今日女生节，听日妇女节。

呢排成条街都系各种过节活动，

瞬间入咗一个女儿国。

 

讲到地球上最神奇嘅妇女，

肯定就系广东阿妈！

今日，小沅子就要揭露

广东阿妈“孤寒七宗罪”！

 

啊…唔系…

 

系“七大环保理念”先啱！

 

理念一

一家人怕咩食口水尾？

 

阿妈从来唔畀我哋有剩饭，

实在食唔晒，我就叫阿DI帮我食埋。

 

但系有一次，阿DI食唔晒啲饭，

阿妈就叫我帮手食…

我拒绝，阿妈就闹我，

 

一家人怕咩食口水尾啊？

 

（唔记得同大家介绍，阿DI，我屋企只狗！

因为老窦阿妈都好锡佢，所以当佢系仔！）

 

理念二

隔夜餸隔夜再隔夜！

星期一阿妈蒸碟咸鱼瘦肉

第一晚，食唔晒；

第二晚，冇乜人想食；

第三晚，冇人食；

…….

直到寻晚，碟嘢依然喺度…

（点解唔系今晚？睇落去就知！）

 

 

理念三

保鲜袋用完再用再用再用！

 

同样系星期一嗰碟咸鱼，

第一晚，新保鲜袋；

第二晚，继续用；

第三晚，继续用；

……

……

今晚，用嚟包第二碟餸…

（包咩餸？睇落去就知！）

理念四

隔夜餸“一品锅”！

 

依然系星期一嗰碟咸鱼，

因为实在冇人食，

所以今晚，阿妈就…

将碟咸鱼连同

星期三煮嘅“酿茄瓜”

最后煮咗味

 

咸鱼肉碎茄子煲

（肉碎：将酿喺茄瓜里面嘅肉挖出嚟制成…）

理念五

运动员，妈尔特！

 

用洗衣机洗衫，阿妈每次都会set好闹钟，

一到咗“脱水”环节，阿妈就会以

“快过博尔特小小嘅超越人类极限奔跑速度”

飞过去“暂停”洗衣。

 

 

点解？

因为阿妈要放啲洗衫水出嚟

 

冲厕所！

而且，到咗最后一次“脱水”环节，

阿妈就会直接关咗洗衣机……

（点解阿妈要咁做？你真系要睇埋落去）

理念六

哲学家，亚里士多妈！

 

点解阿妈到咗最后一次“脱水”环节，

会关咗洗衣机？咁咪脱唔到水咯？

 

冇错！

阿妈就系唔想脱最后一次水！

（悭返两分钟电！）

 

不过阿妈极力否认系为咗悭电，

反而讲咗个高深嘅“哲学”理论：

 

晾衫实要晾几个钟噶嘛！

几个钟，啲衫干得咁快做咩啊？

少少水，依家又唔系回南天，

一晚实干啦！而且仲可以…

 

（仲可以咩呢？继续睇落去！）

理念七

史上最有创意嘅淋花！

 

由于啲衫冇脱水，

所以晾起咗之后，

就会不断咁滴水！

 

冇错，你哋都估到我阿妈系点样淋花了！

 

 

以上纯粹为喜剧效果，绝无恶意。

如有雷同，我觉得……

 

你阿妈同我阿妈应该验下DNA，

佢哋可能系同一条肠出！

祝各位靓女靓妈

节日快乐！年年18岁！

 

如果你阿妈有咩环保壮举，

偷偷哋喺留言区同我哋讲啦！