成日去外省旅游嘅自己友肯定遇到过同一个问题：想食云吞嘅时候，都会有一丝尴尬！

江浙沪地区叫馄饨、巴蜀四川叫做抄手、闽南地区叫做扁食，仲有叫扁肉、肉燕、清汤……

咁多种叫法，其实都系一种相似嘅食材，今日就同各位自己友八一八“云吞”嘅前世今生！

其实最早只有馄饨，云吞、抄手、扁食、肉燕、扁肉…都系由馄饨演变而来嘅。

相传早喺汉朝时期，北方匈奴经常袭击边疆，带头嘅两个首领一个叫“浑氏”，一个叫“屯氏”。

当时嘅老百姓真系对佢两个恨之入骨！于是就用肉馅包成角，取“浑“、“屯“之音，于是后来就出现咗一种叫“馄饨“嘅小食。

因为最初做成馄饨嘅嗰天系冬至，所以直到今时今日，全国好多地方都依然保留住“冬至前后食馄饨”嘅习俗。

从北方边疆传入中原地带，每个地方都将自己当地嘅饮食文化、习惯同“馄饨”融合，例如喺四川，就变成抄手，四川人喜辣，于是又有红油抄手。

同样，喺广东我哋叫做云吞，为咗特出鲜甜美味，制作十分讲究！

传统云吞系拇指左右大细，一啖一粒最适合。馅料要七分瘦三分肥。（因为旧时西关一带比较富裕，所以西关一带传统云吞馅里面都会有虾。）

广州人钟意食云吞，对于好多老广州嚟讲，一碗云吞面，系童年、青春嘅回忆。

传统云吞面云吞垫底，因为要令汤同面接触面减少,面就唔会过度吸水，影响口感。

1、一碗云吞面上台之后，先要将面反一反面，畀上面嘅“面”吸收汤汁。

2、食面之前先饮一啖汤，感受汤嘅鲜味。

3、面店都会提供酱、醋、胡椒粉、咸酸，可以倒落羹里面，食面嘅时候可以按自己嘅口味调味。

PS：云吞面嘅汤有大地鱼、猪骨、虾嘅香味,清澈如茶,厨师要用好多材料、功夫先做到呢种效果，酱醋倒入汤里面，会掩盖汤嘅鲜味。所以酱醋最好倒入羹度，食面嘅时候点住嚟食。

4、食食食食食食食食。

就快落班了，真系心思思！

即刻去食返碗先！

有声+手绘：广州街边美食明信片

阿婆话斋：

生活同腌咸酸一样，

行慢一啲，花时间沉淀，

生活才能更入味。