互联网+粤文化
羊记杂货铺:为你发掘众多有故事的本土文创……
发新帖
详细内容

鱼虾蟹系咪得罪广东人,点解成日用嚟闹人?

阿爆 发表于 2017-9-13 |2条回复 |1638次浏览

更多
最近被朋友问咗一条IQ题,当时思考咗好耐都未谂到,我决定攞出嚟考下各位自己友:

鱼、虾、蟹三者开片打交,
点解每次都系虾输?

答案喺最后,我相信你哋肯定唔会咁冇义气,直接拉去最后睇答案,睇完就走,如果你真系咁嘅人,我只可以讲……

image001.jpg


作为一个沿海省份,海鲜必不可少,各类海鲜经常出现喺粤语俗语、歇后语之中,其中以鱼、虾、蟹最为广泛使用。

今日我就嚟讲下「虾」!

image002.jpg


喺粤语中,「虾」主要有三种意思,第一种系指虾本身,或用虾指代某种人或物。

比如「摸虾」,即系耍太极拳,由于一班老人家耍太极嘅时候,会弯着腰对空气又摸又捞,远睇好似一班人摸虾捞鱼。

例句:
我阿爷朝朝准时六点就去公园摸虾!

image003.jpg


形容物,经常同烹调有关,比如「虾仔饭」就系指刚煮熟的、颗粒分明嘅硬饭,形状如小虾,而「虾眼水」就系比喻刚沸腾嘅水,佢会冒出虾眼一样嘅小泡。

image004.jpg

▲虾眼水

形容人嘅某种状态,我哋又有「生虾咁跳」,用嚟形容人被惹怒,怒火攻心,「挛弓虾米」就系形容人坐姿或物件形态弯弯曲曲。

image005.gif

▲细个有冇激到老窦老母生虾咁跳啊?

仲有个少用嘅粤语歇后语叫阿驼卖虾米——大家都唔掂,“掂”喺粤语中,有竖直、笔直嘅意思,阿驼(驼背佬)同虾米都系弯腰驼背,冇一样掂,意思就系大家都无法交差。

「虾」嘅第二种意思指代婴儿或细路仔。

image006.jpg


受西方文化影响,依家大家都习惯叫婴儿做BB,旧时嘅人会叫婴儿为「苏虾」或「苏虾仔」。

「苏虾」原字分别为“臊”、“孲”,“臊”系形容初生婴儿身上混杂母乳嘅气味,而“孲”(音同“鸦”)字形容婴儿喊声,故婴儿都叫孲仔。

有时候,老一辈人叫「苏虾仔」叫惯咗,改唔到口就会一直叫细路做「虾仔」,叫到老,好似童谣《月光光》之中就有一句——

月光光,照地堂,
蝦仔你乖乖瞓落床!

image007.jpg


果然喺每个家长嘅心目中,自己仔女永远都系「苏虾仔」。

image008.gif


而「虾」嘅第二种意思就常见咯,指欺负、欺凌,相关嘅粤语俗语我随随便便就讲出百几两百条:

虾人:欺负人
好虾:好欺负的人
几虾人:好考验人
畀人虾:软弱,被他人欺负
虾虾霸霸:靠欺负、侵占获取不义之财
人多虾人少:人多的一方欺负人少的一方
大虾细,畀屎喂:比喻大人欺负细路好唔光彩
雷公劈豆腐——稳软嘅嚟虾:专拣软弱嘅欺负
…………

image009.jpg


逢年过节,如果一家大细一齐食饭,屋企长辈肯定叫你食返只虾,寓意未来日日笑哈哈,冇烦恼!

因为“虾”同“哈”同音,所以经常被赋予喜庆嘅含义,但根据《广府俗语探奇》,“虾”被用嚟表达欺负嘅意思,亦系因为佢同“哈”同音。

image010.jpg


“呵”字古语读「ha」,宋代以后其书面读音改变,后来民间以“哈”字来代替原来嘅「ha」音。

因此“哈”继承咗“呵”嘅呵责、威吓、盛气凌人之意,后来同音嘅“虾”字就被用嚟形容欺负人。

image011.jpg


既然前面有讲到鱼虾蟹,循例要讲下三者嘅故事。

鱼虾蟹系旧时民间常见嘅赌博游戏,经常喺新春期间用作娱乐之用。玩法同骰盅大同小异,摇骰仔然后估点数,不过采用嘅骰仔由鱼、虾、蟹、金钱、葫芦及鸡六种图案代替点数。

image012.jpg


民间有俗语叫「扮晒鱼虾蟹」,并非赞美你身价高,反而系话你不懂装懂,装模作样,扮晒嘢,相似表达仲有「扮叉烧」「扮晒蟹」。

不过「扮蟹」一开始系用嚟比喻将人好似捆蟹咁五花大绑(通常系指小偷),引申为装疯卖傻,装作唔明白。

QQ图片20170913202257.png


关于虾蟹,仲有一个非常“内涵”嘅表达,就系「炒虾拆蟹」,形容一个人满口粗言秽语,等于「烂口」或「粗口烂舌」。

至于点解?

呃……我只可以咁解释……

炒 = 臭
虾 = 門西
拆 = 臭
蟹 = 門西

等你哋慢慢参悟啦,唔识就请教身边嘅老司机,讲得多我惊会被人封号搞到失业!

image014.jpg



最后公布IQ题答案:

虾成日输系因为
Halloween(虾no win)!


系咪好烂!
系咪好烂!
系咪好烂!
(唔可以剩系我一个被烂gag冻亲)

image015.jpg


睇完答案,唔好咁快走,
捱埋义气留下言啦,
你知道咩关于“鱼虾蟹”嘅粤语?
你身边有咩“扮鱼虾蟹”嘅经历?

本文出自冇鱼虾蟹可以扮嘅阿爆

↓扫一扫↓
QQ图片20170510175417.png


素材出自明报、广州俗语词典等
羊城网负责整理编辑
image013.gif
关注羊城网

更多
原创粤文化科普视频,睇完幽默与干货齐飞!
四季虫 发表于 2017-9-13 20:08:02 ( 加好友 |打招呼 |发消息 )
点解冇讲鱼啊?鱼呢?

回复

使用道具 举报

可可粒 发表于 2017-9-13 20:09:47 ( 加好友 |打招呼 |发消息 )
谂起个烂gag。
有日,虾仁好咸湿咁同滑蛋讲:“滑蛋阿,你真系好滑阿~”滑蛋:“咦~~你虾仁嘅!”
回复

使用道具 举报

发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部