外地人成日以为广州人，每朝都饮茶、每日都好得闲、衣着随便但好有钱…对于呢个问题，最后澄清一次，广州真系有咁嘅人！

02

有啲老人家买份报纸去饮茶，成个朝早就霸住一张枱，净系叫个包、点笼烧卖，壶茶冲咗成朝，乜味都冇晒，谂住礼拜去饮餐晏茶都难。

03

最怕同啲老人家倾计，两句未倾埋，阿叔又讲返几十年前打仗啲威水史，阿婶又话以前下乡几咁辛苦……来来去去都系嗰三幅被，讲咁多次，唔厌嘎？

✎来来去去三幅被：来来去去都是说这些。

04

最唔理解嗰啲钟意养“鹩哥”嘅阿伯，成屋都系“鹩哥”，唔可以养第二种咩，吵冤巴闭。有啲阿伯又钟意收藏紫砂壶，成间屋都系紫砂壶，唔贵嘅都唔买，成千银一个茶壶仔，仲唔知真定假。

✎鹩哥：八哥

✎吵冤巴闭：形容十分吵闹。

05

屋企楼下嗰班阿叔阿婶，真系买佢哋怕。朝早《小苹果》，晚黑《帝女花》。做完健身操，跟住就交际舞！二胡横笛配乐，孙仔孙女助兴。想出年同个孙一齐上春晚咩。

✎买（某人）怕：指怕了某人。

06

太迷信！有咩事宁愿求神拜佛烧衣纸。又信埋啲开光保平安，条颈有个观音，只手又有串佛珠，银包里面都摆埋三四个平安符。

07

次次去亲旅游，一个景点影十几廿张相。群发全部亲戚群，下下都几十条信息，全部都系图片，流量唔使钱咩。

 08

仔女未有打算结婚，咪由得佢咯。成日都大锣大鼓搵人相睇。呢个都算喇，次次都系隔离村阿炳、村头阿强、隔离屋阿凤…

以上，都系广州退休老人嘅生活日常。或者你会觉得佢哋得闲冇事做，会觉得佢哋太多管闲事

正当我哋批判呢啲老人家嘅时候，有冇发觉，佢哋可能就系我哋嘅阿爸阿妈。

老人家之所以会用我哋理解唔到嘅方式消遣，其实系因为我哋都用敷衍去伤害老人家。

喺我哋返工嘅时候，佢哋落公园打牌，但我哋放工返屋企，就喺度打王者。

喺我哋返工嘅时候，佢哋去饮茶，但我哋周末放假，宁愿排队买喜茶。

老人家收埋一屋“无谓嘢”，但我哋都买咗好多模型公仔。

我哋怪老人家拜神迷信，但我哋都将Idol当神咁拜！

So，你仲好意思批判呢啲老人家吗？

你仲有借口唔陪阿爸阿妈饮茶吗？

P.S.可能你唔知，今个星期六就系重阳节。人人都话重阳节要敬老，不过，敬老唔应该拣时间！阿妈都唔会等儿童节先锡个仔啩。