摘要:有摩托车的广州 VS 无摩托车的广州,你会选择哪个?

2007年,为咗改善交通状况,“禁摩”似乎系唯一嘅途径。不知不觉,广州市区全面禁摩已经超过10个年头,10年里面,我哋见证住私家车嘅普及,巴士、地铁嘅不断发展。

 

但“禁摩”对于改善交通情况有冇实际帮助?对于市民出行有咩影响?对于市民正常生活有冇积极作用?

 

禁摩十年,现在的广州更好了吗?-羊城网——懂互联网,更懂广州!

羊城网采访咗9位亲身经历过“十年禁摩”嘅自己友,用佢哋嘅真实经历,将呢段禁摩历史再次呈现。

素材来源:羊城网顾问群

编辑:阿爆

 

1

 

嗰时(2007年以前),半个广州都开摩托车,边似依家咁,通街都系私家车。我当时读高中,屋企去学校要行20几分钟,但系飞摩嘅话4、5分钟就到了,两蚊鸡。十年前两蚊鸡可以食到好多嘢嘎,早餐两蚊就饱到想呕!

 

我觉得个个高中生都同我一样,宁愿瞓多20分钟咯!20分钟喔,一日可以瞓多20分钟,人都精神啲啦!

——张小姐 白领 27

禁摩十年,现在的广州更好了吗?-羊城网——懂互联网,更懂广州!

2

全面禁摩前几个月,我就买咗部汽车,宝来06年款。虽然嗰时广州嘅私家车冇依家咁多,但系塞车都系每日例牌菜。禁摩头几日交通状况确实系改善咗小小,不过过咗几日,条路上面嘅单车多咗好几倍,喺车流之间左穿右插......如果唔打醒十二万分精神开车,分分钟都出事!

 

不过又难怪嘅,虽然话禁摩有过渡期,但无论过渡期有几长,只要全面禁摩嗰日一到,对开摩托车嘅人始终都系当头一棒!你谂下,嗰时广州市区大大话话都有十几廿万部摩托车,至少都有三成系搭客佬,打烂咗几多人饭碗?

——叶老板 商店老板 44

禁摩十年,现在的广州更好了吗?-羊城网——懂互联网,更懂广州!

 

3

禁摩?10年前我就已经举双手双脚赞成啦!嗰时打劫、打人、飞抢(飞车抢劫)...全部违法嘢都系同摩托车有关!一抢完就即刻开走,警察想捉都捉唔到啲贼!

 

好彩我未试过畀人飞抢啫,嗰啲人几冇阴功啊,抢条颈链,开得飞咁快,将个女人拖咗成百米,个女人都断埋气啊,你话阴唔阴功!我真系情愿佢攞把刀指住我,我乖乖哋畀晒啲钱佢...

——梁姨 退休工人 61

禁摩十年,现在的广州更好了吗?-羊城网——懂互联网,更懂广州!

 

4

禁摩梗系好事啦!不过你话禁摩对交通状况有冇帮助,我又唔觉得有帮助。

 

啱禁摩嗰段时间,广州好似返到8、90年代咁,周街都系单车...过一排,就开始有三个碌嗰种摩托车,横冲直撞,条路冇车我都唔敢开太快...又过一排,就轮到电瓶车了,同摩托车根本冇分别,系开唔快咁解啫!

 

嗰时电台交通消息,三朝唔到,两日就有一个开电瓶车嘅畀人撞死!讲真啦,你咪怪我讲得难听,畀人撞死嗰啲电瓶车司机,如果佢哋系开摩托车,话唔定拧一拧油,开快小小就唔会畀人撞啦!

——陈生 国企职员 46

 

禁摩十年,现在的广州更好了吗?-羊城网——懂互联网,更懂广州!

5

有私家车嘅,停车费贵咗!快递,嗰时兴叫速递,速递费又贵咗!就连去大排档食个宵夜都贵咗!

 

好多人都话唔明,点解禁摩又关大排档事......啲大排档生意再好,其实用料都系差唔多份量,基本上一部摩托车就可以车晒。禁咗摩,咪焗住要买部车咯,唔买车,咪次次都搵人车咯...

 

一禁摩,乜都贵晒!牵一发而动全身,其实好多市民都受影响!

——昌哥 肉档老板 47

禁摩十年,现在的广州更好了吗?-羊城网——懂互联网,更懂广州!

 

6

 

好!(禁摩)梗系好啦,冇咁乱吖嘛。只不过,系唔系可以做得有智慧啲呢?嗰时最受争议嘅,其实都系好多人嘅“饭碗问题”,人哋做咗咁多年搭客佬,忽然间要佢哋转行?有咩冇可能啊!

 

唔止搭客佬,维修摩托车嗰啲师傅呢?摩托车市场嗰班老世呢?就连加油站生意都少咗好多啦...后来咪好多人去咗佛山咯,冇计嘎,人哋维修师傅,一世人就系识得整摩托车,冇车畀佢整,人哋老婆仔女都要开饭嘎!

——梁伯 退休工人 62

禁摩十年,现在的广州更好了吗?-羊城网——懂互联网,更懂广州!

 

7

其实广州交通咁便利,有冇摩托车冇咩区别。广州该塞车就会塞车,同摩托车都冇咩必然关系。不过好明显,飞车抢劫真系少咗好多,治安都好咗,绝对系好事!

 

但系城中村里面,例如东圃、棠下,仲不时会见到有摩托车!除此之外,仲有嗰啲横冲直撞嘅“便民车”、堆到乱七八糟嘅共享单车、从来都唔响喇叭嘅电瓶车...呢啲取代摩托车嘅产物,更加需要监管!

——叶生 白领 25

禁摩十年,现在的广州更好了吗?-羊城网——懂互联网,更懂广州!

 

8

 

我都做过搭客佬,禁摩之后我就同个老友夹份,买咗部的士,其实都系做返搭客佬,就系从两个碌变四个碌啫......

 

开心,好开心!点讲都好,“铁包骨”(汽车)点都好过“皮包骨”(摩托车),都安全好多吖!而且禁摩,的士生意又好咗,搵都搵得多啲!

 

但系讲返转头,我部摩托车冇报废,一直都喺储物室,话晒我都系靠嗰部烂鬼摩托车养起头家,供仔女读书。冇嗰部摩托车,我乜都冇啊。

——陈生 的士司机 53

 

禁摩十年,现在的广州更好了吗?-羊城网——懂互联网,更懂广州!

9

九几年嗰时咪有出《烈火战车》嘅,刘德华做主角,一红就红咗10年!嗰时好多女仔都钟意男仔有部“烈火战车”(就是摩托车)嘎!如果车技好就更加受欢迎!

......

嗰时好多人出街“片车”(飙车)嘎,我都去过几次,不过依家谂返,真系年少气盛,脑笋都未生埋,好危险,仲会畀警察捉添。

 

禁摩好,非常好啊!少咗好多危险嘢:飞抢少咗啦、开部摩托车周围走嗰啲唔读书死飞仔又少咗啦!

——张生 个体工商户 44

 

禁摩十年,现在的广州更好了吗?-羊城网——懂互联网,更懂广州!

禁摩十年,

有人话治安好咗,

有人话交通衰咗。

 

有人话禁摩唔好,

都有人话禁摩系好事。

 

各位自己友

有摩托车嘅广州 VS 冇摩托车嘅广州

你觉得边个广州更加舒服?

 

禁摩十年,现在的广州更好了吗?-羊城网——懂互联网,更懂广州!