依家啲发型屋劲唔掂，大家平时去开边间多？

　　依家啲发型屋装修一间比一间靓，包装一间比一间标新立异，但服务水准就一间比一间差。

　　琴日中午食完饭，经过中山一路杨基马路面见到有间发型屋写住洗剪吹38，就惗住贪方便入去剪。入到去先被告知：38文係资深发型师帮你剪，如果搵发型总监剪就58文。无所谓啦，剪我个头都冇乜难度，就搵所谓资深发型师啦。

　　洗头嘅时候，洗头嘅所谓发型助理（其实就系洗头仔）就问我用边只洗头水，我话普通得嘞，佢又不断说我用佢哋啲所谓各种靓嘢嚟洗，我睬佢都傻，鬼唔知道又要加收咩。一计不成，又生一计，佢又开始说我开卡，话一次过俾三百几文开张卡可以黎十次等于打八折，我心惗点知道你喱喥剪得点噶，而且点知道你间嘢会唔会做得两嘢就执笠，咁钱都俾晒你嘞，我未扑街？

　　好唔容易洗完头，就搵咗条靓仔过嚟帮我剪，条靓仔睇起上来仲俾我细得多，出嚟做嘢都唔知道够一两年未，咁就叫资深发型师？唔同啱啱係洗头转到飞发就叫做资深噶啦？条靓仔问咗我想点剪，之后又开始弹我发质唔好，然后又不断sell我染发，话染黄色、蓝色……顶！你都睇人啦，坐办公室嘅，如果染成咁，分分钟工都唔使返。

　　剪下剪下先知道，喱条友剪发嘅本事同佢嘅销售技巧一样咁差。明明一早叫咗佢唔好剪咁短，佢就偏偏要同我剪咁短，叫咗佢唔好落推剪，头发要剪得碎啲，佢就偏要落推剪，剪到齐辑辑……佢见我越剪，面色越难睇，唔出声，又故意帮我戴下高帽，又话我生得靓仔，似古天乐……顶佢个肺，见到镜里面果个我，简直就成个阿甘咁，剪成咁嘅狗样，就算你赞到我晓飞、摞埋世界先生冠军无鬼用啦……

　　剪完，我放低38文，佢仲叫我以后多啲嚟——多啲嚟？除非我有自虐倾向啦，我喱两个星期都唔知道点见人啊！见到靓女都冇晒自信去搭讪。

　　唉，依家啲发型屋，越开越多，一日就係惗埋晒啲邪门歪倒去斩客搵钱，但连最基本的服务都做得肉肉酸酸咁，注定开一间执一间。

　　係啦，大家平时去开边间飞发多？边间比较好？