互联网+粤文化
羊记杂货铺:为你发掘众多有故事的本土文创……
发新帖
详细内容

从几时开始,装香拜神都系“迷信”?

阿爆 发表于 2017-9-4 |1条回复 |4027次浏览

更多
今日搭地铁,偷听到两位太太倾八卦,其中一位太太话:我家婆初一十五就拜神,个仔畀佢凑,我真系惊畀佢带坏......虽然我唔拜神,但系都想同大家倾倾“拜神”呢件事。

首先同大家分享几个故事。

一、
时间:2017年6月5日  地点:添仔家

添妈:快啲过嚟拜神啊,后日高考啦!

添仔:有鬼用咩,拜次神不如做多两条数学题啦!

添妈:你识咩啊!你家姐嗰年拜完神,高考考得几好啊,高分过平时几十分啊!

添仔:唔拜!你拜埋我嗰份,我入房复习。

添妈:真系唔生性! 有怪莫怪 细路仔唔识世界...

(添仔今年高考里面,正常发挥,被佢嘅目标大学成功录取。)

QQ图片20170904110225.png


二、
时间:2017年正月廿六  地点:屋企门口

我:阿姨,夜麻麻去宵夜啊?

邻居阿姨:宵咩夜啊,去西樵山啊!观音借库去抢个头位!

我:观音借库灵唔灵嘎?

邻居阿姨:梗系灵啦,我年年都去!

QQ图片20170904110301.png


以上场景,广州人都唔会陌生。“拜神”从古到今都系我哋嘅传统习俗。传统观念强嘅,除咗逢年过节、初一十五拜神之外,早晚都会装香。再夸张啲,仲会24小时维持香火不灭......

咁样系唔系封建迷信?喺度要同大家分享第三个故事。


三、
时间:2017年8月28日  地点:广州
人物:新加坡华侨文叔、老友昌叔。

文叔:广州真系变晒样喔!廿年冇返嚟,以前间烂鬼砖头屋,起咗栋咁高嘅楼!

昌叔:你老懵懂了,广州依家一线城市啊,你去到新加坡梗系唔知啦!

文叔:今日七月初七,点解度度都冇“乞巧市”嘎?

昌叔:依家好少嘎啦,人人都过情人节,有几多后生听过乞巧节啊。

文叔:唔系阿嘛,习俗嚟喔,新加坡成条街(唐人街)都庆祝!

昌叔:挑,时代变啦,啲后生点识呢啲“老坑嘢”啊。

文叔:发瘟啦你,我个孙都知,盂兰(节)仲跟我哋去拜。
.........
(文叔认为“外国人”比中国人更加坚持传统习俗。)

QQ图片20170904110309.png

的而且确,好多广州新生代就同昌叔讲嘅一样,对呢啲“老坑嘢”一无所知,觉得索然无味。见到老一辈拜神,就认为系封建迷信、愚昧无知。甚至,仲会以“科学”嘅名义指责老一辈。

QQ图片20170904110317.png

拜神者当中,确实有“病态迷信”,佢哋希望通过拜神,得到神明保佑,不劳而获,贪欲大于风俗。

但对大部分人嚟讲,拜神只不过系一项“固定仪式”:拍戏拍剧,开机之前都会拜神,祈求拍摄顺利;店铺开张,唔少得拜祭财神,祈求货如轮转;公司企业,初七开年都会简单拜祭,祈求新一年掂过碌蔗......

如此种种,虽说包含祈求,但讲到底,都系一份仪式感,但求心安理得。

QQ图片20170904110325.png

正如中秋拜月光、年三十晚谢灶、人日“七宝羹”、中元节祭祖...除咗系中国嘅传统习俗,更加系老一辈生命中唔可以缺少嘅“仪式”。

呢份仪式感对我哋嚟讲可能微不足道,但对老一辈嚟讲,系佢哋人生嘅一大部分,亦代表住佢哋对屋企人嘅爱,因为佢哋拜神嘅时候,第一句喺心里面默念嘅都系:保佑全家人平平安安,身体健康...

呢个愿望,系老一辈坚持拜神嘅最大动力!而呢个愿望,往往就被人认为系“迷信”。

QQ图片20170904110332.png


成日认为阿妈拜神太迷信,但我哋仍然半信半疑咁喺阿妈“怂恿”之下照做,我哋咁样算唔算迷信?

我系有故事嘅 阿爆

QQ图片20170904110341.png

关注羊城网

更多
羊记杂货铺
沙发
四季虫 发表于 2017-9-5 16:03:55 ( 加好友 |打招呼 |发消息 )
装香拜神只不过系一种文化习俗,同迷信无关。
回复

使用道具 举报

发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部