究竟因为咩事，行转通济我哋四个都苦不堪言？

依家就带你睇睇！

暴走两个钟

元宵节当日18:00，广佛地铁同济路站集合，提前预约咗餐厅食饭，打车出发，看似顺利嘅开头，只不过系为咗后来“暴走两个钟”作铺垫！

每年元宵，通济桥附近各大小道路都实行交通管制，千古罪人阿爆预约嘅餐厅，位于佛山禅城季华五路，呢条路唔止交通管制，而且双向禁止通行！所以司机都话“冇办法啦，你哋落车行过去啦。”

2公里，我哋拖住疲惫嘅身躯，饥寒交迫，足足行咗一个钟！

比“人山人海”更壮观！

短暂嘅晚饭同休息之后，我哋终于开始“行通济”！

离通济桥仲有一段距离，已经人流前进速度明显缓慢，因为实在太多人！人山人海已经唔可以用嚟形容当日嘅盛况，“小司机”阿爆用咗一句话嚟形容，成为咗“全晚最佳”：好似用显微镜睇精子咁…

今日最深刻？

佛山每年虽然人多，但系现场都十分有秩序。道路两边企满商贩，我哋都跟足传统，人手一个风车同生菜（生菜寓意生财）。希望可以转嘅好运，今年和气生财！

但系令我哋印象最深刻嘅系：系大路中间打横行！唔使睇车！

入口处合影

几万人？你就开胃咯！

离通济桥仲有一公里左右，人流突然停止移动，一问之下，原来前方道路临时禁止进入。原因系，通济桥附近嘅道路已经全部塞满人，放行嘅话可能会酿成事故！

此时夜晚10点半，咩、沅、水搵咗个少人嘅地方自拍，阿爆就勇闯前线，同警察叔叔沟通，了解最新情况。

阿爆：“阿sir，要管住几万人，你哋都辛苦咯！”

阿sir：“几万人？你就开胃咯！几十万人啊！”（阿爆已经默默喷一口血）

来源于新浪微博

通济桥附近道路

……

……

阿爆：“阿sir，咁呢度几时放行啊？”

阿sir：“好难讲噶，通济桥嗰边仲多人，佢哋唔走，你哋都冇得行，依家睇嚟，预计最起码12点啦…”

撤退&心酸

得知最早都要12点先可以继续行，我哋都决定撤退，食个宵夜，返酒店瞓觉好嘅…

但系回程路上，我哋都睇到令人心酸嘅一幕：

阿爆摄

大家都明，睇图，唔多讲。

来源于新浪微博

最后仲想讲

作为佛山每年最盛大嘅传统活动，禅城政府都好畀心机！全程都有步行指引，出动超过8000警力维持秩序（今年行通济人流超过70万），一定畀个Good禅城政府！

根据某位阿sir嘅建议，希望大家都注意下：

1、行通济系一个传统，冇限定夜晚行先好，所以都可以早上行。

2、冇必要影太多相，影得越多，塞得越犀利！

3、行通济期间，都会临时增加垃圾桶，希望大家自觉。

4、如果人潮停住咗，请理解，我哋系为咗保障市民嘅安全，唔好起哄推闹。

如果你都有去“行通济”

不妨同大家讲讲你嘅感受！