“落街斩料” 相信系唔少粤人家庭里出现频率颇高嘅四个字。我哋广东人每逢开心喜庆嘅日子都会有“斩料加餸”嘅风俗习惯，有时屋企有客人过嚟食饭，阿爸都会“落街斩料”表示对客人朋友款待嘅意思。

– 咁点解叫「斬料」嘅？ –

购买前，无论系烧鹅定系白切鸡，都系完整未剁开嘅，成只咁嘅。同烧腊师傅确定好所要部位同大细后，师傅现场斩件装盒，因此，烧腊店林林总总嘅肉食都被称为“斩料”。

粤语“料”字意味深长，食物中亦只有大块主肴方可称之为“料”。所谓“斩料”，就系指“烧腊”。烧腊一般系先用秘制嘅酱汁腌制一段时间再放到炉里烤，烧鹅、乳猪皮脆，肥美，口味略带广东人钟意嘅甜味。

-「斬料斬料」梗系唔少得蜜汁叉燒！-

阿妈嬲嘅时候都会话“生旧叉烧都好过生你！”。 阿妈咁讲意味住，生旧美味嘅叉烧仲可以食落肚填饱自己，但系生咗你我净系度受罪。

可想而知，叉烧喺粵菜嘅地位何等重要。以前，经济情况唔允许，“落街斩料”买叉烧只能喺节假日或者屋企嚟咗重要客人，节假日系为咗加菜添喜庆，而屋企嚟咗客人买上一份叉烧作菜更系表达咗主人家对客人嘅重视。

当然，依家生活水平逐渐提高，”斩料“唔再需要等节假日，但系叉烧仍然喺广东人嘅饭枱上充当重要角色。

叉烧系广东烧味（亦可称烧腊）嘅一种，其他有烧肉、烧乳猪、烧金莎骨、烧鹅、烧鸭等等。顾名思义，烧味系烧出來嘅，传统用炭火烧制，依家一般有机器代替。

“叉烧”呢个名源于制法，系將猪肩肉用大叉固定放入火炉裡烧，因而叫叉烧。烧出來嘅肉红当当系因为用咗叉烧酱（超市能买现成的），此醬传统用生抽、蒜蓉、麦芽糖、南乳、五香粉、酒等混成。当然，传统酱料会比超市现成嘅味道要好，若有个别老店有独家传统配料，咁就更加“冇得弹”！

-「深井燒鵝」点解叫深井？-

你以为「深井」系地名？

✕✕✕

广东烧鹅最著名嘅系“深井烧鹅”，好多人都以为“深井”系地名，所以无论系广州黄埔长洲岛嘅深井村定系香港嘅深井村，慕名而来食烧鹅嘅人络绎不绝。

岂不知“深井”其实系一种特殊烤炉形式。佢系喺地下挖出来嘅一口干井，下堆木炭，井口横着铁枝，烧腊就用钩挂喺呢啲铁枝上，吊喺井中烧烤，由于井系喺地里挖嘅，周围都系密不透风嘅泥土，喺呢种深井中烧烤，炉温更加均匀稳定，因此出品上乘。