又系一个难得可以放松嘅周末，所以我寻晚入电影院，睇咗场电影。

而呢部电影，都系我本年度第一部“唔后悔使钱买飞”嘅好电影——《一念无明》。

先同未睇嘅自己友简单介绍下《一念无明》讲咗啲乜：

患有躁郁症（精神科疾病）嘅阿东（余文乐饰），饱受家庭、工作、欠债嘅巨大压力。一次，帮佢失禁嘅妈妈（金燕玲饰）冲凉嘅时候，意外令到佢妈妈去世。

 

法庭考虑到阿东患有躁郁症，宣判阿东无罪，但要强制入院治疗（精神病院，俗称青山）。

 

出院之后，阿东由爸爸（曾志伟饰）照顾。但由于前女友嘅憎恨、好友嘅自杀、旁人嘅冷眼，令阿东陷入绝望，再度病发。

 

（剧透住一半剧情先，另一半去电影院睇啦）

贴地、本土？NO！故事够痛点？NO！演员演技好？NO！

我唔系一个专业影评人，唔识点从呢啲角度分析。

但系呢部电影，前所未有咁真实！

《一念无明》好尖锐咁令我意识到，虽然我哋满口“以爱待人”，但系面对嗰啲精神有问题嘅人，我哋大部分人，其实都系“施暴者”！

阿东崩溃，去超市食朱古力发泄，被路人拍片人肉，阿东“弑母”往事又被翻炒。

同屋房客得知阿东病情后，纷纷冷言冷语，逼阿东父子搬走。

阿东同小朋友喺天台倾偈，但被房客误会，以为阿东想推小朋友落楼。

睇到呢啲剧情，最真实嘅唔系余文乐将一个躁郁症病人演得有几好，而系现实当中，我哋大部分人，同电影里面冷漠嘅路人、房客一样，做紧同样嘅嘢！

 “仆 街” 

“仆街”系呢部电影里面出现得最多嘅不文明用语，但系，每一个“仆街”，都唔系用嚟闹人，而系闹自己。

阿东（余文乐饰）：你个仔唔会返嚟嘎，你老公都唔会返嚟嘎，系得返我呢个“仆街仔”，工都辞埋，喺度同你抆屎抆尿啊！

东父（曾志伟饰）：其实做个“仆街”好容易嘎，唔想掂嘅嘢，咪唔好搞，唔好理佢咯。

仔细斟酌之后，冇一个“仆街”系可以省略嘅，而且每一句“仆街”都带有丰富嘅情感。

 恐 惧 

曾志伟扮演嘅“东父”，系成出电影里面思想挣扎最多嘅角色。

→起初犹豫接唔接阿东出院，但最终选择负责。

→出于恐惧，彻夜不眠，喺枕头底收埋一个铁锤。

→阿东病发，想再次送阿东入青山。

→又一番挣扎，最终决定同阿东一齐战胜病魔。

面对精神病患者，曾志伟好到肉咁表现出，我哋普通人会有嘅反应——恐惧。

但喺“房客逼迁”嘅呢一幕，曾志伟讲出咗最令人心酸嘅一句话：

我唔系需要你哋帮，我只系希望，你哋唔好围埋踩多脚就得了。

 《 一 念 无 明 》 

导演黄进讲过：“其实躁郁症，就系我哋呢个城市嘅特征。”确实系咁，喺呢个充满压力嘅城市生存，部分人多少会有啲精神问题。

面对呢部分人，我哋都要做一个选择：系做冷漠嘅“施暴者”？定系做热心嘅“行善者”？

当两样都做唔到嘅时候，好似曾志伟句台词咁，做一个“旁观者”，“唔好围埋去踩多脚”，咪够咯。