只可意会，不可言传！

其实粤语入诗，唔单止极具趣味性，仲有一种隐藏嘅“实用性”。

近代有位诗人曾经咁样评价岭南：“珠光剑气英雄泪，江左应惭配岭南。”

佢认为岭南嘅诗歌难与江南嘅相提并论，实际上反映出旧时大众对岭南“文教不盛”嘅片面印象。

而呢啲有返咁上下历史嘅粤语诗，令粤语嘅存在价值更加凸显，印证岭南文化唔系千年不变嘅沙漠，即使讲唔上系辉煌繁盛，但岭南文化能够流传、传承至今，绝对渊源有自。

可惜嘅系，就连粤语诗嘅其中一个承载体——粤语，都面临困境：越嚟越少细路哥会主动使用粤语，甚至对粤语产生一种抗拒嘅心理。

困境之下，本来就算系“冷门艺术”嘅粤语诗，又会有几多人愿意关注、重视，甚至系创作呢？

粤语诗会唔会有后继无人嘅一日呢？

资料来源：

方宽烈《谈广东方言的格律诗》、胡文辉《粤语与旧诗》、维基百科等。

各位自己友

你哋最心水边首粤语诗？

你仲知道边啲盏鬼粤语诗？

欢迎同我哋分享！