摘要：呢本杂志，称霸校园十几年！
2014年7月25日，《Yes!!》出版咗第1219期，当时嘅封面分别系江若琳、板野友美同韩国组合Super Junior M。
当时嘅我仲感叹紧，《Yes!!》真系越嚟越韩流，越嚟越无聊。
冇谂到几日之后，《Yes!!》就宣布停刊，第1219期成为最后一期《Yes!!》纸质杂志。
突然间，心入边有种空虚感，突然觉得我嘅青春原来真系结束咗。
佢最初叫《Yes!》
最初，《Yes!!》杂志仲只有一个感叹号，由电台主持倪震及邵国华于1990年创办。
90年代，系一个冇智能手机、冇社交软件、甚至连日剧韩剧都极少嘅年代。
当时社会上缺乏主导性嘅年轻人杂志，而《Yes!》版面突出，内容多数为青少年恋爱烦恼、学校生活及日常消闲、时尚潮流情报等，好快就成为新一代年轻人嘅指标性杂志。
90年代，《Yes!》风靡一时，最高月销量曾达10万本，能否登上《Yes!》杂志封面，曾经用嚟衡量明星影响力。
《Yes!》你会睇咩？
同依家啲高大上，行国际路线嘅时尚杂志比，《Yes!》真系非常非主流……
比如当年依然留住少年长发look、叛逆不羁嘅谢霆锋
郑伊健和陈晓东最后生、最鲜嫩嘅时期，靓仔到好似从漫画行出嚟
青春无敌嘅梁咏琪、周慧敏，佢哋嘅造型真系非常有年代感。
当然，最令人追得欲罢不能嘅，莫过于杂志嘅内容同副产品。
华少
《Yes!》曾经有档低俗又搞笑嘅栏目，由一个叫「华少」嘅虚拟人物模仿当红歌手嘅海报或唱片封面，将流行曲恶搞成朗朗上口嘅“屎尿屁”歌词，比如郑秀文嘅《如何掉眼泪》改成《姨婆掉眼泪》、《独家试唱》改为《独家厕格》。
Miss Sex
《Yes!》连载过台湾嘅xing教育漫画《百无禁忌Miss Sex》，会提及各种尺度打开嘅xing教育问题，简直系当时后生仔女嘅启蒙专栏，所以好多人只可以瞒住家长、老师偷偷睇。
城市惊喜
《Yes!》嘅王牌栏目，每期以一位素人美女为女主角，刊登清新脱俗嘅沙龙照，上过『城市惊喜』嘅艺人包括邓丽欣丶张柏芝丶蔡卓妍丶杨爱瑾丶陈自瑶丶李彩华丶徐子淇、李茏怡、范萱蔚、裕美、贾晓晨等，有啲甚至因此而踏上星途。
当然，有时啲相系“城市惊吓”，而唔系惊喜……
校花校草选举
1997年，《Yes!》首办一人一票嘅“全港校花校草选举”，致力于挖掘香港本土美少女美少年，邓丽欣就系通过呢个比赛加入演艺圈。
我仲发现咗入边有袁伟豪，睇下你认唔认得出！
Yes!Card
《Yes！》推出了一大堆副产品，包括明星海报、文具精品等，其中最风靡校园嘅就系正面明星相，背面系相关资料或者拼图嘅Yes!Card。
Yes!Card一推出，即刻就令啲消费欲强、唔理性嘅学生上瘾，个个都去集卡储卡，Yes!Card嘅销量一度成为艺人受欢迎与否嘅指标，甚至出现有人超卖Yes!Card。
《Yes！》杂志仲会有星座运程、小问卷等，满足晒青春期嘅各种心事。唔知你最爱嘅内容又系咩？
上一次睇《YES！》系几时
所以，《Yes!》杂志究竟系一本咩杂志？
佢系一本只可以瞒住家长偷偷睇嘅杂志。
佢系一本封存最多明星青春时期黑照嘅杂志。
佢系一本原价十二蚊港币，大陆卖到二三十蚊，都有人争崩头买嘅杂志。
当年《Yes!!》杂志嘅忠实拥趸，依家可能都系出嚟工作，甚至已经成家立室。
《Yes!!》从兴起、风靡走到衰落，其实咪又系我哋呢代人走过嘅成长轨迹。
从最初嘅本土明星偶像做封面，到后来本地演艺圈低沉，杂志要引入台湾文化、日韩潮流，系我哋经历过嘅潮流变迁。
我哋曾经年少气盛，闹过“毒瘤明”（唔知道嘅，最后有科普），但后来我哋长大，明白做人应该思想独立，唔可以人云亦云。
以前，为咗心爱嘅偶像，我哋舍得使钱买杂志、储闪卡，依家我哋有时间有钱，都令愿养自己养屋企。
《Yes!!》代表住我哋短暂而懵懂嘅青春岁月，但青春总会逝去，人总系要长大，我哋可以做嘅，唯有默默怀念。
你同《Yes！！》有咩故事？
你储过边个明星嘅闪卡？
科普
“毒瘤明”事件系指，当年正值上位期嘅艺人刘锡明，因曾公开宣称中意周慧敏，因此惹怒周慧敏当时绯闻男友兼《Yes！！》老板嘅倪震。
之后《YES！》杂志就经常出现影射一位叫“毒瘤明”嘅人物，不断大爆“毒瘤明”嘅丑事。刘锡明因此人气大跌，要转往台湾及内地市场发展。
素材出自维基百科、南方都市报等
羊城网负责整理编辑
最新评论