大家都知道，世界上有个黄金组合，叫白粥油炸鬼！呢pair简直系广东人早餐嘅绝代双骄！

但系喺呢个食碗豆腐花都可以搞出南北对抗嘅时代，一碗白粥、一孖油炸鬼就足以令到以食为天嘅广东人四分五裂！

白粥同油炸鬼一齐食，广东人可以衍生出以下N种食法！

问：

油炸鬼、白粥食边个先？

广东人答案可以分为

先粥后鬼派VS先鬼后粥派VS一齐食派

先粥后鬼派认为：油炸鬼咁好食，白粥淡茂茂，梗系先食粥再食油炸鬼啦！宝物沉归底啊嘛！

先鬼后粥派认为：油炸鬼啱炸起系最热辣辣、脆卜卜，唔先食点对得住自己，而且食完油炸鬼再食粥，可以消滞解腻！

一齐食派认为：香脆油炸鬼送软绵白粥先系人生最高享受，你哋啲凡夫俗子唔识嘢！

问：

油炸鬼应唔应该浸粥？

广东人答案可以分为

浸粥派VS唔浸粥派

浸粥派认为：白粥令到油炸鬼软化，同温热软滑粥底互成一体，变到绵中带脆，脆中带软，油炸鬼浸白粥先系终极食法！

唔浸粥派认为：油炸鬼浸到软淋淋，完全冇晒油炸鬼独有嘅松脆香口，有咩好食！油炸鬼浸粥简直系暴殄天物，亵渎极品！（一面嫌弃）

问：

油炸鬼可以点食？

广东人答案可以分为

原条照嚼派VS拆开两条派

原条照嚼派认为：你问我点解原条油炸鬼就咁怼入口照嚼，冇乜原因，就系因为一个字，爽！

拆开两条派认为：食粥唔分开过一孖油炸鬼，人生点完满！畀你成条食，你有咁大个口咩！

随便手撕派VS刀切整齐派

随便手撕派认为：我享受撕开油炸鬼嘅快感，呢啲先叫随心所欲！

刀切整齐派认为：大家都系文明人，用刀叉几好啊，整齐又美观，最重要系唔使成手油！

除咗呢啲常见嘅派系，仲有啲其他食法嘅少数派（以下案例均出自身边真实人物）：

加辣椒食粥派

▲小沅子：我有个高中同学，佢食粥一定要加辣椒或者老干妈，唔整到成碗粥红当当就唔罢休！

油炸鬼蘸花生酱送粥派

▲阿咩：我曾经见过有人食油炸鬼嘅时候，叫服务员攞啲花生酱上嚟，然后油炸鬼蘸花生酱送粥，从此之后，我觉得呢个世界冇咩冇可能啦！

炸两王道派

▲阿水：一直觉得油炸鬼有啲油腻，但系自从食过炸两之后，就觉得好正！炸两先系油炸鬼嘅正确打开方式！以后食粥，都会叫返碟炸两！

如果你问我，几时广东人先会联合起身，同仇敌忾，咁就梗系听到有人话——

油炸鬼标配系豆浆！

敢问各位自己友，

你哋又属于边一派？

图片素材来源于网络

本文看点由羊城网原创