互联网+粤文化
羊记杂货铺:为你发掘众多有故事的本土文创……
发新帖
更多
最近坐地铁,多咗好多细路仔同我一齐逼地铁,不过人哋系放暑假出去玩,我哋系返工搵两餐。

见到佢哋欢声笑语,好似有把声同我讲紧,已经出嚟工作嘅人,冇资格讲寒暑假。

image001.jpg



屏幕前嘅你,童年过暑假你会做咩?

除咗吹风扇,食雪条,打街机,好多人都同我一样,暑假一直等紧一个神圣嘅节目——《儿歌金曲颁奖典礼》。

image002.jpg


《儿歌金曲颁奖典礼》简直系每个80、90后广东人嘅童年集体回忆,暑假嘅某个星期日,我哋唔理阿妈发火,都会捱夜坚持睇完佢。

依家嘅00后好幸福,活喺网络普及嘅年代,一部手机满足消遣需求,佢哋亦从来唔缺娱乐资源,中国综艺节目井喷,节目形式层出不穷,睇到闷换个台就有新节目。

所以,佢哋好难理解呢档制作一般、流程无聊、剩系扮鬼扮马嘅cosplay颁奖典礼对于我哋嘅意义。

image003.jpg


而大部分80、90后童年最大嘅乐趣,就系追动漫。

我童年嘅时候,TVB喺17:15播动画,所以我每日一放学攞起书包就冲出课室门口,直奔屋企打开电视,一分钟都唔愿意错过!

TVB为懵懂嘅我打开咗动漫大门,唔单止配上亲切嘅粤语配音,最重要嘅系,嗰啲朗朗上口嘅粤语主题曲。

image004.jpg


到后来,睇《儿歌金曲颁奖典礼》成为我每个假期嘅必备项目。

《儿歌金曲颁奖典礼》始于1992年,香港小朋友投票选出当年最中意嘅儿歌,得票者前十就可以上颁奖典礼表演。

而每期颁奖典礼设定一个主题,中间设计唔同情节及表演串联起十首儿歌,最后宣布金银铜曲得奖名单,然后唱金奖歌曲作为结尾。(最早几届嘅流程会有所不同)

以前嘅我哋都好单纯,睇住一班人唱唱跳跳,睇一晚都唔觉得无聊,甚至自己跟住跳。

image005.jpg

▲1992年《儿歌金曲颁奖典礼》,比起感人嘅画质,只变种多啦A梦更恐怖!

image006.jpg

▲盖世宝- 魔法小美穗
儿歌金曲颁奖典礼2000年

《儿歌金曲颁奖典礼》基本系一年一届,除咗02、03年,由于候选歌曲太多,就曾经办过一年两届。

回想起身,嗰时应该就系TVB儿歌嘅全盛时期,好多耳熟能详嘅儿歌都出自嗰几年。

image007.jpg

▲Twins - 跅跅步哈姆太郎
儿歌金曲颁奖典礼2002年

《儿歌金曲颁奖典礼》嘅司仪阵容基本上都系郑丹瑞、肥姐、安德尊,有时候会加上儿童节目主持、当年香港小姐嘅冠亚军。

image008.jpg


好多颁奖典礼都系充满成人利益嘅游戏,从屏幕内斗到屏幕外,相比之下,《儿歌金曲颁奖典礼》充满住简单又纯真嘅美好。

一班平时无机会担大旗嘅儿童节目主持及儿歌歌手成为主角,舞台上卡通公仔喺度跳舞表演,唱住日日追嘅动画主题曲,轻松到好似一个课后游园会。

而每次当肥姐宣布得奖歌曲嘅一刻,我都希望系自己锺意嘅卡通片主题曲,真系好似啲歌手嘅疯狂fans。

image009.jpg

▲陈奕迅 - 超人主题曲
儿歌金曲颁奖典礼1998

当年上台领奖嘅,既有天王巨星级人物,如陈奕迅、郭富城,又有如今淡出荧幕嘅面孔,比如曾嘉莉,欧倩怡。

比如当年仲系新秀嘅曾嘉莉,凭《百变小樱》勇夺2000年至NET儿歌大奖,攞奖嘅之后一脸愕然,到咗献唱甚至感触落泪,咁真性情嘅女艺人真系少见。

image010.jpg

▲曾嘉莉- 百变小樱
2000年度儿歌金曲颁奖典礼

以前我总系觉得《儿歌金曲颁奖典礼》会一直搞落去,等我啲仔女出世之后,我可以同佢哋一齐睇,我冇谂过佢结束得咁突然。

呢场老少咸宜嘅盛事最终停步于2009年,2010年开始TVB再冇任何举办嘅消息,《儿歌金曲颁奖典礼》就咁默默消失于大众视线。

image011.jpg


港式儿歌嘅没落,其实唔系一朝一夕嘅事。毕竟新世纪以来,香港粤语歌市场衰落,新晋实力歌手屈指可数,粤语儿歌难逃唇亡齿寒,创作力剧减。

加上TVB儿童节目制作改变,动画主题曲顺应民意基本上用返日文原版,只有好似《多啦A梦》咁嘅经典得以保留,TVB已经冇可能凑够儿歌嚟搞一个颁奖典礼。

曾经作为忠实观众嘅我哋,唯有重听童年经典儿歌怀念以前嘅纯真时光。

image012.jpg

▲就连《放学ICU》都于2015年停办,改为新节目《Think Big 天地》


屈指一数,《儿歌金曲颁奖典礼》已经停办八年。

仲记得以前细个睇颁奖典礼,可能我当时并唔识啲歌手,听到首歌嘅旋律就喺电视机前跟住哼唱附和。

若干年后,当我再次重温儿时经典,先发现承包我童年儿歌嘅可能系啲天王天后级人马,以前果然系细路仔唔识世界。

image013.jpg

▲连刘德华都走嚟唱《数码暴龙》主题曲,可见当时《数码暴龙》有几红!

image014.jpg

▲梅艳芳唱《IQ博士》,简直系史上最成功嘅骗局,因为完全听唔出!

image015.jpg

▲我就记得陈奕迅唱超人主题曲,冇谂过钢炼嘅主题曲都系佢唱

各位自己友,
你童年挚爱儿歌系边首?
边个儿歌原唱系你最估佢唔到?


若被伤害够,就用一对手
痛快地↓扫一扫↓


QQ图片20170816161011.png
更多
发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部