作家黄易嘅离世，令到好多人感到惋惜，事实上，唔少人知道黄易，都系因为TVB翻拍过黄易嘅经典作品《寻秦记》、《大唐双龙传》同《覆雨翻云》。

早年，TVB有唔少经典嘅翻拍剧，当时TVB仲有一班金牌编剧坐镇，翻拍剧喺尊重原著小说剧情嘅时候，进行咗恰当嘅改编，加上演员选择贴合角色，服化道用心，令到早年TVB嘅翻拍剧都具有较高质量。

▲例如，电视剧《大唐双龙传》中编剧将师妃暄与石青璇同化为一人

最近我都重温咗一部TVB嘅翻拍剧，剧情虽然冇偏离主线，但系就被编剧大刀阔斧改咗好多。

如果原作者返生，睇到剧情之后肯定会沉默，但系睇完全部剧之后肯定会笑到停唔到。

我讲嘅就系TVB96版《西游记》。

好多人细个第一个接触嘅《西游记》，会系大陆翻拍嘅86版《西游记》，但系对于我嚟讲，TVB96版《西游记》先系我嘅童年回忆。

如果只可以用一个词形容96版《西游记》，我会用两个字——

好玩！

首先，人物好玩

原著中，唐僧四师徒嘅性格已经各有特色，照单翻拍肯定冇错，但系就冇咩出彩之处。而96版就向我哋展示咗唐僧四师徒嘅另一种打开方式。

张卫健饰演嘅孙悟空，比起原著，多咗几分精灵可爱、调皮轻佻。

佢个句“呦！XXX，使乜惊啊！”成为咗我哋追剧细路仔嘅口头禅。

黎耀祥嘅猪八戒，继承咗原著之中，肥头大耳、好食懒飞嘅性格，但系又多愁善感，成日扮靓仔，吟诗沟女。

麦包嘅沙僧虽然傻下傻下，冇咩太大作用，但系佢胜在憨居得嚟又几可爱。

江华嘅唐僧，斯文有礼、正义凛然，经常讲大条道理，但并非高高在上，反而非常接地气，经常畀一班徒弟仔玩。

我谂世界上，再都冇一个组合，可以畀呢个更搞笑、更得意。

其次，剧情好玩

吴承恩点都估唔到，自己小说剧情竟然会改到咁好玩。

孙悟空、牛魔王、铁扇公主从细相识，学堂同学，牛魔王同铁扇公主早恋而诞下红孩儿。红孩儿章节嘅故事，变成正宫斗小三、关爱单亲家庭儿童嘅家庭伦理连续剧。

猪八戒违反天条而被贬下凡，历经千世情节，连续做过痴情乞衣、痴情书生、痴情将军、痴情、痴情奸夫……每次临死前都要吟一句佢首本名诗——

我都可以第一反应接下一句——“此恨绵绵无绝期！”（其实正确嘅下半句应该系“好梦由来最易醒”）

而蜘蛛精不停捉男人嘅原因，并唔系为咗吸阳气，而系为咗寻找自己的千世情人，最后发现情人转世为百毒之王嘅蜈蚣精，惹来一场祸事。

▲呢段曾经系我嘅童年阴影

其实都系因为拍得好玩

可以将《西游记》改得咁盏鬼得意，除咗因为编剧功力，仲有演员嘅努力。

喺后来嘅采访中，黎耀祥曾经透露过，由于《西游记》系组合形式嘅戏剧，所以喺现有嘅剧本之上，几个演员会再谂唔同嘅桥，加入表演之中，丰富剧情同人物。

一开始，大家仲会比较陌生，到后来就会有咗默契，拍摄过程变得非常好玩。

比如麦包曾经讲过，张卫健拍摄嘅时候经常自己改对白，有时时间紧迫，并冇预先排练，要演员自己执生。

为咗随机应变，大家就自创一啲万能回复套路。

张卫健改台词，令到对方冇办法接嘅时候， 唐僧会讲一声“悟空”，然后叹一口气，就走咗去。

猪八戒就会非常串咁讲——“大师兄，唔好搞我，唔好玩我……”

最后剩返沙僧，麦包就唯有诈傻扮懵咁问——“大师兄，我唔明你讲咩……”

正正就系因为佢哋拍得咁过瘾，作为观众嘅我哋先睇得咁过瘾。

最后送啲好玩嘅嘢畀你哋

私家珍藏《西游记》表情包，

童叟无欺，绝无花假。

我哋建咗个【自己友睇片】群，同你一样追港片港剧嘅自己友喺群度等你。

长按识别二维码加羊城网 小沅子微信，备注【追剧】，等佢拉你入群喇！

P.S 想睇96版《西游记》，优酷就有粤语版

本文由羊城网原创，未经授权禁止转载。