粤语里面嘅语气词多到数唔晒，而且仲可以不断创新，除咗最普遍嘅“吖、呀、啊…”之外，仲有下面呢啲。

（“龙”为借用字）

“死人龙嘢”并唔系真系“一样嘢”，而系一个语气词，且中性，褒贬两用。但系依家已经好少听到，如果仲有人讲，相信应该同我阿嫲年纪差唔多。

例：

1、以为我唔知你啲“死人龙嘢”啊？一早睇穿你啦！（贬）

2、买得过嘎，佢哋“死人龙嘢”，真系几好嘎！（褒）

“~鬼~马”使用频率相当高，而且用法都相当广泛，可以随意搭配想用嘅动词。

例：

1、打鬼打马咩，几步路，行路系啦，打的唔使钱啊！

2、走鬼走马咩，老世都未肯走，依家走，搏炒啊？

3、去鬼去马咩，得嗰三个人，开枱都唔够脚。

“鬼火咁~”同样系一个使用频率好高嘅语气词，偏褒义。同“~鬼~马”一样，可以配搭唔通嘅形容词。

例：

1、你睇嗰个女仔，鬼火咁靓！

2、阿妈，呢条鱼真系鬼火咁正！

“~到痹”大家都好熟悉，可褒可贬，同样可以配搭唔同嘅形容词。

例：

1、我嘅EX真系渣到痹啊！周街唱衰我…

2、今日得7度，真系冻到痹啊！

3、诺基亚部新机真系正到痹啊，你哋都考虑入手啦！

（“吓哇”为借用字）

睇得多星爷嘅电影，肯定会留意到星爷经常都会讲呢句“吓哇”，主要用于敷衍同表达无奈。

例：

1、

A：“好烦啊，佢又送花过嚟，叫咗佢唔好送嘎喇…”

B：“吓哇…”（A晒命，B表示无奈）

2、

C：“一早就话咗嘎喇，美国唔可以畀佢做总统嘅…blabla…”

D：“吓哇…”（C啰嗦，D礼貌性敷衍回应）

“几廿岁人”嘅意思唔系真系话对方几十岁，无论对方几多岁都可以使用，不过对年龄30以上嘅人使用，效果更佳。主要系表达自己嘅无奈，都有“成熟啲啦”嘅意思，贬义。

例：

1、你搵返个女朋友啦，几廿岁人，你唔寂寞嘎咩？

2、几廿岁人啦，做嘢稳啲得唔得？

“咁紧要”作为语气词，同“紧要”一啲关系都冇。意思反而同“咁犀利”相似，都有惊叹之意。

例：

1、

“听讲经理畀上头铲咗一铺喔。”

“咁紧要？”

2、

“你个冰箱七千几蚊咁紧要？”

“同熟人买，有个八折！”

粤语语气词，除咗传统嗰啲之外，仲可以不断咁创新，只要达到增强语气个效果，就系好嘅语气词。

例如，老世叫你今晚加班，你就可以讲：

“加你条命啊！”

or

“加？加你只卤水鸡翼！”

如果你仲谂到其他新嘢，

喺留言区show出嚟，

等大家学下嘢啦！

刊录六十四首经典粤语童谣

且让妈妈教我唱的歌继续流传下去