今日喺屋企Hea，朝早睇电视发现TVB播紧《妖精的尾巴》！虽然已经睇过，但系喺电视睇，而且系粤语配音，真系觉得好睇过原版！

广东人，尤其系80后、90后都肯定睇粤语配音嘅动画片！TVB、亚视（未执之前）每日都会播最当红嘅日漫，试问边有细路抵挡得住？

我相信，呢啲动画片再播多次，我哋都一定会再追多次！

@蓝天白云放飞心灵：小学唔记得三年级定四年级，4点一放学，我就即刻飞奔返屋企，4点半准时播《棋灵王》，睇完啱好5点，阿妈返屋企，即刻关电视扮做作业！

@爱zwd：我细个最钟意《小魔女 DO RE MI》，睇到上晒瘾！阿爸为咗唔畀我睇，又打又闹……真系唔明我阿爸，点解唔畀我睇呢？我爸话：男仔睇呢啲会变乸型。

@週週先生：细个因为睇咗《百变小樱》，我成日趁屋企冇人嗰时，“骑”住把扫把扮小樱…都试过揸住个镬铲扮小狼…不堪回首！

@少爺恩：《咕噜咕噜魔法阵》个猥琐老坑成日条嗰只舞，曾经系我小学五年级嘅“班舞”！

@薯仔：睇完《踢出我天地》，我简直觉得自己系一个“足球天才”！用报纸、透明胶整咗个“足球”喺屋企“练波”，唔小心一个拉西拉爆咗老窦最钟意嗰支酒，老窦打咗我两个几钟冇停过手！

@陈慧敏YUKI：老实话你知，睇《数码暴龙》我喊过两次，第一次系天使兽打赢恶魔兽，变返数码蛋；第二次系大结局，离开数码世界，美美顶帽飞走嗰下……

@woyi007：以前我成日都觉得，我同《全职猎人》里面嘅希索加（西索）一样，又劲又变态。但现实系…我只系得“变态”……

@嗯哼巧虎：最心痛嘅系，当初《海贼王》系亚视播，如果系TVB播嘅话，配音、收视都一定会好过亚视多多声！都依家都无法忘记，路飞一个靓仔，亚视居然配咗把麻甩佬声……

@爱古天天乐：如果我喺电视睇过《金田一》同《热斗小马》，有冇人估到我今年几岁？

@非洲超人：有一次数学课，老师点我起身答问题，我唔知黐咗边条筋，同老师讲：既然你诚心诚意咁问，我就大发慈悲话你知（《宠物小精灵》火箭兵团出场台词）……跟住…老师就叫咗我老窦嚟学校…

@众人皆白我独墨：播《爆旋陀螺》嗰时，全世界都好兴玩爆旋陀螺，两个人对战，陀螺发射之后，我哋两个人都会“化身成为圣兽”（包括神态、动作…例如，朱雀，金鸡独立…）丢，呢啲记忆点解忘记唔到，好丢架！

@Perfectmylife：睇《浪客剑心》最大嘅感悟：就算你手上有架生，你都唔好学拔刀斋。因为你摆pose嗰阵，对方已经打到你仆街！

@无穷君：睇咁多动画片，我一直以为用手掌劈对方后脑一嘢就可以致晕。直到我实战嘅时候，我先发觉原来呢招系激嬲对方致我自己晕。

@茗茗特别烦：以前一班朋友仔睇《变形金刚》，想学狂派个建造派合体，最尾搞唔成，因为冇人想做垫底嗰两个on9仔。

@黒礁：我曾经用“天马流星拳”打咗我班个肥仔两百几下，点知道佢一招就收我皮。我企起身咪埋只眼启动第七感，想爆发小宇宙，之后就入咗校医室。

@faye：我一直觉得自己系《足球小将》嗰个小志强，单人匹马杀去对方禁区，将对手一个个撞到飞开晒。点知同同学踢波，次次都系我畀人撞飞…

@glance_back：三年级嗰时，趁屋企冇人，扮美少女战士变身，点知我细妹原来喺屋企，睇到全过程，仲问我：“哥，你做咩啊…”回想起都想杀咗我妹灭口！

@黄开心hahe：自从睇咗《中华小当家》，我爱上咗厨房，但系我唔煮餸，我只系研究点样可以将啲菜切到飞起身，仲识发光！

@寒冰剑：有段时间TVB半夜会播《钢之炼金术师》，所以嗰时我冇做作业，都会同老师讲：“等价交换，我冇做作业，你就罚我做多啲咯！”但势估唔到，老师都系钢炼迷：“自大之人，要畀你适当嘅绝望，你先会知道咩系真理！”于是…见家长……

睇TVB大嘅自己友，

边出动画片最深刻？

系《数码暴龙》嘅主题曲？

定系火箭兵团嘅出场白？

快啲留言话畀我知！