今日系双11之后嘅第一个星期一，

“剁完手”之后，荷包空空如也，

除咗“土”，你仲可以食啲乜？

阿咩推荐大家一个“双十一节后餐单”。

正所谓一日之计在于晨，就算啱过完双11，早餐都要食得健康有营养！食咩好呢？粗粮搭配水果蔬菜就最健康啦！

推荐餐单一：塞米一碗，蕉两只

你个食塞米，双11乱咁使钱，依家知错未？食食食，食蕉啦你！

推荐餐单二：柠檬汁焗白果配谷种

食柠檬、食白果咁多年，双十一仲要乱买嘢，抵你依家食谷种！

经过一个上午嘅努力工作（收快递、拆快递）之后，又到Lunch Time，由于下午嘅热量消耗比较大，所以中午都要食得营养均衡！

推荐餐单一：霸王套餐

食霸王餐嘅时候，注意人身安全！

推荐餐单二：拖鞋软饭

单身狗食得起软饭，食得起拖鞋饭，都唔使做单身狗啦！

推荐餐单三：手指捞饭

冇啖好食，食下手指，觉得咸咸哋，就可以吞啖饭啦！

又到三点三，下午茶时间，系时候松下啦！（食嘢就冇份啦，做啲有益身心嘅小活动啦！）

活动一：打麻雀

第一铺就自摸食胡，点知食诈胡，一家赔三家，于是夜晚饭都冇钱食！

活动二：踢波

做前锋就食尘，守龙门就食波饼，中场休息就食西北风，一定够饱，饱到夜晚饭都食唔落！

活动三：呢个工作系边个跟噶？（超激情办公室生存类游戏）

老世：嗱，你搞掂埋先好落班啊！（呢只死猫点解要我食？）

最后，挨咗成日，终于落班！食个晚饭慰劳下自己啦！但系“出得嚟行，预咗要还”，双11过得咁开心嘅你，系时候要补返数啦！

推荐餐单：“食得系福”套餐

有粥食粥，有饭食饭，食得咸鱼，要抵得渴，因为过完“疯狂双11”嘅你，仲有咸鱼食，已经好幸福了，食得系福吖嘛。

以上嘅“阿咩推荐餐单”，

唔知各位自己友食过边几款呢？

有声+手绘：广州街边美食明信片

阿婆话斋：

生活同腌咸酸一样，

行慢一啲，花时间沉淀，

生活才能更入味。