侄仔（四年级）嘅粤语近排进步好大，大哥大嫂喺屋企终于唔使再讲“半桶水普通话”，开心到中咗奖咁，仲要我“评估”下，侄仔仲算唔算“土生捞仔”！
怀住玩嘅心态，我同侄仔玩咗一个粤语俗语问答游戏，我问一个，佢答一个，赢咗有奖。但系侄仔嘅表现，真系搞我“十五十六”。
✎十五十六：心里忐忑不安。
冬前腊鸭
我：“你知唔知「冬前腊鸭」咩意思？”
侄仔：“冬天要蒸腊鸭食！”
我：“唔啱。”
侄仔：“啲鸭过冬之前特别肥，整腊鸭最好食？”
我：“你都识得好多嘢喔！”
✎冬前腊鸭——只攋只：一般只两个性格或外形有差异的人走到一起，尤其指夫妻，暗喻有互补的意思，即一个强“攋”一个弱。
菠萝鸡
我：“考你第二个，「菠萝鸡」你又识唔识？”
侄仔：“菠萝蒸鸡？”
我：“唔啱。”
侄仔：“菠萝包里面包住只鸡？”
我：“唔啱。”
侄仔：“只鸡包住个菠萝包？”
我：“唔关菠萝包事嘎！”
✎菠萝鸡：靠黐，占人便宜的意思。
你有牛白腩，我有荔枝柴
我：“再考一个，「你有牛白腩，我有荔枝柴」咩意思？”
侄仔：“一个烧火，一个煮，一齐食牛杂！”
我：“唔好成日谂住食喇。”
侄仔：“牛白腩换荔枝柴，蚀底喔！”
✎你有牛白腩，我有荔枝柴：实力相当，能够互相抵挡。
生鬼
我：“考个简单啲嘅，「生鬼」点解啊？”
侄仔：“一个女人生咗只鬼？”
我：“你鬼片睇得多啊？”
侄仔：“老婆勾佬，搵咗个外国人，咁咪生‘鬼（鬼佬：外国人）’咯。”
我：“呢啲情节你喺边度睇到嘎？以后唔准睇！”
✎生鬼：生动鬼马。
抛浪头
我：“「抛浪头」你有冇听过啊？”
侄仔：“《正义联盟》个海王啊？一个浪抛过去。”
我：“唔啱。”
侄仔：“系咪Gel头？Gel到好似周柏豪咁咯。”
我：“咁讲有好似讲得通喔。”
✎抛浪头：虚张声势，靠吓。
托水龙
我：“你想象力咁丰富，再估下「托水龙」系咩意思。”
侄仔：“水龙？哦，我知喇。”
我：“系咩啊？”
侄仔：“系咪屙尿啊？只手托住条X。”
我：“嘘！嘘！畀你阿妈听到，佢闹死我啊！呢题跳过。”
✎托水龙：借了别人的钱，能拖就拖。
踎墩
我：“「踎墩」好简单，你估下咩意思。”
侄仔：“咪踎喺个桥墩下面咯。”
我：“好近喇！踎喺度即系点？”
侄仔：“开大。”
我：“除咗食，就系屎尿屁，你喺学校究竟学咗啲乜啊？”
✎踎墩：无所事事，没事做。也指失业没有工作，或退休。
扎炮
我：“正正经经喇，「扎炮」系咩意思？你答啱咗买个雪糕畀你食”
侄仔：“畀少少提示得唔得啊？”
我：“唔系嘢食，唔系屎尿屁，系形容一个人处于艰苦嘅状态。”
侄仔：“唔到仔？不孕不育？结扎咗？”
我：“呢啲嘢你喺边度学返嚟嘎？”
✎扎炮：冇饭开，捱饿。
以上内容虽然含有恶搞成分，但眼看身边嘅小朋友，对粤语俗语理解同使用嘅能力越嚟越差，真系笑唔出。
粤语里边，咁多趣致搞怪俗语，不仅包含住广东人嘅风俗习惯，亦都记载咗广东人嘅生活。曾经嘅口头禅都系一段“历史”，历史虽然过去，但希望遗留落嚟嘅嘢唔会销声匿迹。
本文粤语俗语及解释出自《老饼潮语3（苏万兴）》
如果文中有错漏之处，请指出更正。
最新评论