互联网+粤文化
羊记杂货铺:为你发掘众多有故事的本土文创……
发新帖
详细内容

连肥猪肉都可以酿酒,广东人嘅脑洞我写100个服字

小沅子 发表于 2017-9-13 |3条回复 |461次浏览

更多
本帖最后由 小沅子 于 2017-9-13 19:43 编辑

唔知有冇记得,我之前曾经讲过,我系一个唔好酒,但会饮酒嘅人。(唔记得你咪回顾下咯——点解广东人劈酒狼过劈友?)

image001.jpg


我成年之后先开始饮酒,但好少饮醉。我觉得好大程度同基因遗传有关,因为我屋企一屋都系酒鬼。

image002.jpg


我阿妈中意饮红酒,老窦中意劈啤酒,而我阿公最劲,直接怼白酒,但佢年纪大之后就知惊,为咗身体健康慢慢就戒咗酒。

我阿公戒酒之前,从细听佢讲得最多嘅一次词叫

玉冰烧

image003.jpg


01

玉冰烧系一种源自佛山嘅白酒,每次我阿公食烧腊,必定买返支玉冰烧,攞出个酒杯,斟好半杯白酒,然后一啖肉一啖酒,偶尔眯住眼叹一声

“呀~~过瘾!”

image004.jpg


细个好奇,就要阿公畀少少我饮,结果我一饮即刻辣到出唔到声,又攻鼻又辣喉,仲有啲油腻。

见到我一脸厌恶,阿公笑呵呵同我讲:“傻女,玉冰烧系用嚟嗒,唔系饮,你仲细个,唔识欣赏个啦!”

每次见到阿公白酒送烧腊,情景就好似玉冰烧最出名最洗脑嘅广告歌——



斩料,斩料,斩大嚿叉烧。
油鸡卤味样样都要,斩大嚿叉烧,哗!
玉冰烧,玉冰烧,坐低饮杯玉冰烧。
饮杯玉冰烧,胜嘅!
(80年代玉冰烧广告,歌词系由鬼才黄霑创作)

就如广告入边所讲,几十年前,斩料加餸、大排档、聚会嘅标配酒,唔系青岛纯生,更唔系哈啤RIO,而系玉冰烧。


02

好长一段时间,我畀玉冰烧呃咗,觉得呢个名文化水平特别高,甚至可能来源于某句诗句。

后来先知道,佢其实就系用肥猪肉酿酒(冇睇错,真系肥猪肉)!

image005.jpg



两样风马牛不相及嘅嘢,点解就畀人放埋一齐,仲创造咗广东一大名酒?

据说玉冰烧系清末石湾陈太吉苑第三代东主陈如岳所创。

陈如岳年轻时学富五车,曾担任翰林学士,后重拾祖辈嘅酿酒业,佢发现广东人中意用蛇肉浸酒,于是突发奇想尝试用猪肉浸酒。

image006.jpg



猪肉释放嘅油可吸附酒中杂质,油脂浮面,醇酒沉淀,时日愈久,沉淀越彻底,米酒就越香醇,仲有股独特嘅油香。

从此,以玉冰烧为首嘅豉香型白酒问世,其酿制工艺沿用至今。

image007.jpg



由于肥猪肉好似晶莹剔透嘅冰块,该酒最初得名为肉冰烧,后来觉得唔够文雅,“肉”、“玉”又同音,就改名为玉冰烧,又可用嚟形容酒质冰清玉洁、清亮透明。

听过有老鼠酒、蛇酒、蜈蚣酒,但肥猪肉酒恐怕亦剩系广东先有。

要酿制出醇和滋味嘅玉冰烧,重点系三大元素:

酒好、埕老、肉陈

最重要嘅莫过于玉冰烧嚿“肉”,每一块酿酒嘅肥猪肉都可以用好多年,越老越陈嘅肥猪肉,浸出嘅玉冰烧越幼滑,豉香越浓郁。

所以行家老店酿制玉冰烧,佢哋嘅猪肉用到几乎冇办法成块攞起。

image008.jpg



03

战后百废待兴、生活困苦,而酒可以一醉解千愁,暂时忘却现实,米酒业因此逆市而起,特别系方便亲民嘅散装米酒,曾经街头巷尾总会有间店卖酒。

image009.jpg


于是,玉冰烧趁此崛起,成为劳苦大众嘅杯中物、心头好。

image010.jpg

▲70年代嘅玉冰烧广告

好多人一日劳累过后,都会饮返几両烧酒,醒神又解愁。有时朋友相聚,既要有肉亦要有酒,大家谈天说地,把酒论人生吗,偶尔做返次“酒肉朋友”。

image011.gif


直到依家,好多老广东人嘅一日,都系从一杯玉冰烧开始。

早上去到茶楼,好多老人家都会喺台面放支玉冰烧,叫碟油鸡卤味、一盅两件送烧酒。

image012.jpg


一打开酒盖,就可以闻一阵透着腥气嘅肥猪肉味,但入口一试,反而油腻感比想象中轻,混有米酒嘅清香,余味甘爽,一日能量都由此而来。

虽然玉冰烧拥趸无数,但并非人人都可以接受佢嘅油滑腻气。

特别系谂起酒缸之中竟然系一大嚿肥猪肉,饮酒嘅人会唔会多少觉得有啲搞笑?

QQ图片20170913200717.png





直到依家,我都仲记得,阿公嗰句“你仲细个,唔识欣赏个啦!”

问题系我大个啦,依然唔系饮唔出玉冰烧嘅猪肉香,依然冇办法理解点解酒只可以用嚟嗒,唔可以用嚟饮。

image016.jpg


但我开始理解,玉冰烧嘅存在,其实就系老一代广东人辛劳岁月中嘅“安慰剂”。

既然生活如此艰难,就唔好逼得自己咁紧,不如偶尔用酒精放空下自己。

image017.gif



你印象中嘅玉冰烧系点?
你同玉冰烧之间有冇故事?
你有冇嗒得出玉冰烧嘅猪肉香?
(如果有,麻烦形容下……)


最后做个小科普,2012年广东省酒类行业协会曾评选过广东十大名酒,唔知有冇你嘅家乡名酒?

广东十大名酒

广东顺德酒厂的红荔牌红米酒
清远市酒厂的打虎牌飞霞液
广州珠江啤酒的珠江牌珠江纯生啤酒
广东三河坝酒厂的三河坝牌大埔娘酒
广东省九江酒厂的远航九江牌九江双蒸
广东三友酿酒的龙乡贡牌客家黄酒
广东长乐烧酒业的长乐牌长乐玉液
广东石湾酒厂的石湾牌石湾玉冰烧
广东一线天酒厂的一线天牌15年花开富贵
肇庆蓝带啤酒的蓝带牌蓝带1844啤酒


素材出自信报、饮食男女等
羊城网负责整理编辑
image013.gif
更多
羊记杂货铺
阿咩 发表于 2017-9-13 20:03:18 ( 加好友 |打招呼 |发消息 )
本帖最后由 阿咩 于 2017-9-13 20:04 编辑

@Zyong:
每个人都有属于自己的本地酒情怀,红荔牌红米酒,也是充满我的回忆,已故的爷爷是老农民,小时候下田时常常带上我们,凌晨5点多到饭店吃早餐,常常是吃粥喝红米酒,说是可以暖身,转眼过去20多年,那份情还在。
回复

使用道具 举报

阿咩 发表于 2017-9-13 20:03:59 ( 加好友 |打招呼 |发消息 )
@武吉智馬蔡
玉冰燒除咗浸肥猪肉,仲有鷄脚(鳳爪),冰糖,飲起上嚟除咗石灣米酒特有嘅嗰陣米味,甜味,仲有啲豆豉香味,所以又稱之為豉香型燒酒。
回复

使用道具 举报

soonl 发表于 2017-9-13 20:05:42 ( 加好友 |打招呼 |发消息 )
首广告歌好正!霑叔犀利!
回复

使用道具 举报

发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部