话都冇咁快
一年一度全国性大型哺乳动物集体迁移
喺寻日正式开始喇！
参与嘅动物数量多达千万
持续时间长达一个几月
讲嘅，就系可以搬空成个城市嘅——
春！
运！
▲图片来自新华社
春运唔单止催生咗一场人口大迁徙
仲拍咗一系列
只会喺北上广深等大城市上映
每年都会返兜一次嘅新春特别巨献——
《空城计》！！
呢部史诗级巨制
讲述广州等人口密集嘅大城市
如何实现一夜之间消失三分之一嘅人口
如何令魔鬼地狱西秒变仙境天堂西
如何将噪音降低五个八度
…………
▲图片来自网络
为咗令各位可以提前感受呢部
唔知系荒诞喜剧
定系悬疑鬼片嘅大制作氛围
今日，我哋一齐嚟八卦一下
广州版《空城计》嘅七大主角究竟系边位！
珠江新城
平时畀人头掩盖咗真实样貌嘅佢
依家终于畀机会我哋
睇清楚广州嘅CBD生咩样啦！
仲有佢嘅好朋友广图
可唔可以重获佢嘅安静环境呢？！
我哋拭目以待！
地铁
平时对《岗顶围城》
《广佛大战僵尸》
《沦陷公园前》
见怪不怪、处变不惊嘅你
居然畀过年嘅地铁吓窒咗？！
等咗成年
第一次尝试到，唔使追地铁嘅快感！
终于有机会两只脚都踩到地下！
真系好想展开双臂，大叫一句：
“无敌是最寂寞”啊！！！！！
街市
就连曾经可以
从早上6、7点high到夜晚11点嘅各大街市
阿妈们嘅寻宝乐园
都可以即刻收咗皮！
拎住咁大揪餸
你阿妈点会放过你呢个放紧假嘅咕喱啊！
唔系你以为你喺屋企黐饮黐食
摊大手板唔使做啊？
呢个时候就系你最上阿妈心嘅时候喇~
各类店铺
心心念念咗成年嘅春节假期
你以为终于可以好似普通人咁扫街？
咁就真系太天真啦！
过年想出去行街？谂下好啦！
除咗啲大商场仲会开
成条街见到有铺开就算你好彩！
马路
塞车变成广州市区嘅罕见现象？！
究竟有几多车主
够胆喺摄像头下cos《头文字D》？！
条路仲畅顺过我用咗飘柔嘅秀发
几乎零噪音、零废气
一年只有一次
行过路过千祈咪错过！！
城中村
喺广州，连城中村都可以做旅游景点
摇身一变，就系
全广州最最最最少人嘅游乐园？！
平时嫌条路太窄
依家有得比你当T台咁行喇！
公交车
逼车逼到假发都甩？
司机成日咆哮？
放低偏见，春节睇清公交车嘅真面目！
包车服务搭配窗外面嘅冇人路景同步使用
唔讲仲以为自己坐紧旅游路线添！
所以，讲咗咁多
广州嘅人到底去咗边度？？
咁就梗系《空城计》嘅头号反派boss
——高！速！公！路！
一边塞车一边殴打自己嘅灵魂：
点解我要拣过年出去旅游？？？
当然啦，上高速去旅游系有钱人嘅选择
至于好似我哋咁样嘅穷鬼……
唯一可以有资格享受嘅娱乐活动
就只有：
唔使畀钱，唔使排队
一个人都可以玩
长期24小时为你开放嘅——
支撑我喺岗位上不停工作嘅
系爱啊，老世！
（下年可唔可以加人工啊老世？）
注：以上内容包含唔文明嘅行为，纯属恶搞，请各位享受广州难得嘅宁静同时，千祈咪模仿啊！
各位自己友
你有冇感觉到屋企附近空旷咗？
过年你系打算誓死出游定匿埋摊唞？
你觉得广州过年边度最值得去？
欢迎喺留言区分享~
最新评论