相信大家都知道，我哋今日痛失一名金牌绿叶演员，资深演员鲁芬因皮肌炎导致肺部衰竭，今日凌晨安详离世，终年63岁。
今年新年，鲁芬仲喺FB发新年祝福，但世事无常，如今上天突然夺走佢，令我哋痛失一位好演员。
喺香港电影盛行时期，周星驰、王晶等喜剧电影塑造出无数经典“丑女”角色，呢啲角色凭借夸张嘅台词同骑呢嘅造型，固然为电影增色不少，为观众留低深刻嘅印象。
但同时，呢啲“丑女”角色都令到背后嘅女演员定型，从此只可以喺丑角嘅路上越行越远。鲁芬系其中一个，但绝对唔系唯一嘅一个。
今日，我哋就嚟盘点下包括鲁芬在内，五大深入民心嘅“丑女”演员。
彪悍型“丑女”：鲁芬
鲁芬20岁嗰阵，跟住契爷董彪入行，由于身形高大魁梧，好多时候接嘅角色唔系要女扮男装，就系丑女，后来由于扮演《女子监狱》中与DODO姐互殴嘅「山东婆」，开启恶女嘅戏路。
凭借夸张嘅表演同突出嘅外形，鲁芬出演咗好多深入民心嘅“丑女”“恶女”角色，其中最为经典就系《九品芝麻官》嘅「烈火奶奶」同埋《整蛊专家》嘅「大白鲨」。
鲁芬其貌不扬，但系工作拍戏都非常敬业，只会做多，唔会做少。
有媒体报道，鲁芬2015年喺拍摄电影《吉星高照》嘅时候，依然顶住高温，全身包到冚且戴假发做戏，直到导演嗌cut先除假发散热。
虽然鲁芬出演嘅角色多数系彪悍嘅恶女，但鲁芬本人私底下就非常玩得，最近几年会去动漫节大玩COSPLAY，在场观众都会拍烂手掌。
畀人问知唔知边个系减肥女王郑多燕，佢会机智咁回应——
2012年到2015年，60几岁嘅鲁芬一直入围“宅男女神”榜前20名，连续4年受封“宅男女神”称号，仲系2015年嘅投票中杀入五强。
虽然投票可能有戏谑成分，但不可否认，鲁芬喺网友同观众心目中，有好高嘅评价。
愁苦型“丑女”：余慕莲
香港丑角界嘅经典名言：“男有八两金，女有余慕莲。”
余慕莲就系香港著名嘅绿叶演员，23岁嘅时候，喺电视剧《七十三》之中扮演卖鱼胜个妹，之后就一直出演丑妇角色，冇办法跳脱角色定位。
曾经有人对女性评头论足嘅时候，都会用“丑过余慕莲”嚟比喻，不过余慕莲本人已经睇开咗，反正大家唔钟意睇佢扮靓，不如用自己嘅“丑”嚟博他人一笑。
点解要一再出演丑角？
余慕莲自己咁解释——“除咗我之外，冇演员肯出演呢啲角色，为咗搵食，都系要做嗰啦。”
就算系出演丑角，都唔代表余慕莲拍戏就好容易，佢曾经因为达唔到搭戏演员嘅诸多要求，而畀人闹到大喊，又曾经高烧赶戏而受到导演嘅面色。
2008年，余慕莲成为TVB节目《向世界出发》嘅嘉宾，节目播出之后，观众先知道，原来余慕莲私底下曾经捐钱，喺贵州山区建咗一间“余慕莲希望小学”，帮助贫困山区嘅儿童，同时弥补当年自己放弃学业嘅遗憾。
“丑女”角色或者成为余慕莲一生嘅标签，但系佢内心嘅善良、无私一样会为人所知，为人所记得。
搞怪型“丑女”：苑琼丹
苑琼丹饰演嘅石榴姐，绝对系星爷电影中最出色嘅配角之一。
苑琼丹其实84年就出道，不过一直知名度好低，直到参演《逃学威龙》一炮而红。
然后苑琼丹同星爷一齐合作几部电影，凭借石榴姐、老鸨角色奠定咗佢系观众心目中嘅地位。
不过讲到我最钟意嘅角色，反而苑琼丹喺《男亲女爱》入边嘅表姑梅日仙，畀咗苑琼丹好大嘅发挥空间，真系展现出佢喜剧才华。
黄子华喺剧入边虚拟嘅女忧「苑琼丹子」，亦都成为苑琼丹嘅外号之一。
除咗成功塑造出经典喜剧角色，大家经常提起嘅就系佢同僵尸道长林正英嘅爱情故事都令人心酸。
林正英与苑琼丹本来相爱，但林正英得病，不想拖累苑琼丹而选择离开，知道真相嘅苑琼丹久久难以释怀，一度换上躁狂症。
不过后来苑琼丹走出病魔嘅折磨，亦都遇上自己嘅丈夫黄乃扬，并于2009年注册结婚。
旧年港剧《火线下的江湖大佬》之中，苑琼丹再度与郑则士合作，佢出演嘅Miu姐妙语连珠，金句频出，真系令人不得不感叹苑琼丹宝刀未老。
泼辣型“丑女”：马蹄露
马蹄露，原名梁颖颜，因为参加新秀歌唱大赛而出道。
初期出任电台DJ，主持晚间交通节目《马蹄露天使》，因而得到宜家嘅艺名，虽然马蹄露人未必好靓，但声的确够甜。
马蹄露出演嘅丑角多数系自私自利、刻薄泼辣，佢凭借《真情》之中饰演嘅刁蛮大小姐归亚美，获得第一届台庆颁奖礼嘅“我最厌恶角色奖”。
一路以嚟，马蹄露陆续出演唔同嘅丑角奸角，有时候导演一个电话过嚟，话有个丑角冇人肯演，佢就顶上。
一直接拍呢啲角色，受到其他人对佢样貌嘅评价，令到马蹄露都谂通睇透，早就唔介意畀人讲丑，并且鼓励女性应该要自信，对自己有信心。
拍戏还拍戏，马蹄露本人其实好亲切，好随和，并且好重视屋企，佢系访问嘅时候曾经话过，人生最大嘅遗憾，就系自己唔够本事，冇办法喺爸爸过身之前买一套三方嘅楼。
百变型“丑女”：吴君如
如今嘅双料影后吴君如，当年何尝唔系香港“丑女”角色专业户。
佢出道嘅时候，同刘嘉玲、邓萃雯、蓝洁瑛、曾华倩一齐被列为新一代接班花旦，但由于姿容平平无法上位，后来被王晶发掘，又重遇周星驰，转型成为喜剧演员。
吴君如不惜自毁形象，出演“花痴”、“八婆”嘅角色，出位嘅打扮、入木三分嘅演技令佢获得“女版周星驰”“喜剧女王”嘅称号，吴君如自己都自称系“三姑”，可见佢本人好享受出演呢啲角色。
后来，吴君如凭《洪兴十三妹》获得金像奖最佳女主角，凭《金鸡》获得金马奖最佳女主角，多年丑旦成为正旦，可以话系转型最为成功嘅喜剧女演员。
▲《洪兴十三妹》剧照
除咗转型成功、成就斐然，吴君如身边有美满嘅家庭，对于佢嚟讲，以前嘅“丑女”标签，又有咩所谓呢。
讲真，有边个女人唔贪靓，但系上边嘅女性，明明自己系女儿身，有啲要演丑女演奸角，有啲甚至要性别逆转扮男人，其中嘅原因，或者系因为要搵两餐，或者系出于对自己职业嘅坚持。
就好似苑琼丹接受采访时候讲过：“我当时（接角色）根本就冇选择权，一切都系导演安排，但后来，丑到出名之后，人人都嚟搵我演丑角，结果越演越丑！”
喺所有嘅丑角背后，其实都系演员本身嘅敬业精神，同埋佢哋美丽嘅灵魂。
或者佢哋都未必系靓女，但系值得我哋尊重同埋敬佩。
最后，献上呢个视频，我哋永远怀念鲁芬！
图片素材出自网络
羊城网负责整理编辑
最新评论