人生在世，边个冇遇到过几个交叉路口，总需要你去抉择。

作为一个广东人，我遇到过好多艰难嘅抉择。以下嘅情况，你会拣左定右？

**本文依然例牌抹去所有品牌名

1.

▲睇咗九万几张图，我依然分唔清左髀同右髀，所以原谅我直接复制黏贴……

好多人都话，烧鹅髀左髀好食过右髀！

有人话系因为左髀活动多，肉质更结实，又有人话系因为鹅排尿嘅时候，经常抬起左腿，小便顺住右腿而下，容易有膻味。

亦有人觉得，左右髀并无任何区别，不过系食客以讹传讹。

2.

同样系可乐，如果你细心品尝，两个品牌嘅味道都系有一定差别，可X可乐味道更加饱满，气体都比较足，入口时爆炸感更强，而百X可乐偏甜，糖浆味更重，但热量反而更低。

唔知你又系边一边嘅忠实fans？

类似嘅选择题其实仲有——

3.

从煮法上嚟讲，干炒牛河同湿炒牛河嘅主要区别在于有冇芡粉汁同炒制方法。

湿炒牛河，牛肉同河粉分开炒制，牛肉炒熟后勾芡，淋喺河粉上即完成；干炒牛河则相反，牛肉与河粉一同炒制，所以更讲究猛火快炒，油火相配合。

从味道上讲，湿炒牛河有肉汁味，味道更丰富，不过河粉容易变淋；干炒牛河冇汁液，会比较干，但镬气足。

4.

喺国产即食面崛起之前，我嘅童年几乎都被本土“公X面”同日本“出X一丁”垄断。

两者从包装到面饼都非常相似，出X一丁死忠粉会认为出X一丁汤底更浓郁，面更爽口，而公X面死忠粉就觉得公X面嘅面更软，价钱又平，性价比更高，而且佢嘅口味更符合广东人！

其实两者都有个相似嘅地方，就系港版永远好食过大陆版！！！（大陆版嘅出X一丁同公X面真系难食好多！食过你就明！）

5.

煮得即食面，就肯定要加只蛋啦！

煎蛋煎单面定双面，呢个都真系分歧几大。双面蛋更熟更香口，单面就完美保留蛋液嘅口感，两者各有千秋，边只系你心头好？

6.

艇仔粥同及第粥，广东两大名粥，第一次听佢哋嘅名，根本估唔到佢究竟系咩粥。

艇仔粥最早喺荔枝湾河面贩卖，主要配料系鱼肉、海蜇、虾仁等海鲜，而及第粥传说与状元及第有关，主要配料系猪杂或肉丸。

两种粥嘅发明，其实都同样反映广东人节俭务实，唔浪费任何食材。

7.

陈皮红豆沙VS臭草绿豆沙，两个都棉滑香甜，无论系边个都好正！不过我认识嘅女生大部分都中意红豆沙，而男生反而倾向绿豆沙，咁又系点解呢？

8.

比起腊肠嘅街知巷闻，润肠就显得好小众。腊肠系用猪肉制作，咸中带甜，而润肠就系用猪润（猪肝）制作，多咗啲苦味，亦注定咗中意润肠嘅人比较少。

我老窦就曾经煮过双肠饭（润肠+腊肠），虽然比较肥腻，但真系非常惹味，冬日必备嘅腊味饭！

其实以上选择题只系小儿科，真正最难嘅选择题系……

9.

转发定评论？！

作为我哋嘅真爱粉，

你点可以剩系拣一样！

两样都拣，快啲转发兼评论！！！

图片素材来源于网络

本文看点由羊城网原创