缺失普世价值观，何来国际接轨？

   自毒奶粉事件发生以嚟，问题不断扩散。由奶粉蔓延到其它奶制品，由国内蔓延到海外及国际。神舟7号载人航天火箭琴晚顺利升空喇，正係“神7升空，牛奶泻地”之际。令人联想一件事就係：中国点样至算係同国际接轨呢？

     刚刚举办完毕嘅北京奥运会，虽然期间略有暇痴，但亦都能显示我地中国同其他世界强国一样，可以成功办好奥运会，成为体育强国。而神舟5号、6号，甚至琴晚升空嘅神舟7号，都係中国挤身于科技强国嘅证明。但係成为体育强国、科技强国，唔一定代表中国已经成功同国际接轨。其实，同国际接轨嘅意思并唔係你奥运会囖51面金牌，并唔係你航天员成功升空嘅数目，亦绝唔係你加入咗WTO，又或者你有钱收购摩根士丹利。与国际接轨应该係：国人对生活态度，生命价值，与西方主流社会嘅睇法相近，例如文化交流同包容，而唔係在于响经济上同科技上永无休止嘅竞赛。

    从奶制品制造过程中，被加入“三聚氰胺”嘅问题里面，表面上係食品质监部门同管理上发生咗问题，但係归根到底係我地啲管理层对生命唔够尊重嘅问题。就拿呢次北京奥运会开幕式为例，有过万嘅表演者，每一个人响唔同嘅环节及位置，都有唔同嘅责任，触一发动全身，不能够稍有差池，至能够完成近乎完美嘅开幕式表演。从开幕式严谨嘅管理显示，我地中国人绝对有能力表现出高水平嘅管理能力。可以将复杂嘅程序管理到滴水不漏。假如有关管理部门可以将奥运会开幕式嘅严谨管理经验，用响管理奶粉度，今日嘅悲剧又点会发生呢？！

    除咗毒奶制品，中国其它基本食品例如：大米、食用油、鸡蛋等等，亦曾出现品质嘅问题。但另一方面，一啲人民基本嘅生存权利，例如：医疗、教育、住房等等，就出现失去保障嘅情况。冇钱，病人就会被医院赶出门外；冇钱，就冇书读；冇钱，就冇居所。而呢啲至正正係跟国际接轨嘅问题关键之处。

    西方自从18世纪启蒙运动以嚟，开启咗“以人为目的，以人为中心”嘅历史阶段。亦係人文主义嘅起源。虽然二十世纪，欧洲出现巨大嘅人道灭绝惨剧，但係时至今日，“以人为目的”嘅启蒙传统，仍然係西方社会嘅核心价值。

   所以，我地中国嘅领导层应该好好深刻反思，将未来施政重心放响人民群众基本生存权上。利用原先放响保护国家形象、科技竞赛、体育竞赛嘅严谨管理经验，用嚟保障人民群众嘅身心健康度。相信唯有咁样，中国至可以真真正正同国际接轨。