广州嘅冬天姗姗来迟，但系夏天肯定准时甚至提早到！

依家嘅天气虽然未算热到飞起，但系“想落雨又落唔出”嘅种闷热，同样恶顶！空调同“雨神大人”就系我哋嘅救星！

咁大家有冇谂过，二三十年前嘅广州人，又冇空调、又冇“雨神”，佢哋究竟系点样捱过夏天嘎？

 瞓竹席 

竹席，从旧时到依家，都系夏天唔可以缺少嘅物品。以前冇空调，阿爸阿妈最钟意喺竹席上面洒啲水，跟住全家人一齐喺竹席上面玩，玩攰咗就直接喺上面瞓，一夜好梦。

 食西瓜 

冰冻西瓜用嚟消暑，真系一流！不过以前唔系人人都有冰箱。冇冰箱雪？咁西瓜点先会冰凉呢？旧时嘅人，会将西瓜用麻绳扎住，吊入井水里面，过一晚，西瓜就好似放喺冰箱里面咁冰凉！

 抱冬瓜 

以前空调好少，夏天热瞓唔着，阿妈就会洗干净个冬瓜，畀我揽住嚟瞓。

 大葵扇 

除咗冬瓜、竹席之外，葵扇都系夏天必备物品！一到夏天，隔离邻舍都会担张竹凳出屋外面，排排坐，吹下凉风，再攞起把大葵扇扇风，倾下偈，就咁过一日。

 防空洞 

听老窦讲，佢以前屋企附近有嘅防空洞，细路仔会成群结队一齐入防空洞里面玩冒险。而大人就钟意喺防空洞门口坐，特别凉爽。

 饮冰水 

细个冇钱出街饮汽水，就唯有喺屋企冰箱雪一支冰冻嘅开水，雪一晚，第二日饮，透心凉！不过阿妈话饮冰水容易屙肚，所以好少饮…

 食雪条 

‍

以前屋企楼下嗰间士多仔，夏天雪糕雪条成日卖断货！以前雪糕冇依家品种咁多，价钱都唔贵，5毫纸就有一条，1蚊1条嗰种已经系奢侈了！水果味雪条、五羊红绿豆批、蛋奶批、红绿灯……好多都已经“绝种”啦。

 落河玩 

细个嗰时，啲河仲好清好干净，夏天经常会同朋友仔去河边玩水，又可以捉虾、捉鱼，不知几开心。

 食绿豆沙 

知道今时今日，绿豆沙依然系解暑“极品”！小学嗰时一个星期一次体育课，太阳好猛好热，上完体育课，人都会黑啲，阿妈见到我黑咗，就会即刻入厨房煲绿豆沙！

转下眼，已经大个了。

依家嘅夏天依然好热，但系屋企有风扇、有空调，冰箱里面有汽水、有雪糕……不过，就算有咁多解暑嘅嘢，但系我硬系觉得争紧啲嘢！

如果叫依家啲细路，揽住个冬瓜瞓一晚，佢会点呢？