粤文化,阅观点,悦生活……
街巷探秘:讲古佬带你品味隐藏于羊城老街巷的传奇故事
发新帖
详细内容

广州话“咸丰年”与“浸死鸭乸个年”嘅来历

五岳倒为轻 发表于 2016-6-3 |3条回复 |1744次浏览

更多
daba38dbb6fd52667934db91ad18972bd507368d.jpg


现代人好钟意用“OUT”嚟形容同时代脱节嘅嘢,喺广州话当中有两句“咸丰年”同“浸死鸭乸个年”,清朝咁多皇帝,点解硬喺要盯住咸丰唔放呢?而“浸死鸭乸个年”又喺边一年呢?

“㜺鬼学堂 够㜺先讲”,嗱大家唔知道有冇发觉嗰啲退咗休嘅阿姨阿叔得闲无事好钟意搞同学聚会个喎,讲到同学聚会永远就离唔开讲旧时嘅主题。‘读书嗰阵吖你已经喺我哋班最出名咖啦,次次开校会校长都会请你上讲台个度批评嘅,起…!细细个阵你已经好孝顺咖啦,唔想阿妈出错次次都扮阿妈签名咖嘛,畀你踩到唔好意思个阵吖同学可能就会同你讲嘞,嘘“咸丰年咁耐嘅嘢,仲提嚟做乜吖”’!

呢个时候就轮到咸丰帝佢好郁闷咯喎,清朝十朝皇帝,我咸丰又排第七讲久又唔喺最耐,因乜解救百几年嚟啲广府人一路喺咁追住我嚟讲呢?我哋都唔想讲咖,鬼叫咸丰年间广东发生咁多事咩!

嗱喺咸丰登基嗰年啊,我哋广东花县人阿洪秀全呢喺广西桂平发起咗个太平天国起义,嗱嗱嗱…一波未平一波又起、到咗咸丰四年天地会嘅陈开喺佛山石湾大帽岗竖旗举义,喺上水面呢集中几千艘战船控制咗珠江河面。陆上就兵分三路将广州城包围咗半年咁耐,而两广总督叶名堔就借住平乱为名喎喺广州城内杀咗七万几人。

到咗咸丰六年广州呢又发生咗一件“亚罗号事件”、咸丰七年英法联军又攻陷广州,占领咗我哋广州三年咁耐。唉!事件未平息咖;咸丰十年英法联军攻陷咗北京添,逼使清朝政府签订咗《北京条约》,割让咗我哋广东嘅九龙半岛畀英国。经历咗咁多灾难吖想唔记得都真喺几难!

后来经历过呢啲事情嘅老人家就会经常提起“咸丰年嘅事嘞!”但喺冇有经历过嘅后生仔,对咸丰年间依啲咁嘅事边度仲有感觉先得咖。听到唔耐烦嘞就会话“咸丰年咁耐嘅嘢,仲提嚟做乜吖咁”。呢句话讲得多嘞,就一直被流传到宜家。形容好耐之前嘅事情广府人仲有另外一句,就係“浸死鸭乸个年”嘞。

可能就会有人话嘞你讲嘢太夸张啦呱,鸭乸识游水喎边浸得死呢,你铺话法就确喺要戒嘞。根据我哋《近代广州警察城市管理史话》嘅记载,1915年华南地区从6月下旬至到7月上旬连续出现咗大面积嘅暴雨,造成珠江三角洲呢几乎所有堤围都决堤,洪峰流量喺达到54500立方米每秒。

斋讲数字可能你会觉得冇乜好得人惊吖,呢个洪峰流量就相当于呢喺短短16秒之内呢填满一个海珠湖嘅容积,哇!咁犀利嘅水识游水都死啦,当时广州城吖被水浸咗七日七夜都唔退,而且呢水浸农田52万公顷!受灾人口呢382万、死伤都超过10万人吖,咁样嘅灾难你话深唔深刻吖。所以好多老人家呢对个啲唔想提起嘅旧事呢就会话“浸死鸭乸个年嘅嘢,唔好再提喇”!

搜集  撰著  瑤溪趙氏
無聲勝有聲VS的博客
更多
广州山大王 发表于 2016-6-3 12:21:22 ( 加好友 |打招呼 |发消息 )
本帖最后由 小编 于 2016-6-12 15:49 编辑

用纯粤语口语写作唔错,但呢个作者写嘢,点解要加咁多完全冇必要嘅语气助词,简直泛滥,令人睇得更辛苦。

原文:
嗱喺咸丰登基嗰年啊,我哋广东花县人阿洪秀全呢喺广西桂平发起咗个太平天国起义,嗱嗱嗱…一波未平一波又起、到咗咸丰四年天地会嘅陈开喺佛山石湾大帽岗竖旗举义,喺上水面呢集中几千艘战船控制咗珠江河面。陆上就兵分三路将广州城包围咗半年咁耐,而两广总督叶名堔就借住平乱为名喎喺广州城内杀咗七万几人。

本人试改:

喺咸丰登基嗰年,我哋广东花县人洪秀全,喺广西桂平发起咗太平天国起义。一波未平一波又起、到咗咸丰四年,天地会嘅陈开喺佛山石湾大帽岗竖旗举义,喺上水面集中几千艘战船,控制咗珠江河面。陆上就兵分三路,将广州城包围咗半年咁耐,而两广总督叶名堔就借平乱为名,喺广州城内杀咗七万几人。

咁样睇起身系咪舒服好多啊?
回复

使用道具 举报

英子01 发表于 2016-6-4 08:29:39 ( 加好友 |打招呼 |发消息 )
广州山大王 发表于 2016-6-3 12:21
用纯粤语口语写作唔错,但呢个作者写嘢,点解要加咁多完全冇必要嘅语气助词,简直泛滥,令人睇得更辛苦。{: ...

啱,系舒服好多!
回复

使用道具 举报

jason8888 发表于 2016-6-8 00:34:32 ( 加好友 |打招呼 |发消息 )
有意思,多谢晒
回复

使用道具 举报

发新帖
您需要登录后才可以回帖 登录 | 注册

Copyrigh 2016 羊城网 All Rights Reserved.   

回顶部