有人话，今年系TVB剧集嘅复苏之年，因为出现咗唔少题材新颖、质量唔错嘅惊喜剧集，令人觉得港剧有望重回当年嘅辉煌。
咁快又到年尾，下星期就举行台庆，大家心目中嘅视帝视后人选系边个？最佳剧集又系边部？
▲TVB2016剧集评分对比图
等我做个年终盘点，带大家回顾下2016年TVB嘅剧集。
**本文仅针对2016期间于翡翠台或高清翡翠台播出嘅长剧集进行讨论，不包括单元剧或其他频道播放嘅剧集，
**而《致命复活》未播完，《流氓皇帝》下星期先开播，暂时唔纳入讨论范围！
公公出宫
三个性格各异嘅真公公，同一个假扮公公嘅骗子阴差阳错去到一个阴盛阳衰嘅女权村落，重新生活并拍拖结婚嘅故事。
咩话：
新年期间最好睇嘅剧，个人觉得好睇过前作《大太监》（虽然两部剧剧情冇乜关系），黎耀祥、陈国邦、曹永廉三个加埋百几岁嘅大男人扮起乸型竟然冇违和感，令阿咩上瘾咁一追再追，而且对白过瘾又得意。
女性主角都塑造得好出彩，胡定欣、林夏薇、王君馨都演技在线，值得一睇！
EU超时任务
一个女警喺查案嗰阵死咗老窦，然后发现自己可以穿越时空，佢一次次回到过去，希望可以改变未来，除咗一次次经历死老窦，佢仲慢慢发现案件背后嘅真相同阴谋。
咩话：
有段时间刷屏刷到非常犀利嘅一部剧，算系近几年最好睇、剧情比较出人意料嘅TVB神剧，千祈唔好睇剧透，唔好觉得中间无聊就弃剧，最后几集真系好精彩！
王浩信贡献最令人印象深刻嘅角色，演技大爆发，依家嘅王浩信完全可以独挑大梁，担纲男主！
僵
七个明朝锦衣卫同僵尸战斗嘅时候，畀雷劈死…啊唔系，畀雷劈成“不死人”，然后同僵尸打咗几百年，其中一个不死人后来爱上咗只僵尸，发生咗一段“唔知噏乜春”嘅狗血爱情故事。
咩话：
乱七八糟，充满漏洞嘅剧情，五毫子都畀多嘅特效，莫名其妙嘅剪辑，仲有，谢安琪唔该你畀心机唱歌，畀心机同张继聪生仔，得闲都唔好出嚟拍戏啦！不过谢安琪演技都可以完爆陈港姐！
成出剧唯一嘅亮点都系陈嘉宝饰演嘅小师妹！唔系为咗小师妹，阿咩会追落去，憨鸠！
一直有个问题想问，讲到明嘅七个不死人，先出嚟五个，剩返两个呢？去咗度假啊？
火线下的江湖大佬
古惑仔退下火线，沟咗以前大佬条女，回归平凡生活，从揸刀变揸镬铲。结果自己以前嘅大佬突然出狱，想东山再起，食大茶饭，古惑仔一家嘅生活不再平静。
咩话：
阿咩见到陈炜同郑则仕系一对夫妻，竟然唔觉得违和，可见两个人演技之好，其他老戏骨如阮琼丹、黃光亮、李成昌更加唔使讲，可惜剧情太TVB，有啲普通，浪费咗一众演员！
而岑丽香喺呢部戏入边，演技虽然仲有进步空间，但系比起之前任何一部戏都要好，大小姐一角好可爱，阿咩对岑丽香好感骤加！
纯熟意外
一个廿几岁妹妹中意咗个大叔，表白之后发现个大叔系自己老窦，仲要喺个活咗几百年嘅人……
咩话：
如果本年度有一个奖项评选套路玩得最好嘅电视剧，阿咩肯定投票畀佢，28集电视剧，两个人暧昧咗十几集，终于阿咩都接受咗呢对忘年恋，然后真相竟然系天下有情人终成父女！！！
当时就想约个编剧出嚟畅谈人生，呢个女主真系TVB史上最惨女主角，冇之一！！！（其实作为一只单身狗，睇完觉得几开心！）
一屋老友记
记录咗住喺香港老唐楼嘅宝生一家嘅日常生活以及撞鬼故事。
咩话：
被誉为今年最好嘅港剧，TVB嘅救市之作，情节设定都系令人熟悉嘅港剧味道，令人回想起十几年前嘅市井题材嘅港剧。题材涉及鬼魂，但系一啲都唔恐怖，反而透出种种温情。
入边有好多港剧熟悉嘅套路，好多时候都已经估到跟住嘅剧情点发展，但系就系令人忍唔住睇落去！
最老土最温情嘅套路，往往观众最受落！
城寨英雄
男一男二嘅老窦全部死于非命，搞到九龙城寨冇人管治，黄赌毒横行。多年之后，男一重回城寨，同男二联手整理城寨，打败恶势力，期间顺便大家拍个拖！
咩话：
阿咩当时一集都唔断咁追晒，简直系TVB今年最大嘅惊喜同良心剧，剧情有创意，大小角色塑造得好出彩，故事剧情热血，打斗场面拳拳到肉，完全演员上阵实打，阿咩心目中嘅台庆最佳剧集！
阿咩觉得前十几集最好睇，完全唔会令人想快进，可惜中途开始剧情乏力，又系一堆TVB嘅套路，感觉有烂尾！不过，真系非常好睇，睇完之后陈展鹏成为我男神！
鑫鑫被强奸之后，胡定欣嘅爆发打戏重睇咗好几次，王君馨嘅打戏都唔错，王君馨死嗰集，简直系想劈死个编剧！
律政强人
讲述咗一间律师楼啲律师，冇乜见佢哋上庭打官司，反而日日喺度明争暗斗、争权逐利嘅故事。
咩话：
一开始，阿咩以为佢系一部律政剧，后来先发现，佢其实系一部宫斗剧……
上庭啲戏加埋都冇两集，啲主角日日就系度唔系吵交开片，就系猜疑算计，阿咩真系觉得有啲无语，唔系话香港系个法治社会咩……
评分主要系靠廖启智同方中信撑起，佢哋两个嘅对手戏都几好睇，至于女主李佳芯，都系去做返奸角啦……
来自喵喵星的你
劣质翻版《鬼同你OT》，故事改为一个喵星人嚟到地球，帮助自己曾经嘅主人，同地球人发生各种瓜葛。
咩话：
典型嘅换汤唔换药，仲要明明一样嘅配方，拍出咗一部烂片，剧情漏洞都算，感觉好多场景都怕得好敷衍，一桥二用唔系咁噶！
成部戏话搞笑唔搞笑，话科幻唔科幻，一集40分钟，尴尬5分钟，剩低35分钟快进。完全唔值得睇，睇咗几集就弃剧啦！（突然发现，今年陈豪出演嘅喜剧，都扑晒街~）
幕后玩家
3个性格各异嘅PR仔从并肩作战嘅好兄弟，变到反目成仇嘅故事，男主为求上位不择手段，众叛亲离，今晚大家一于睇下丧心病狂、毫无人性嘅世纪贱男秦升海会有咩结局？
咩话：
TVB首部关于公关题材嘅戏，系描写公关行业背后嘅心酸同各人故事之外，同时穿插咗人性嘅思考。
每个角色都系活生生嘅社会人，善恶交集，你可能讨厌一个角色，但系你冇办法挑出角色嘅人设唔合理，因为社会上真系有咁嘅人存在，而且成出戏金句频出，几场冲突戏都好好睇，年末最大惊喜嘅港剧。
最钟意反面之前三兄弟嘅日常吐槽互怼嘅戏份，真系好搞笑！秦升海系目前黄宗泽演过最黑暗嘅角色，差啲对黄宗泽脱粉！
以上就系阿咩对本年度最深印象嘅几部戏嘅睇法，仲有其他剧集，就挑选部分嚟简单讲下，睇下边——
其他剧集
《潮流教主》
海报抄袭杂志、造型抄袭老佛爷（卡尔·拉格斐）、剧情设定抄袭日剧，仲要抄得非常山寨同廉价！
《爱情食物链》
剧情一般，小仪配陈智燊，金刚配高海宁，只要你觉得画面可以接受，就可以去睇！
《巨轮2》
评分可以从第一部嘅7.8去到第二部嘅5.5，质量直线跳水，已经冇咗第一部嘅时代感，反而成为狗血大杂烩。
（同埋，究竟冲绳畀咗几多钱你哋打广告，仲有《僵》都拍到成部新西兰旅游节目咁！）
《完美叛侣》
前半部分会平淡拖沓，可能睇唔落去，不过后边开始好睇，会引起对夫妻、家庭嘅反思，会觉得入边嘅角色多少有啲自己嘅影子。
（邵美琪最近主演嘅电视剧都唔错，比如《刀下留人》。）
《爱·回家之八时入席》
阿咩冇追，所以就唔写个人评价啦，评分同口碑都唔错，应该可以睇下。
《警犬巴打》
剧情一般，不过演员表演真系几搞笑，不功不过，如果你同阿咩一样，想睇黄宗泽同钟嘉欣终于HE，不妨睇下呢部解闷，仲有，巴打真系超可爱！
《铁马战车》
男女主角都系TVB嘅长年绿叶，剧情唔错，袁伟豪个无赖样超抵死，男女主角嘅爱情线几甜蜜，值得一睇！
（提示：建议跳过蔡港姐嘅戏份！）
今年嘅TVB同往年唔同，多咗好多可以追、值得追、想去追嘅好剧，剧本质量有所提高，TVB都唔会盲目捧杀新人，开始畀机会一众曾经嘅绿叶演员挑起大梁，加上请返啲老戏骨一齐拍戏，TVB剧集往好嘅方面发展。
不过呢啲好剧之中，有唔少存在住问题，比如故事线混乱，乱剪辑造成剧情莫名其妙、过半之后剧情后继乏力、TVB嘅常用套路泛滥等。
以上问题系人才凋零、市场环境唔好、内部争斗等原因共同造成，说明TVB剧集离真正嘅复活，仲有好长一条路要行，特别系国产剧、韩剧、日剧、美剧重重夹攻下，TVB嘅路一啲都唔好行。
无论点，阿咩都会继续追TVB剧，陪住佢行落去，期待来年TVB有更多好剧啦！
*本文仅代表个人意见，毕竟睇剧呢家嘢，自己钟意嘅话，得3分都觉得好睇！一出剧就好似榴莲咁，有人觉得香，都一定有人觉得臭…..
我知道对于某啲胶剧，胶演员，
好多自己友都想用力吐槽！
唔紧要，阿咩江湖人称
“知心宝宝小公主”
即管搵我吐槽！
不过如果你要吐槽黄宗泽，
唔该等我睇埋今晚《幕后玩家》大结局先！
本文由羊城网原创
特此声明
最新评论