卖完空气出刻字林，广东清远骑呢景区仲有乜做唔到？

近几年，有中国游客出外旅游，喺景区涂鸦留名，依种新闻大家都已经见怪不怪。

但係，阿咩估唔到，清远竟然有景区为迎合游客嘅兴趣，推出咗“刻字林”。

关注

清远推出游客刻字林

10月7日，广东清远金子山风景区特意为游客开设“刻字林”，将一片面积20多亩、拥有几千株毛竹竹海变成游客可随意“涂鸦”的地方，游客经过时可以根据自己的想法与意愿，在竹子上作画、刻字。“刻字林”开放两天，就有100多根竹子刻上了字。

广州日报讯

▲游客刻字嘅时候神情专注，专心“创作”

▲靓女，唔知仲以为你写紧高考作文

▲陈小薰知唔知，你将佢刻喺碌竹度……

从现场照片可以睇到，刻字内容五花八门，但大部分以示爱为主。

长期落去，几个月之后，阿咩估计，呢片竹林应该到处都系游客嘅“墨宝”“画作”。

阿咩仲记得，今年三月，我哋先报道过，呢个景区嘅村民向游客售卖空气嘅新闻。

▲当时嘅现场照片

▲呢个景区画风真系令人捉摸不透……

想重温嘅老友记click呢度↓

话你憨鸠惊你嬲：广东连山村民向游客兜售“空气”，居然有人买！

点解

中国人咁钟意喺景区涂鸦？

从几年前“闻名国际”嘅【未成年学生埃及神庙刻字事件】

到上个月【53岁老人周口店怪石山涂鸦事件】

我哋唔难睇出，有部分中国人出外旅游，总系钟意系景区留低啲痕迹。其中，中国人最钟意嘅景区涂鸦内容前三位分别系——

1.“XXX到此一游”（呢句简直系千古名句）

2.“XXX我爱你”，“XXX，爱你一生一世”等示爱词

3.“我们已经回不到过去了”等控诉抒情词

【以上排名毫无数据根据，完全凭直觉】

点解我哋咁钟意景区涂鸦，留低签名？阿咩觉得可以从以下几个方面搵原因。

我哋祖先遗传？

中国人钟意系景区涂鸦，可能要从古代讲起。

我哋嘅祖先钟意系各种名胜古迹题字留名，古代社会上层人士都咁做，民间百姓自然形成相似嘅风气。

或者讲，留名嘅思想早就深深融入我哋嘅基因同潜意识之中，我哋嘅行为其实系古人残留嘅习惯。

第一类代表

以秦始皇（秦始皇：又关我事？）为首嘅各类帝皇，无论巡视到边度，都要勒石载功、题字留名，以显示自己嘅才华和风尚，同时彰显帝王的威严和气派。

第二类代表

以李白白居易为首嘅诗人派，喺游山玩水嘅时候，一时诗性大发，开始吟诗作对，有时候写出得意之作，就可以传芳百世。

诗人嘅诗作留名通常都高逼格，同名胜古迹融为一体，为名胜增色，最终成为宝贵嘅文化遗产。

最后，不得不提，“到此一游”最犀非利推广大使——孙悟空。

人一世，物一世，想留低啲嘢？

出去旅游，见到浩瀚山川、潺潺江河，感受到自然嘅伟大同人类嘅渺小，我哋总容易触景生情，而想留低自己嚟过嘅痕迹，正所谓“雁过留声，人过留名”，无论我哋系咩阶级、咩身份，总希望自己可以为后人留低哋乜嘢。

我想得到啲嘢？

从心理学嚟讲，景区涂鸦可能出于心理宣泄，人希望通过题字留名嚟临时性宣示自己嘅“所有权”，从而得到一种自我满足，比如有啲自卑嘅人希望以此嚟得到他人嘅关注。

人哋咁做，我又咁做？

有一个人喺景区涂鸦，冇受到任何责罚，就会有其他人跟住模仿，其实系从众心理喺度作怪，反正大家都觉得，人哋咁做，我咪咁做咯，反正有冇咩嘢。最后，国人心理越嚟越肆无忌惮，景区涂鸦现象就越嚟越严重。

其实，系素质与教育嘅缺失

呢度所指嘅教育，包括家庭、学校、社会三方面嘅教育，如今学校教育重视知识传播，但轻视德育培养，加上从小家长嘅纵容、社会缺乏正确引导，有部分人无养成良好嘅习惯同正确嘅价值观，依个先系造成涂鸦现象屡禁不止嘅最根本原因。

咩话

对于“刻字林”嘅睇法。阿咩只可以用四个字形容——无法理解，“刻字林”嘅存在只系指标唔治本，并唔可以真正解决问题。

同埋，阿咩想问：

1.“刻字林”嘅存在，系咪间接承认景区涂鸦呢种行为系可以允许，鼓励游客破坏自然，继续涂鸦？

2.某一日呢个“刻字林”畀人写满晒，咁系咪要继续规划第二第三个“刻字林”嚟满足游客？

各位自己友，

你哋又点睇呢个“刻字林”？

欢迎喺留言区留低你嘅意见

素材综合自广州日报、网易旅游等

羊城网负责整理、编辑