电影《笑傲江湖之东方不败》中，任我行曾经对令狐冲讲过：“有人嘅地方就有恩怨，有恩怨嘅地方就有江湖。”

而江湖，必然会有传说。

喺广州呢一个包容性特别强嘅城市之中，又存在紧/存在过咩都市传说同传奇人物？

有人话过， 当你试过风筒辉嘅烧烤，你嘅一切味觉会发生改变，从此再睇唔上其他烧烤档。

风筒辉（原名黄耀辉）系广州烧烤档传奇人物，90年代开始佢就凭一个红色风筒走天下，只选用新鲜食材，特制酱汁，用风筒精准把握火候，令到出品别具风味。

▲连壳烧生蚝，保留原汁原味

▲香葱大肠头，甜而不腻，令人回味

一开始，风筒辉从走鬼档做起，一炮而红之后食客就络绎不绝，曾经因生意太火爆扰民而被投诉。

后来风筒辉转而同酒楼合作，驻场专做宵夜档。合作嘅店家换咗一间又一间，就算一直转场都依然阻挡唔住食客嘅热情，好多长情食客坚持一次次提前预约，上门帮衬。

除咗系因为风筒辉食物出品一流，可能仲系因为佢系一个地地道道嘅豪爽老广，冇架子，接地气，一心一意做烧烤同交朋友。

▲风筒辉经常同食客开怀畅饮

一个风筒辉红咗之后，就出现咗好多假冒“风筒辉”。但我相信识食嘅人都有分辨力，都会知道咩先系最质朴又最讲究嘅烧烤。

提到广州传奇，必然会提到身穿女装造型，买螺送咸水歌嘅炒螺明。（以前文章介绍过，睇过嘅自己友可以跳过呢部分）

80年代开始炒螺明就喺沿江路一带大排档卖炒螺，由于生意唔好做，佢就开始着女装，模仿偶像梅艳芳唱歌嚟卖螺，喺广州宵夜界崭露头角。

后来佢将流行曲改编为咸水歌、粗口歌，歌词露骨粗俗，加上搔首弄姿嘅表演，听众个个笑到肚疼，从此一发不可收拾，吸引咗一批忠实粉丝。

打出名堂之后，炒螺明迎来佢嘅鼎盛时期，获得《叮王争霸》亚军，喺南方剧院演出，上香港电视节目……

出名之后，炒螺明嘅亲人嫌弃佢嘅行为，个个都远离佢，就连亲生女都唔想认佢。

呢几年，炒螺明沉寂咗，有时候会听到佢嘅新闻，有时话佢遇意外死亡，有时系佢饮醉酒惹事生非。

我哋依然可以从新闻知道，呢个传奇仲活跃喺广州城内。

两边铲青，头顶顶住凌乱嘅攣毛，零星嘅鬚根，前卫嘅衣着，配上惆怅嘅表情，佢就系人称“广州犀利哥”嘅烈士陵园周大侠。

2012年，凭借呢张沧桑唏嘘又带朋克风嘅相，以拾荒为生嘅周大侠一度走红网络，获封广州犀利哥，令到好多人慕名去烈士陵园一带偶遇周大侠。

虽然第一眼睇周大侠好似严肃，但实际上佢非常友善，唔拒绝他人影相邀请，每次望镜头眼睛都炯炯有神，面带笑容，令人感受到温暖。

据说，周大侠系浙江嘉兴人氏，嚟广州多年，原先从事装修行业，后为咗自由生活，而选择拾荒。

喺好多人眼中，拾荒唔算系咩高大上职业，但我喺周大侠嘅眼中，偏偏见到对生活嘅热爱同对追求嘅坚定。

大约喺2014年9月，一个广州街边残疾流浪歌手嘅视频风靡网络，视频中一个身材消瘦嘅男子卖艺歌唱，唱嘅系《偏偏喜欢你》。

后来，越嚟越多歌唱视频发布，男子声音干净纯洁，感情丰富，初听犹如天籁，因而呢位流浪歌手阿龙走红，被网友形容为秒杀《中国好声音》。

送上演唱视频，各位自己友可以感受下↓

阿龙喺网络走红，使到佢场场演出都爆满，有人话，阿龙最高日收入已达到2000蚊。

随即有网友指出，阿龙其实系对口型假唱，阿龙嘅音频来源于歌手钟明秋。

钟明秋演唱视频↓

更有人讲，阿龙走红嘅背后，其实系一场骗局。一个骗子集团故意搵人拍摄，打出残疾歌手博同情，吸引人关注，以此打响名堂，获得利润。

一时间，各种阴谋论出现，辱骂讨伐声蜂拥而至，就算阿龙自己有发表声明，亦有粉丝为阿龙发声，但都冇办法扭转舆论，阿龙嘅传奇就此陨落。

近一两年，阿龙几乎销声匿迹，而当年嘅是非曲折、真真假假，我哋都已经冇办法查究。

喺东山口庙前直街，有档一开就开咗20年嘅牛杂，几多人从细个帮衬到大个，呢间就系——肥佬牛杂。

老板肥叔原先系东山酒家嘅厨师，下岗之后就出嚟买牛杂，凭借牛杂靓、价钱平，赢得各位街坊学生嘅喜爱，每到营业时间，食客都围到密不透风。

喺走鬼档时代，佢仲叫“阿叔牛杂”，后来进店经营先改名为“肥佬牛杂”，不变嘅系牛杂嘅味道同街坊之间嘅情感。

由于物价飞涨，肥佬牛杂亦从最初5蚊一盒，到后来升到10蚊，但相对于其他牛杂店嚟讲，真系已经好抵好平。

肥佬牛杂，承载住旧时代嘅人情味同回忆，所以先令人念念不忘。

希望呢份执着同坚持，可以一直传承落去，我哋以后依然有机会食到正宗嘅肥佬牛杂。

呢个时代步伐好快，有人可以一夜成名，又有人会瞬间陨落。

传说或者会随时间而被淡忘，但起码总有人记得佢哋曾经存在于呢个城市。

最后讲多两句，无论系高官名人，定市井流氓，大家都系搵两餐，为生活，只要唔系偷呃怪骗，大家不妨宽容以待，毕竟都系因为有呢啲都市传说，广州先咁与别不同。

各位自己友，

你哋仲知道咩广州传说？

有咩传奇人物系你最难忘？

素材出自知乎、天涯等

羊城网负责整理编辑