互联网+粤文化
羊记杂货铺:为你发掘众多有故事的本土文创……
发新帖
详细内容

一碗汤渣,睇得出你属唔属于呢个家

小沅子 发表于 2017-5-16 |0条回复 |9065次浏览

更多
本帖最后由 小沅子 于 2017-5-24 14:55 编辑

世界上有样嘢,有人当佢系精华,有人当佢系烂茶渣,呢样就系汤渣。

image001.jpg


广东人咁中意饮老火汤,每日都会制造唔少嘅汤渣,我之前都写过一篇少女的鲜花,阿妈的汤渣,你睇到嘅花,你阿妈都有办法将佢变成汤渣。

饮完啖老火靓汤之后,啲汤渣你一般会点处置?(本文所讲嘅汤渣特指广东人煲汤之后所弃之不吃嘅肉类同配料)


食VS唔食?

To eat or not to eat ,呢个系原则问题。

我身边有唔少人都好中意食汤渣,有啲甚至乎系汤渣嘅忠实Fans。

image002.jpg


佢哋每次饮完汤,唔单会食晒所有汤渣,仲会索晒入边啲“精华”。有骨就索骨髓,有肉就吸肉汁,直到所有嘢索无可索先会罢休!

有人中意食汤渣,自然就有人对抗拒汤渣。唔少后生仔女都唔会好钟意食汤渣(包括本人在内),因为都会潜意识觉得汤水先系精华所在。

image003.jpg


加上经过长时间嘅烹调,令到食材嘅质地变疏松,肉又柴又硬,菜又软又散,根本食唔落口,所以每次饮汤,我都自动自觉叫阿妈唔好畀汤渣我。


你自己想食VS你阿妈逼你食VS宠物唔食再畀你食???

如果系你自己主动想食汤渣,咁就冇咩嘢讲啦,但系世界上有种情况,叫你阿妈逼你食汤渣!

image004.jpg


好多人都应该会经历过一个场景,当你饮完汤,放低个碗准备返房,呢个时候,你阿妈就会叫住你——

做咩唔食埋啲汤渣!
你咁样嗮晒我成啖心机!
你知唔知我哋以前都冇得食呢啲啊!

image005.jpg


鉴于当时阿妈个样简直系想攞刀斩人,好多人都会乖乖哋返去,再唔想食都啃埋啲汤渣!

咁都未算最惨,仲有一种情况最惨,你阿妈攞啲汤渣畀你屋企只旺财食,假如佢唔食,之后你阿妈为咗唔浪费,结果将啲汤渣畀返你食!

汤渣传递链+屋企地位链↓

image006.gif


跟住,啲汤渣就无啦啦返到你只碗度,或者成为你第二日嘅午餐(以上案例来源阿水的真实故事)。

image007.jpg


呢种情况下,个人建议你都系快啲去搵返你嘅亲生父母啦!


汤渣究竟可以点食?

好多人都觉得汤渣食之无味,但就咁弃之又觉得好可惜,所以不如学下“翻新”汤渣。下边就总结下汤渣嘅食法,令你嘅汤渣即可成为汤渣界嘅劳斯莱斯。

(以下综合自个人经历及网上资料)

汤渣+豉油

image008.jpg


适用于:煲咗之后肉质与原来分别不大嘅汤渣,如猪脷、牛辗等。

各大酒楼汤渣最常见嘅食法,食材经过高温变化不大,直接加豉油送饭就已经够好食。

爆炒汤渣

image009.jpg


适用于:还可以保持部分肉质嘅汤渣,如鸡肉类。

将汤渣沥干水,然后拆散啲肉,落镬爆炒,期间可以加入姜葱蒜、蚝油或老干妈等配料(根据个人爱好),炒到香而入味即可,令淡茂茂嘅汤渣焕然一新。

汤渣肉松

image010.jpg


适用于:长时间熬制,肉质干柴松散嘅汤渣

将汤渣压成肉碎,放入油镬炒至干身,期间加入适量嘅豉油或盐,炒到变成肉松状即可。

汤渣炒饭

image011.jpg


适用于:配料较多(有粟米、冬菇等)嘅汤渣

将汤渣中嘅肉类及配料切粒,加饭加盐炒热,如果你中意,中意加只蛋,炒饭口感就更丰富。

汤渣凉拌菜

image012.jpg


适用于:仍保留原有肉质嘅汤渣

将汤渣嘅肉类切片,加上蔬菜、调味料,做成凉拌菜,非常爽口开胃。

作为一个广东人,就算系食汤渣,都要食得有要求,有格调,如果唔系,做人又同做条咸鱼有咩区别啊!

image013.jpg


各位自己友,
你哋又中唔中意食汤渣?
会唔会你阿妈逼你食汤渣?
有咩“翻新”汤渣嘅独门秘方?

图片素材来源于网络
本文由羊城网原创,未经授权禁止转载

更多
发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部