捉伊人、伏匿匿、摸盲盲，你系咪玩紧同一个游戏？

一直追羊城网嘅自己友仲记得，几日前我写过一篇文章，提及过「捉伊人」之中嘅“伊人”来源于《诗经》之中嘅《蒹葭》。

点击回顾→粤语嘅“内涵”，出乎你想象

「捉迷藏」系每个小朋友童年时期必定玩过嘅集体游戏，唔使道具，唔使电子器具，只需要一个场地同三两个老友仔就可以玩足一个下午。

喺广东，「捉迷藏」又好多种唔同嘅叫法，「捉伊人」、「摸盲盲」、「伏匿匿」、「埋舟」……究竟佢哋之间有咩区别？系咪同一样嘢？

其实上边所有称呼都系指同一样嘢，都系细路仔嘅寻人游戏，通过「猜呈寻」决定出捉人者，去捉剩余嘅细路仔。

佢哋主要区别在于规则同玩法唔同，可以分为以下三类——

摸盲盲、盲公捉、耍盲鸡

呢啲先系真正捉迷藏！

「捉迷藏」嘅一条重要规则系，捉人者寻人前要先以毛巾蒙眼，捉人者只可以靠听声去捉人，捉到人即为赢，而捉人期间，匿藏者可以四处走动。

「摸盲盲」一词，源于清朝嘅《土风录》——

“

小儿以巾掩目，暗中摸索，谓之摸盲盲。始于唐明皇、杨妃之戏，号捉迷藏。

由此可知「摸盲盲」等于「捉迷藏」，只不过系叫法唔同。而「盲公捉」、「耍盲鸡」就系由此延伸出嘅别称。

由于捉人者蒙住眼，成日盲中中四围冲，好似只鸡被匿藏者耍乐，故又得名「耍盲鸡」；「盲公捉」则取自于「盲公竹」嘅谐音，好诙谐有趣。

伏匿匿、伏伊人、捉伊人

都系进化版捉迷藏

同传统捉迷藏唔同，「伏匿匿」要求捉人者先伏埋墙、蒙着眼或者用手揜眼，从1到50咁数数，匿藏者就喺呢段时间内匿埋。

时间一到，捉人者就会大声嗌：“我嚟啦！”，然后开始捉人，匿藏者可以四围走、周围匿，匿得最耐嘅，就算赢。

「伏匿匿」嘅发音系“buk6 nei1 nei1”，都系古老嘅广府音，“伏”字发「仆」音，代表藏匿嘅意思，「伏伊人」一词都系由此而来。

「伏伊人」结合“伏”字同“伊人”而来，而游戏中，「伊人」不但要伏，还要被捉，所以又有咗「捉伊人」，两者意思其实完全一样。

水鬼上岸、埋舟

都来源于水鬼传说

珠江三角洲水乡众多，经常会有乡民溺毙，久而久之就有咗「水鬼掹脚」嘅民间传说。

每年农历七月，老人都会劝儿童勿往山涧游泳，以免遭「水鬼掹脚」，溺毙于水中，水鬼藉其躯壳投胎做人，死者则化成水鬼，做水鬼替身。

「水鬼上岸」、「埋舟」就系孩童将伏匿匿同水鬼传说结合而来嘅游戏。

捉人者代表水鬼，其他人喺“岸上”躲匿（比地面高的地方），为避免做“水鬼替身”，跑去触碰墙壁或大树，大叫“埋舟”，就可以避免被捉，捉人者只能再寻找另一个目标。

「埋舟」象征溺水者靠近船舟，有物可扶，自然不怕水鬼拉脚。

当水鬼捉到人或所有人都已「埋舟」，游戏就会结束，重新开始。

何仔公

究竟同何济公有冇那冷？

「何仔公」你可能未听过呢个名，但你肯定玩过相似规则嘅捉迷藏。

「何仔公」玩法同「水鬼上岸」差唔多，同样都加入咗玩家自保元素。

当被捉者差唔多被捉到，可以双臂交叉胸前，大叫一声“何”或“何仔公”，就可以避免被捉，但必须要立正一直企喺原位，直到你嘅同伴帮你“解穴”。

但如果你平时得罪人多，或者叫太多次“何”，可能就会冇人愿意帮你解穴，你就只可以一直企喺原地，咩都做唔到。

之后，「何仔公」追加咗好多新规则：比V可以暂停，被捉者可以自救，只可以上捉上，下捉下……真系捉到天荒地老都未捉完！

印象中，以前每次玩「捉伊人」，游戏完结唔系因为捉晒啲人，而系因为已经日落西山，阿妈叫你返去食饭。

即使喺冇电子产品嘅年代，我哋嘅童年依然可以好开心，唔知你哋童年嘅「捉伊人」又系边个版本？

除咗「捉伊人」，我记得我童年仲会玩「煮饭仔」，攞架撑，扮煮饭，先落米，后透火，样样都唔拿西！

仲唱住《麻鹰飞》嚟放纸飞机，希望只飞机好似麻鹰咁“飘嚟飘去唔落地”！

陪伴我哋童年嘅除咗简单而有趣游戏，仲有呢啲朗朗上口、耳熟能详嘅《广府童谣》！

每一首童谣都带住一段回忆，

每一句粤语都值得我哋传承。

购买方式