摘要：阿妈，不如你都系带我去睇医生啦！
炎炎夏日，冇空调真系会出人命！
但喺空调房踎得耐，一出门，
冷热交替，好容易就感冒！
鼻塞、鼻水、咳嗽…
又唔想排队睇医生？
「广东阿妈祖传秘方」一定帮到你！
姜葱蒜水
姜、葱、蒜切碎（切片亦可，但效果稍差），加水煮一个钟左右，一日饮两次。
只要唔介意味道奇怪，效果确实唔错！
姜葱豆豉水
姜、葱、豆豉，加水煮滚后，细火煮5-10分钟，瞓觉前趁热饮。
味道嘛…闻落唔错，似豉汁蒸排骨，饮落就似豉油沟水…阿妈话食埋啲渣效果仲好，不过食亲都想呕！
蒜汁滴鼻
蒜头去皮，捣烂取汁，鼻塞滴两三滴，滴完即通！
滴完之后，你将会获得前所未有咁清晰嘅“嗅觉”！
薄荷粥
新鲜薄荷叶切碎捣烂取汁，煲好白粥之后加薄荷汁，如果想味道好啲，可以加些少糖。
对治疗感冒都有唔错嘅效果，而且味道仲几好！推荐！
冰糖鸡蛋
生鸡蛋、冰糖混合，加适量热水至冰糖融化、鸡蛋煮熟，瞓觉之前饮（食）。
部分人可能觉得口感恶心，慎试！
盐蒸橙
切开橙顶，加盐，最好用刀稍微切开橙肉，利于盐份渗入，隔水蒸10分钟。
食完橙肉，阿妈仲会叫我切开橙皮冲水饮…顶，以为系咸柑橘咩！
生蒜净食
蒜头去皮，丢入口搏命噍；或者含住蒜头，分泌口水之后，吞掉口水。
一日一蒜头，感冒唔浦头！不过朋友都掉头走！
洋葱敷脚底
瞓觉前将洋葱切片，敷喺脚底涌泉穴位置，用袜或纱布固定，一觉醒来，感冒症状都会减轻！
瞓觉可能唔会太舒服…
白酒搽身（刮痧）
用硬币沾白酒，轻刮前后胸、曲池及下肢曲窝处，直至皮肤发红发热，过15分钟左右，发热出汗，感冒症状都会减轻。
阿妈未玩过呢个，而且都有一定危险性，请勿随意尝试。
蒜泥蜂蜜水
蒜泥同蜂蜜等量混合，温开水冲开，一日4-6次，对感冒十分有效！
效果唔错，味道都唔错，值得推介！
PS：偏方始终系偏方，大家一定要小心谨慎！
有咩头晕身㷫，都系睇医生稳阵啲！
听讲，每个阿妈都会有「独门感冒药」！
你阿妈会用咩“药”帮你医感冒？
分享出嚟等大家学下嘢啦
最新评论