今年年三十，你哋屋企食团年饭，唔知又会睇咩节目送饭呢？
央视嘅春晚？
近几年嘅春晚节目内容同风格更加偏向北方，好少见到有广东元素嘅节目，所以广东人对春晚都兴趣不大。
而且据我所知，好少广府人年三十会睇春晚……
其实，广东电视台有一年嘅春晚曾经创下收视高峰，开创咗国内春晚嘅先河，佢就系1979年嘅“羊城贺岁万家欢”。
1979年嘅“羊城贺岁万家欢”究竟鸠屎到咩程度，等阿咩慢慢话你知。
国内第一个综艺节目
第一个春节联欢晚会
央视嘅第一届春节联欢晚会系喺1983年，而“羊城贺岁万家欢”（以下简称“羊城1979”）比佢早咗四年，系内地一个综艺节目同春节文艺晚会。
从依家嚟睇，搞台春晚并冇咩难度，每个电视台每年都会搞晚会，但系喺几十年前，啱改革开放嘅七八十年代，晚会节目系新奇又罕有嘅玩意，仲要系同境外媒体合作搞晚会，简直系破天荒，全国第一次。
而改革开放之初，人民思想“饥渴”已久，对娱乐文化充满“食欲”，“羊城1979”嘅出现极大满足春节时期嘅娱乐需求，所以“羊城1979”获得史无前例嘅成功，使到春晚逐渐成为内地电视台嘅标配节目。
首次与境外电视跨境直播
首次与境外电视媒体合作嘅综艺
“羊城1979”得以顺利举办，克服咗好多困难，其中包括要获得国务院批准，喺1979年嘅时候，真系唔容易做到。
“羊城1979”仲实现咗全国首例境外电视跨境直播，省港澳三地观众可以同时收睇节目。
内地电视台与香港电视台
最早合作嘅节目
“羊城1979”系内地电视台与香港电视台首次合作打造嘅节目，当时香港无线拍出咗《欢乐今宵》剧组，沈殿霞、何守信、汪明荃、郑少秋、罗文、夏雨等等当时响当当嘅大明星都嚟演出。
有人话，当年嘅阵容鼎盛到畀人感觉，好似成个明星挂历嘅明星都行晒出嚟，好多人都系第一次同香港明星咁近距离！
▲何守信和韩马利出发去广州参加“羊城贺岁万家欢”
▲肥姐当晚身兼数职，除咗做主持，仲要唱歌表演。
听讲当年肥姐仲当场表演咗段“买鱼肠”急口令——“去街市买鱼肠，见到姨丈，放低鱼肠，问候姨丈，执返鱼肠，拜拜姨丈”。
▲夏雨当年系表演粤曲节目
仲有罗品超、林小群共同演出折子戏《楼台会》、黄凯欣演唱《快乐时光》等等，由于时代久远冇搵到相关图片。
广州派出罗品超、文觉非、林小群、李丹红等著名艺人，同香港明星一齐出台演出，嗰次应该系第一次广东地区与港澳嘅合作互动。
第一台使用粤语嘅春节联欢晚会
“羊城1979”嘅举办地点就喺中山纪念堂、烈士陵园同越秀公园。
中心舞台选喺外景，但系全程采用多场景切换同运动镜头，同传统单一无聊嘅文艺晚会唔同。
“羊城1979”全部节目都系使用粤语，有老街坊都话，当时系第一次喺本地电视台听到香港流行曲，睇到香港风味嘅表演节目。
虽然有香港风味，但系节目之中依然融合广州特色，喺歌舞杂技、小品粤剧之中穿插广州风貌、名胜古迹。
喺烈士陵园表演嘅《八仙贺寿》，入边有秋官郑少秋、夏雨、汪阿姐，唔知你哋又认唔认得出。
咁嘅画质都好难睇清楚啦，秋官同阿姐，阿咩帮你哋搵咗出嚟啦。
▲秋官（左一）饰演嘅曹国舅
▲阿姐（中间）饰演嘅何仙姑
“万人空巷”嘅绝对收视高峰
“羊城1979”节目精彩、形式新颖，令到广东观众大开眼界，当晚现场观众有2000几个，而电视机前面观看嘅观众就数不胜数，创造咗收视高峰。
70年代末，黑白电视机未完全普及，好多人屋企仲系用鱼骨天线，为咗收睇“羊城1979”，好多观众就去人哋屋企“黐”电视睇。
好多有电视嘅屋企入边都逼满晒人，大家就围住部9寸、12寸电视机睇“羊城1979”，就算睇紧嘅只系黑白画面，但依然都系咁震撼。
“羊城1979”播出之后，街边周围卖紧表演明星黑白照、歌曲歌词嘅黑白照，好多人都争相追捧。
所以话，1979年嘅“羊城贺岁万家欢”唔单止开创咗国内春晚嘅先河，仲系广州电视史上一个难以复制嘅成功案例。
1989年十周年庆典依然精彩
虽然1979年嘅“羊城贺岁万家欢”真系好震撼，好精彩，不过讲到嘉宾阵容最鼎盛，应该系十年之后（1989年）举办嘅“羊城贺岁万家欢十周年庆典”。
1989年，广东电视台同TVB再度合作，举行第二届春节晚会，今次嘅地点变为天河体育中心同白天鹅宾馆。
当时阵容囊括咗好多天王天后级，包括梅艳芳、陈百强、邝美云、肥妈、陈慧娴、罗嘉良、郭晋安、吕良伟、任达华、刘嘉玲、周海媚、邓萃雯、梁朝伟、廖启智、吴君如、江欣燕、胡枫等。
▲左上为陈百强、右上为邝美云、下面为梅艳芳
▲梅艳芳同体操王子李宁合唱《大约在冬季》
▲因为李宁有啲怕丑，梅姐仲主动拖李宁只手
▲当晚最有创意嘅节目，当属吴君如同廖启智用“雌雄同体”造型演唱歌曲串烧
▲陈百强演唱《从今以后》《感情到老》，当年Danny嘅气质秒杀依家所有当红小生
两届“羊城”嘅成功，正正系反映咗广东人坚持本土文化嘅同时，面对外来文化，依然秉持住创新、开放、包容嘅态度，并唔会一味拘泥于旧或者崇洋媚外。
而到咗依家，曾经辉煌嘅港剧、广东地区节目，日渐式微，流失观众，或者我哋应该思考其中嘅原因。
最后奉上89年“羊城”陈百强嘅演唱视频，
各位自己友欣赏下当年嘅盛况
（同埋，Danny真系好靓仔！！！）
素材出自百度百科、广东广播影视网等
羊城网负责整理编辑
最新评论