过年之前，阿咩就介绍咗79年同89年嘅羊城贺岁万家欢系几咁辉煌，点击回顾→当年羊城呢台春晚，秒杀依家任何一档春晚
而今日要介绍一档广东嘅综艺节目，都系同前者有关嘅。
佢曾经有好辉煌嘅成绩——
美国“92金狮”综艺节目二等奖
中国电视星光奖一等奖
中南六省区金帆奖
主持人谭国治、钟新宁因此节目分别获得“全国广播电视主持人开拓奖”金奖与银奖。
呢档节目就系《万紫千红》。
在座嘅90后，00后可能都会对呢个名好陌生，其实《万紫千红》系八十年代原汁原味嘅广东制造节目，更加系中国电视娱乐节目嘅鼻祖。
《万紫千红》从1981年起播放，一直到1995年停播，一共播咗15年，曾经系中国最长寿嘅综艺节目。
《万紫千红》嘅诞生同成功，离唔开当时嘅时代背景。
改革开放之初，广州嘅电视资源非常匮乏，可以收睇嘅频道只有两个，一个系广东电视台、另一个系央视，多为播放新闻或教育类节目。
▲《百花园》、《艺术长廊》系当时稍微轻松啲嘅文艺节目
与之相对，香港嘅电视节目就做到有声有色，特别系以《欢乐今宵》为首嘅综艺类节目，齐集时下热点、劲歌热舞、诙谐短剧等，为广东观众带嚟极大嘅视觉冲击。
到咗79年春节，第一届羊城贺岁万家欢（以下简称“79羊城贺岁”）举办。
虽然节目名义上系广东台同TVB合作，实际上，大至电视车，细至一个插头，所有机器、设备、演员都系从香港运过嚟。
而“79羊城贺岁”更加充满住香港特色：
报幕员（主持人）唔使立正，唔使读稿，倾计咁介绍节目，主持人可以随便爆烂gag，演员坐喺观众中间，随时会被请上台讲嘢表演……
“79羊城贺岁”获得前所未有嘅成功，令到好多广州电视人都冇谂过，原来电视节目可以咁做！原来观众极其受落呢一套！
为咗同香港节目抗衡，1979年，省广播局同省台嘅一班工作人员，住喺东莞一间招待所，每日反复睇《欢乐今宵》，不停研究揣摩节目形式同风格。
舍弃内地电视节目惯有嘅严肃端正，借鉴《欢乐今宵》，广东第一档本土综艺节目嘅雏形就喺一间招待所诞生，并被命名为《万紫千红》。
嗰阵，冇人预计到《万紫千红》后来会成为一档家传户晓、雄霸收视嘅综艺节目。
1981年1月1日，《万紫千红》正式开播，随即一炮而红。
一开始嘅《万紫千红》，依然属于杂志式栏目，采用录播嘅方式。但《万紫千红》领先于内地其他节目，将报幕员变为主持人。
主持人同报幕员最大唔同系，主持人必须要识得临场发挥、掌控全场，唔可以照稿读。
当时广州缺少呢方面人才，最后栏目组就搵到电台播音员谭国治，同埋啱毕业嘅樊玉婵同黄婉玲。
▲主持人钟新宁、樊玉婵、谭国治（从左到右）
《万紫千红》后来仲开创咗好多先河，比如：第一个喺加入小品同流行音乐元素，国内首次采用电视特技、外景拍摄、现场直播制作节目。
▲王乃斌，《万紫千红》现场直播概念提出者，我国内地最早期嘅电视综艺节目、ＭＴＶ和现场直播编导之一。
栏目组学习香港同时，要兼顾内地嘅尺度限制，比如主持嘉宾嘅衣着有所限制、只可以选择积极健康流行曲播放、直播时经常面对各种出错等。
由于节目内容同形式都不断丰富，主持风格亲切，《万紫千红》收视节节攀升，其中《朝见口晚见面》、《乐叔与虾仔》，就系最受欢迎嘅两档栏目。
▲《乐叔和虾仔》系上世纪华南地区影响最大嘅漫画，描绘改革开放之后广州社会、经济、市民生活嘅巨大变化，《万紫千红》将其改为漫画小品。
《万紫千红》嘅风头一时无两，根据当时抽样调查，97%嘅广州观众将《万紫千红》选为最喜爱电视节目，而《万紫千红》喺广西、海南等地都有粉丝。
▲《万紫千红》摄制组曾经去过桂林、日本福冈等地进行外景拍摄
1986年《万紫千红》举办首届“家庭音乐大赛”，将整个节目推向高潮。
大赛决赛当晚，啱好央视热播电视剧《阿信》播大结局，但《万紫千红》收视率依然高达95%。
▲第一届《家庭音乐大赛》获得冠军的家庭。
《万紫千红》被誉为“广东嘅造星摇篮”，喺节目中亮相嘅主持人、歌手、笑星，第二天即刻就成为热议话题，如唐彪、廖百威、黄俊英、卢海潮、杨达、何宝文、李丹红、任永全等。
《万紫千红》系当时国内最成功嘅综艺节目，令到广东电视台喺业内享有“中央二台”嘅美誉，并开创咗中国电视节目嘅新时代，令到其他省市电视台开始效仿，推出类似节目。
自此，电视综艺节目慢慢喺全国电视台遍地开花。
虽然曾经风光无限，但进入90年代后，《万紫千红》因缺乏创意而收视下滑，后来更被指出唔符合时代嘅发展，观众逐渐流失。
1995年，陪伴广东人15个春秋、播放超过一千期嘅《万紫千红》最终惜别电视荧屏。
▲《万紫千红》第一代主持人谭国治于去年逝世，终年73岁。
《万紫千红》，正如佢个名一样，曾经有过姹紫嫣红嘅岁月，最终都免不了经历黯然凋零。
但《万紫千红》15年嘅陪伴，同埋带畀观众嘅欢乐，永远存在喺每个老广嘅心中。
希望通过此文可以令更多后生仔女知道，广东曾经有档一度击败央视嘅综艺节目，叫《万紫千红》。
阿咩冇喺网上搵到相关视频资源，有资源嘅自己友唔介意就分享下！
素材出自南方都市报、大洋网等
羊城网负责整理编辑
最新评论