互联网+粤文化
羊记杂货铺:为你发掘众多有故事的本土文创……
发新帖
详细内容

iPhone X 咁大嚿嘅番枧,广州人可以用足40年

阿咩 发表于 2017-9-25 |1条回复 |7150次浏览

更多
本帖最后由 阿咩 于 2017-9-25 19:24 编辑

广州,从来唔缺品牌。

人人必备嘅微信喺广州出世,恒大喺广州发迹,而今日要讲嘅,系一个体积媲美iPhone X嘅上世纪广州明星产品——

电车牌番枧
(以下简称电车枧)

image001.jpg


▲阿咩贡献嘅扮成iPhone 8 Plus嘅iPhone 7 Plus

系咪冇呃你,iPhone 咁大嚿,一个人可以用大半年,但竟然只卖几文。

你或者喺你阿爷阿嫲屋企见过佢,颜色灰黄、质感粗糙,成嚿砖咁大,闻起身有阵无法形容嘅枧水味,最明显嘅系,番枧表面万年不变会印住“电车”两个字。

image002.jpg



01

电车枧由广州肥皂厂生产,佢嘅前身源昌枧厂创立于20年代,系广东最早一批番枧厂。

image003.jpg


凭借一块暗黄色嘅番枧,广州肥皂厂迎来自己嘅黄金时期,成为全国闻名嘅轻工业品牌。

电车枧曾经有几辉煌?上世纪七八十年代,每个广东家庭必备两三块电车枧,可以话系红过钟楚红,发过周润发。

因为佢价格亲民、去污能力强、一块用好耐,一块番枧可以满足成家人冲凉洗手、洗衫清洁。

image004.jpg


经历过战火动荡嘅年代,公私合营嘅改革,广州肥皂厂一度系广州城内唯一嘅番枧生产厂,作为一个城市标志品牌闻名全国。

从80年代开始,广州肥皂厂被美国宝洁公司入股,而中国第一樽海飞丝都系从广州肥皂厂嘅车间生产。

image005.jpg


只可惜,以上都已成为过去式。

如今,随住社会经济发展、外来品牌进驻,广州肥皂厂风光不再,曾经嘅明星产品连进入大型商场嘅资格都冇,只可以退守老式杂货铺。


02

喺一般嘅超市商场,根本见唔到电车枧,只有老式杂货店先可以搵到。于是,我特登去咗一次中山六路嘅励红百货,买咗嚿电车枧返嚟用。

image006.jpg


根本都唔使问人,一行入去我就见到啲番枧,冇任何包装修饰,就咁安静整齐摆喺最显眼嘅地方,就等识货之人嚟帮衬。

image007.jpg


除咗电车枧,仲可以见到一啲“失踪咗好耐”嘅国货产品。

image008.jpg

▲升价到17文一支嘅大象牌沐浴液

image009.jpg

▲段斤卖嘅“原谅色”花露水

image010.jpg

▲中间嘅双喜暖水壶引人瞩目

image011.jpg

▲畀我老窦戏称为“乞衣兜”嘅搪瓷碗

见到呢啲似曾相识嘅古董级商品,恍如隔世嘅物价水平,就连埋单都只收现金,行入励红,就好似登上一部穿越返十几年前嘅时光机。

喺呢个连乞食都可以移动支付嘅年代,励红既格格不入,又弥足珍贵,喺时代步伐嘅冲击下,佢依然以自己嘅节奏稳扎前进。

QQ图片20170925191318.png


走之前,我仲特登问咗下售货阿姨依家多唔多人买电车枧用,佢话:“多啊,咩人都会嚟买,反正洗手洗衫抹嘢咩都得!”

话口未完,有个阿姨行入嚟话:“唔该,要嚿电车!”

售货阿姨好自然就答一句:“嗰边畀钱先!”


03

生活喺寸金尺土、高楼遍地嘅广州,一餐饭食二三十文算唔算贵?

我哋都会觉得正常,但我婆婆每次听到,都觉得贵,话我大花洒,唔使知悭识俭。以前并唔理解点解几十文佢就大惊小怪,依家开始明白。

阿爷阿嫲嘅年代,系一个十几文养活一家人,一块番枧用足大半年、一对鞋着到烂都唔舍得掉嘅艰辛年代。

搵朝唔得晚,食餐饱饭就已经非常唔容易,就唔会太在乎咩生活品质,就好似呢块嘅电车枧,价廉物美、简单好使咪得咯!

四十年前嘅广州与依家有翻天覆地嘅差别,离我哋好远,就如另一个时空。但对于老一辈人,系一段恍如昨日嘅辛劳岁月,精打细算、勤俭节约已经成为烙印于日常生活嘅习惯。

而且讲到底,佢哋悭悭埋埋为咗乜?咪又系为咗我哋呢啲化骨龙!



依家,洗衣机早已解放双手,沐浴露洗头水取代番枧,电车枧成为一个上一代人先提起嘅名词。

如果你经过老式杂货铺,不妨买返嚿电车枧或者直接分享呢篇文章,守护下呢个硕果仅存嘅本土国货,及其背后嘅老广回忆。

image015.jpg


作品:《天幕下的番枧》
by阿咩
更多
羊记杂货铺
四季虫 发表于 2017-9-26 16:23:49 ( 加好友 |打招呼 |发消息 )
经典粤货
回复

使用道具 举报

发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部