人生中，第一个帮你飞发嘅人，系边个？

我生命中嘅第一个理发师，就系我老窦。佢用个煲帮我剪头发，直接将我剪成咁↓

头发生返长之后，我打死唔肯再畀我老窦剪头发，终于换嚟咗人生第一次踏入飞发铺嘅机会，亦有咗人生第一次正常嘅理发体验。

那些年关于飞发嘅嘢，你仲记得几多？

依家嘅飞发铺，早就用“沙龙”“形象设计机构”等高大上嘅名，旧式飞发铺真系越嚟越少。

广州最早出现嘅高端美发店系一新美发厅，位于北京路附近，始建于20年代，一度系广州美发行业龙头，老一辈嘅人曾经以去“一新”理发而自豪。

平实简单嘅装修，毫无装饰嘅镜面，些许生锈嘅枱凳，老式嘅美发机器，系咪好似你我细个去过嘅旧飞发铺？

如果系更加陈旧嘅飞发铺，甚至会有可旋转变型嘅旧式理发椅，要弯腰冲水嘅洗头位。

除咗剪头发，老式飞发铺仲会提供剃鬚、线面、采耳、恤发、剪鼻毛等项目，有啲系我哋听到未听过，甚至已经消失咗。

喺老式飞发铺嘅顶峰时期，店内人头挤拥，客人要排队攞筹先可以剪发，一个飞发师傅一日要“斩七八百个头”。（斩头：理发，理发届行话）

优秀嘅飞发师傅甚至有专车接送，为客人提供上门服务，排场真系够晒大。

依家每次去发廊理发，我都会非常怀念以前屋企楼下嘅飞发师傅，因为人哋真系说话少、姿势正、价钱平。

以前去剪头发，问完我要求，飞发师傅二话不说就开始剪发，三两下手势搞掂。全程除咗讨论发型，仲可以闲话家常两句。

但依家，我一入发廊20分钟，就畀人问咗5次要唔要办卡……

以前洗头就5蚊，剪发10蚊（女生洗剪发都比较贵），电发廿几三十蚊左右，呢啲价钱依家简直唔咁想象。

亦难怪以前嘅客人都好长情，帮衬开一个飞发师傅，就认定呢间店嘅呢个师傅，有时候一家几代都揾佢飞发。

唔知大家有冇谂过，点解粤语中将理发叫“飞发”？

其实“飞发”等于“fit发”，上海俚语中将配备传动装置嘅小机械称为“飞”（借用英文单词“fit”），而理发师傅要用推剪理发，久而久之就讲成飞发。

既然飞发即Fit发，讲到底，我哋都系想搵个fit嘅发型师，剪一个fit自己嘅发型。

理发系每个人嘅“头”等大事，我哋都会认真对待。

从技术、机器层面嚟讲，老式飞发铺或者真系已经脱节，难以满足现代人对发型嘅追求，但佢嘅简单、实在、讲究，仲系值得好多现代发廊学习。

素材出自大众点评、知乎等

羊城网负责整理编辑