咸书都有得卖，感冒药却收埋

    奥运期间出台咗唔准感冒药销售嘅规定，原因系感冒药里面有麻黄碱乜乜兴奋剂成分。老实讲吖，佢唔讲我真系唔知道，原来我地合法销售嘅药品里面有呢家嘢嘅。但我捻，既然系合法销售嘅话，又有乜危害性呢？！只系原因却让人好鬼火滚！

    就小弟我肤浅嘅药理常识所知道嘅原因，系惊外国运动员误服用咗以后，兴奋剂检查出问题。咁就怪鸡咯，呢啲运动员如果有乜感冒发烧头晕身兴，照计应该有专门嘅医生去理卦？！，段估我唔相信班鬼佬运动员会去中国嘅大街入去药房买包感冒胶囊。更何况连国际咸书《Play boy》都可以比啲运动员准备到位，打死我唔信佢地冇准备几个医生。再讲，完全可以印发啲宣传单张，话比佢得知呢样野食咗会“乃嘢”嘅指引，系非常简单易做嘅事。况且佢地都系职业运动员，点可能连呢个咁基本嘅常识都唔知咩？！唔通同我地嘅国家足球队咁低能咩？

    我自问唔系一个民族主义者，但照咁睇落都快系咯。呢个并唔系洋鬼子嚟虾我地，而系我地自己嘅政府响人家仲未提出要求之前，就先将自己嘅膝头哥跪落地先。总系觉得咁做法同当年果块“华人与狗不得入内”嘅牌冇乜分别，只不过呢次唔系洋鬼子起个公园挂上去，而系我地既起公园兼且挂埋个牌。

    如此卑恭屈膝下贱嘅事，真系超乎国人百姓想象力之外。就好比如，我屋企嚟咗客人，平时我食开嘅药里面有佢过敏嘅成分，我只能话佢知叫佢唔好食，而唔系我要将啲药掟出街嘅系咪先？呢个绝对系一字咁浅嘅道理。

    所谓“大国崛起”嘅底气，响呢一粒粒嘅药片身上暴露无遗。原来把口话我地“大国崛起”咗，实际上仲系果种“宁给友邦色情书、不与家奴感冒药”嘅思维方式。自以为是呢几十年经济改革发展掂过碌蔗，OY圣火炬满世界一传，至发觉好多所谓“友邦”眼中根本当你冇到；自己平时大大声，话自己已经有独立嘅大国尊严，举办个运动会就要全国禁感冒药。原来呢个“崛起”都是对内而已嘅，对外呢，依然系———契弟一个。

     中国讲究“客随主便”、“入乡随俗”，其实外国都系咁讲究嘅。屋企有客人嚟油下灰水执执佢、加张床、摆束花我并唔反对，但我绝唔能忍受嚟嘅客人高人一等，更唔能忍受嘅系，本来客人都冇觉得自己高人一等、我地亦都冇觉得佢地高人一等，硬系有人想将客人搞到高人一等。你想做契弟你嘅事，唔好绑架所有老百姓跟住你都去膝盖犯软，犯软嘅同时，两个月之内“唔准感冒”————两个字：犯贱！