香港超级英雄，你条底线咧？
提起超级英雄同科幻电影，依家大部分人第一时间都会谂到各种美国大片。
但系香港本土嘅超级英雄电影，你又知道几多？
先至声明，唔系以下依几部啊！
阿咩精选三部各具特色嘅超级英雄电影，唔知你有睇过几多部捏？
急冻奇侠（1989）
剧情主要讲述方守正（元彪 饰）身为锦衣卫，奉命追捕自己作恶多端、无恶不作嘅师兄凤三（元华 饰），过程中两人缠打一起，意外穿越时空，被冰雪所冰封。
因为各种意外两人死而复生，去到现代。方守正于机缘巧合之下遇见名为阿玉（张曼玉 饰）嘅不良少女，发展出一段爱情故事。
同时，凤三继续喺现代为非作歹，方守正与其展开一场正邪大战。
时空逆转，古人穿越，解冻重生，听起系咪好似前几年嘅世纪大烂片《冰封重生之门》，冇错，《冰封重生之门》就系改编自《急冻奇侠》。
可惜，嗰次改编堪称完美扑街！！！我哋忘记依种烂片，继续睇返原作！
《急冻奇侠》嘅创意系来自于美国科幻电影《挑战者》系列，但系该片剧情、笑点、打斗画面都具有浓厚嘅港产特色，如果唔知，真系会认为依部戏原创嘅香港电影。
一开始，片头遇害嘅郡主嘅装扮，及除袜画面，就已经有致敬《倩女幽魂》嘅感觉。
▲一个打酱油嘅角色都已经可以如此惊艳
元华、元彪两男主喺雪地嘅激战堪称经典。
两人对峙画面构造以黑白色为主，一正一邪两主角被中间嘅大树隔开，体现两人立场对立，除两人一树之外，画面再无太多其他杂物，体现出东方美学嘅空灵和留白。
元华同元彪都系习武出身，系香港出名嘅武打明星，所以两个主角嘅打斗场景基本上系演员亲自上阵，拳拳到肉，下下出尽力，为本片奉献出十分精彩嘅武打戏份。
另外，同武打场面一样精彩嘅仲有角色嘅塑造，元彪将夏守正嘅正义耿直，而又木讷守旧，演绎得非常自然，期间又加入唔少诙谐戏份，令到整个角色生动可爱。
▲依场吃曱甴嘅戏，
令阿咩觉得既作呕又搞笑
元华将残暴咸湿、泯灭人性嘅大反派凤三扮演得入木三分，细个睇电影嘅时候，依个角色系阿咩嘅童年阴影之一。
▲作为一个咁直接表露心声嘅淫贼
阿咩绝对要写个“服”字畀你
有一幕，作为武林高手嘅元华竟然就咁徒手发子弹杀人，阿咩感觉牛顿嘅棺材板又喺度颤抖！
喺依部电影度，张曼玉开始告别以往清纯少女嘅形象，出演一个泼辣、豪放嘅风尘“阿姐”（冇错，就系嗰种阿姐），令人睇到张曼玉演技嘅突破。
特别令阿咩眼前一亮嘅系，张曼玉有一幕系着古装梳头，靓到令人窒息，同王祖贤嘅小倩不相伯仲。
阿咩唔会同你讲，依部戏入边竟然有张曼玉畀人S…M...嘅情节——
阿咩都唔会同你讲，啲考古专家见到两个男主嘅尸体揽埋一起，发出嘅感叹系——
阿咩更加唔会同你讲，依部戏入边竟然有啲咁嘅讽刺性对白——
▲阿咩突然有啲惊畀人查水表
入边仲有好多你估唔到嘅打酱油角色！唔信？你自己去睇下咪知咯！
东方三侠（1993）
《东方三侠》讲述三个出身背景不同嘅女侠，经历一系列盗走婴儿嘅神秘事件后，最终结成生死同盟，共同对抗邪恶势力嘅故事。
《东方三侠》同其他香港科幻电影最大嘅区别就系，佢系一部女权主义色彩浓烈嘅影片。
剧中屈指可数嘅男性角色，基本都系冇咩存在感（刘松仁饰演嘅警察，秦沛饰演嘅警察局局长），或者角色本身存在缺陷（大反派不阴不阳嘅“公公”、其手下智障嘅陈九）。
相比起身，三个女主角就出彩好多。
梅艳芳饰演嘅东东，平时系温柔娴淑嘅家庭主妇，他人遇到危险时就戴上面具，变身霸气侧漏嘅“女飞侠”，锄强扶弱，维护正义。
杨紫琼饰演嘅陈三/心靖，系公公手下嘅冷面杀手，风情万种，美丽坚毅，但无奈身不由己，内心世界复杂而矛盾，喺正邪爱恨之间苦苦挣扎。
张曼玉饰演嘅“捕头”陈七，则系个贪财率性、放荡不羁、敢爱敢恨嘅赏金猎人，可以算系全剧嘅搞笑担当。
三个性格迥异嘅侠女，造型干练，性格鲜明，对于一向男性当道嘅港产电影，咁嘅组合可以话系一次大胆而另类嘅尝试。
虽然本片系科幻嘅外壳，但系其中糅合咗唔少嘅东方元素同香港特色，所以整部戏唔单止会有美式英雄嘅影子，仲有东方武侠风情。
比如，梅艳芳嘅飞蟾走壁，好明显就系东方武术嘅轻功。
郁啲就双脚离地，企喺电线上，经常挑战牛顿三大定律。
▲画面中嘅威亚就非常明显
可见当时拍摄技术都唔系好好
仲有杨紫琼酣畅淋漓嘅武打戏份，佢经常使用扫堂腿，阿咩目测杨紫琼条腿有一米八……
除咗张曼玉嘅角色会使用枪支，梅艳芳同杨紫琼都系使用九节鞭、软剑、飞镖依嘅传统武侠使用嘅武器。
成个影片特别模糊咗时代嘅界限，出现咗好多跨时代嘅元素，比如有现代嘅警匪对峙戏份，又有皇帝太监、血滴子等古代元素，仲有以隐身衣为代表嘅未来科技产物。
▲想知依个系咩啊？自己去睇电影啦！
三个女性角色随著剧情推进而慢慢变化，交杂咗每个人嘅爱恨情仇，个人成长，最后三人合力打败反派，三侠披上披风，伴随激昂嘅BGM昂首阔步，此等豪气侠骨，完全不输任何一部男性武侠小说。
▲阿咩重睇咗依个画面三十几次
可以话，导演杜琪峰（冇睇错，真系杜琪峰拍噶！）用三个温柔艳丽、特立独行嘅女侠，成功为各位观众编制出一个具有科幻同魔幻色彩嘅侠客之梦。
超级学校霸王（1993）
本片讲述咗喺未来嘅2043年，犯罪大王将军（卢惠光饰）为咗避免坐监，而派手下（郑伊健饰）回到过去搵法官余铁雄（张卫健饰），对其进行洗脑。
政府知情后特派飞龙特警铁面（刘德华饰）、扫帚头（张学友饰）及发达星（任达华饰）返回1993年去保护铁雄。
本片好多设定同元素来自于当时流行嘅电玩游戏，包括街头霸王同超级玛丽。
比起前两部嘅，依部应该会有好多人睇过，毕竟南方卫视经常重播，阿咩每次见到都会重新睇。
点解咁钟意依部电影？
1.因为依家再搵唔到一部电影，可以集齐咁多曾经嘅经典偶像明星，仲叫佢哋扮鬼扮马，cosplay我哋熟悉嘅电玩角色！
虽然四大天王缺黎明，但系导演都专门创造一个叫黎明嘅角色，补翻个空位。
▲就系同大雄赛跑阿条友
2.因为依家再搵唔到一出电影，会去改编童年嘅电玩游戏，仲要改编嘅咁成功，咁搞笑。
▲打斗场面虽然好拙劣，由一个动作反复拼接而成，但系真系非常喜感
▲全部都系街霸啲招数名
3.因为依家再都搵唔到一部王晶拍得咁有诚意嘅搞笑电影，而且我睇完会笑得出！
《超级英雄霸王》有好多王晶特色嘅低黄暴笑点（低速黄色暴力），间学校就叫圣育强中学——
同埋下面依个“春代”梗……唔使阿咩解释了吧……
仲有其他嘅情节，翻睇依然觉得好好笑。
▲依家都好难再见到
歌神有咁鬼马嘅表情咯
阿妈喺前面讲嘢，个仔同个女喺后面开片嘅画面——
同埋，关于艾滋病嘅假设，系导演对未来世界嘅畅想，同时警惕依家嘅人，重视预防艾滋。
可惜，依几年嘅王晶，拍出啲《澳门风云》《王牌逗王牌》，电影水平已经大不如前，早就失去咗原来嘅味道，令到阿咩只可以搵佢嘅旧片重温回味！
上边三部片已经系十几年前嘅作品，入边嘅演员，有人已逝，有人沉寂、有人转型、有人成为天王传奇、有人结婚隐退。
作为观众嘅我哋，同样都唔再系十几年前嘅不知事嘅细路，重新睇依啲电影，所思所想已经同当初完全唔同。
不过，经典电影带畀我哋嘅欢乐、感动、思考依然系难以替代，系香港电影普遍低迷嘅依家，依啲电影反而显得更加珍贵、经典。
时光虽逝，但经典永存。
各位自己友，
你哋睇过上边嘅电影未？
你哋又知道咩其他港产英雄电影？
喺留言区讲畀阿咩知啦！
本文由羊城网原创
最新评论