今日，我哋又畀广东天气教做人，

因为，佢又一夜入冬！

▲琴日同今日嘅温度对比图

全国再冇一个地方嘅天气，

可以好似广东咁黐线又无耻，

大家可以生存到依家睇到呢篇推文，

就已经非常之唔容易！

阿咩以前就曾经痛诉过

广东天气系点样压迫我哋

今次，阿咩决定将行动升级，

推出广东穿衣指南！

Q:我哋去买秋装咯！

A:错！喺广东根本唔需要春装同秋装！

广东，

一个全年3/4夏天、1/4冬天嘅省份，

所谓嘅秋装同春装，

根本就冇存在嘅必要。

买咗春装秋装返去，

等几个月都着唔到，

然后着一两个星期，

就一夜入冬或者一日入夏

知唔知点解双十一广东人消费最多？

因为我哋过冬除咗要买冬装，

仲要买夏装啊！

所以喺广东，只需要做好两手准备，

小心中暑，同小心冻亲！

Q:今日天气咁好，唔使带遮啦！

A：错！出门永远多带把遮

你永远估唔到你女朋友谂乜，

同样，你都永远估唔到广东下一秒嘅天气

上午阳光灿烂，风光明媚，

下午就狂风暴雨，问你死未！

出门都系多带把遮，

绝对唔好轻易尝试去同个天赌，

最后都系输得一败涂地。

Q：天气咁冻，着返件樽领

A：错！樽领系广东嘅禁区

喺广东就算入冬，

有两样嘢唔好轻易尝试，

樽领、雪地靴

广东冬天昼夜温差可以去到十度，

晚上同中午完全系两个世界！

早上着樽领、雪地靴，仲觉得无所谓

中午即刻可以热到出热痱！

Q：咁夏天有咩着衫秘籍

A：冇啊！根本唔存在呢样嘢……

因为喺广东，

夏天无论着咩都会出汗，

就算就咁坐喺度，

就依然会出汗！

广东人夏天脱离空调，

基本上等于自杀！

Q：喺广东，

广告同天气预报边个可信啲？

A：我选广告

广东天气预报，又名

广东天气经常唔准嘅冇len用预报

广东一年四季，系随机播放！

根本唔存在可预知性！

天气预报话听日有冷空气，

但系第二日仲可以热到阿妈都唔认得

天气预报话下午会落雨，

结果全日风都冇阵，何况雨！

天气预报话台风即将来袭，

做好防护措施，

跟住台风直接就转移咗路线，

眼未都冇睄下我哋

千祈唔好轻易相信天气预报，

以为转冻就着晒啲冷衫同大褛

收埋啲短袖短裤，

我哋尊重每一次嘅冷空气，

但系都要做好二手准备。

Q：一条街，点解四季嘅衫都有人着？

A：少见多怪！

喺广东，

总会有几日，喺同一条街，

你可以见到有人着羽绒，

有人仲着紧短裤

而且，双方都会觉得彼此系憨鸠！

每个人耐冻能力唔同，

大家都系选择适合自己嘅衫啦！

Q：广东穿衣，咩最实用？

A：披肩同Tee

讲咗咁多，

喺广东买咩衫最实际？

第一样系披肩，

室外可以当围巾，

室内可以做披肩，

一年有一半时间都可以用。

第二样系Tee

四季皆宜，出门必备，

可以内搭，可以外着。

讲到Tee，点可以唔提

【自己友Tee】

睇到呢度，你系咪发现，

以上指南，纯属鸠噏！

（冇错，就系咁！）

喺广东，依然系冻死嘅冻死，热死嘅热死，

日日都面临住会畀广东天气教做人！

唔知各位自己友听日着乜衫？

听讲听日最冻得返7°C，

大家都系各自珍重啦！

图片素材出自网络

羊城网负责整理编辑