热辣辣：比“好热”嘅程度再深一啲。

例句：

“喂，出边热唔热啊？” 

“何止热啊，热辣辣啊！”

热死人：热到会死人，热嘅程度又深一层。

例句：

“出边究竟有几热？” 

“热死人！准备入急诊了！”

热到飚烟：完全冇夸张成份，喺头上面洒小小水，有时的确会冒烟。哩个程度嘅热，你嘅意识基本上模糊不清，大脑基本上惗唔到嘢。

例句：

天气预报：“哩几日广州都系高温炎热…”

“屌你咩炎热？直头热到飚烟啦！”

㷫烚烚：注意，㷫烚烚原意系指一种“心理转为生理嘅反应”，（例如见到个靓女，搞到全身㷫烚烚）同天气热冇关联，不过用嚟代指天气热，都十分有味道！

例句：

“热到全身都㷫烚烚。”

“我连心情都热到㷫烚烚啊。”

㷫到上心口：南方夏天高温多雨，十分闷热，地上嘅水蒸发被人吸入，部分人会产生不良反应，主要表现就系“心口一股热气散唔开”。

例句：

“落唔出雨，焗到人都晕了！” 

“㷫到上心口啊，周身唔舒服。”

㷫过辣鸡：同“㷫烚烚”，㷫过辣鸡原意同天气热冇关，系指一个人“好嬲，嬲到爆”嘅意思。但因为“辣鸡”（电络铁）最高温度达到上百摄氏度，用来形容天气热都十分有创意！

例句

“广州鬼死咁热，顶唔顺啊。”

“系㷫过辣鸡至真。”

㷫过火屎：同样，呢个词都系指一个人“好嬲，嬲到爆”嘅意思。火屎，系木炭燃烧之后形成嘅木炭灰，虽然火已经熄灭，但温度都高得可怕。

例句：

“出边㷫过火屎，你帮我买杯冻柠茶啦，我唔想出去啊！” 

“买条毛！自己出嚟买啦！我就真系㷫过火屎了！”