如果你系一个土生土长嘅广东人，食粤菜长大，咁阿咩就要问几个问题啦！
Q：用咩腌米可以煲出一个靓粥底？
A：答案系用皮蛋来腌米！
Q：要做出好嘅芝麻糊，要加咩落去芝麻度一齐煮？
A：要加珍珠米！
Q：叉烧包是否松软，点解又同天气变化有莫大关系？
第三个问题嘅答案，就唔开估喇，想知道答案？就去睇下呢档美食节目——
《食的秘密》
《食的秘密》系由HKTV出品嘅饮食节目，记录香港多种著名嘅地道美食，从唔同嘅角度去解读地道菜式喺广东地区历久不衰嘅原因。
每集嘅主持系城市电讯旗下嘅艺人，我哋熟悉嘅TVB面孔，全程粤语解说，保证同声同气，格外亲切。
每集一个唔同嘅主题，有潮州菜、广式点心、云吞面等，仲会搵相应嘅专业厨师示范讲解，一般一集讲解三至四道菜式，保证节目嘅专业性。
每集长度20分钟左右，差唔多系一餐午饭嘅时间，阿咩今个星期中午食饭都系靠佢度过~
作为一档美食节目，首先值得推荐嘅系食物画面。
拍摄食物时多数采用黑色背景加重点打光，突显食物嘅原色，镜头感有较高水准，做到静态精致，动态跳脱。
一粒云吞，一集就有三种唔同嘅形式表现，分别体现出云吞嘅皮薄晶莹、松紧有致、饱满充盈，望到都想食。
展现云吞皮嗰幕，简直令强迫症患者睇到身心舒畅！
烹调过程嘅镜头，好多时候采用快镜、慢镜切换，使得画面具有冲击性同趣味性，二十分钟睇落嚟，唔会觉得闷，反而觉得好送饭！
如果斋系粤语主持同画面两点，肯定不足以推荐畀你哋，《食的秘密》最大嘅特点系，佢拍出咗两个字——
讲 究
以前睇云吞面，觉得只不过系普普通通嘅食物，但当你睇完个节目，你会发现简单嘅食物，入边包含咗好多心机同智慧，制造嘅精致同讲究，甚至会超过好多贵价嘅食物。
选料到制作嘅讲究就唔使多讲，正宗嘅云吞面，连摆盘都十分讲究，最底先系麻油、豉油，跟住系韭黄、云吞，然后系面，最后先到汤。
而入边嘅云吞面师傅泰哥，出于从细对云吞面嘅喜爱，促使佢喺面厂面店学习二十几年，从用料、刀工、煮法、样样讲究，样样钻研，坚持追求做出一碗好食嘅云吞面。
从一个小学徒到依家成为专业嘅云吞面师父，有自己自创嘅独门秘方，卖云吞面卖到街知巷闻，可以话佢嘅一生都奉献咗畀云吞面。
曾经，阿咩以为煮粥系好简单，只要放米放水就得，而睇完生滚粥嗰集，就完全唔系咁谂。
喺庙街开粥店嘅云姐，每日煮一次粥底，凌晨三点就要起身煲水，因为水滚要两个钟，然后煲粥又要两个几钟，要早起先可以保证早上有粥可以供应。
煮粥底九成时间要用猛火，师傅要每十五分钟搅动一次，防止烧焦，粥底一焦就全部要倒咗，重新煲过，煮粥师傅除咗捱通宵，仲要面对百几度高温。
除咗粥底，煲生滚粥用嘅铜煲都好重要。云姐一般系双料铜煲，煲身黄铜，煲底黄铜，传热极快，但造价贵，而且红铜软身，用几个月就会损坏。
但系如果转用其他煲，食材原味会流失，粥就唔会咁香甜，为保持生滚粥嘅质量，云姐一直坚持用双料铜煲，以上种种都系云姐对生滚粥嘅讲究同坚持。
仲有一集系讲粤式糖水，入边有讲到，想要芝麻糊够滑，其中一个秘诀，就系用传统石磨去磨浆。
因为石磨够重，可以将芝麻彻底研碎，连芝麻皮都可以压成糊状，做出嚟嘅芝麻糊先又香又滑。
但系石磨磨浆，会多用好多时间，出于利益考虑，依家好多店铺就会转而选择机器，传统嘅工艺就系咁一步步失传，先会有人感叹：我哋再都食唔返以前嘅味道。
想知道广州边度可以食到以前味道嘅传统糖水？
阿咩寻日就有推送——点先算老字号？糖水除咗甜味，仲要加啲人情味……
一个厨师同一间食肆应有嘅质素，应该系对厨艺、食物嘅讲究，而依种讲究，正正就系饮食界依家最缺乏嘅嘢——工匠精神。
好多老店一开始都非常有热情，探索出自己独有嘅招牌菜式，赢得众街坊嘅口碑，但后来，或者系因为向连锁店转型，或者系因为老一批人离开，新人水平不足，对出品唔再咁讲究，水准渐失，最后就面临倒闭清盘，成为大家唏嘘不已嘅回忆。
阿咩并唔反对做饮食业都要讲求经济效益，毕竟人哋要生存，唔可以下下抵食夹大件益街坊，有时候升价无可厚非。
但系作为一间饭店或者食肆，出品应该要对得住价钱，如果可以提供稳定水平嘅出品，有边个会唔肯做你嘅回头客同水军？
如果连厨师同店主本身都唔认真对待自己嘅出品，咁啲食客又点会一直肯为你埋单？
作为一个食客，我哋可能未必了解到一道菜式嘅背后，厨师要花几多时间同心机去煮，但系我哋会从味道感受到厨师嘅心思，所以先会对一间店、一道菜式情有独钟，难以忘怀。
最后就以节目嘅一句话作为结尾——
以最讲究嘅态度，
尊重枱上最简单嘅食物。
关于粤菜嘅传承同讲究，你有咩想讲？
喺评论区留言，讲讲你嘅谂法！
PS：节目AB站有资源，大家明白啦！
有声+手绘：广州街边美食明信片
阿婆话斋：
生活同腌咸酸一样，
行慢一啲，花时间沉淀，
生活才能更入味。
最新评论