黑·白世界（二）

饮茶：

记得细个果时，一听倒有得去饮早茶就不知几兴奋（其实细个只要有得sao街都会好兴奋）。唔系好记得果时边个带我去得最多，只记得由细到大我都系最中意食牛肉丸，大大个（注意，唔系大大粒），够味道，又弹牙，而且中意净牛肉既，唔中意沟马蹄果D，搞到成口索索声。

宜家想我饮早茶就难咯。除非系父亲节、母亲节之类要做乖仔既节日自动请缨，其余时间无论边个叫都唔会就范。朝头早梗系训觉舒服啦！夏天又热，冬天又冻，外面点及间房舒服。饮茶都有既，夜茶咯，几个玩开既同事之间三两下手势就约齐出来饮夜茶食夜粥。试过十点半先出门口，屋企仲以为我受咩刺激。无他既，吹水为主，饮茶为副。无咩非饮不可既茶，无咩非讲不可既话，无非系大家岩玩岩倾，兴致到咪出来咯，一倾就倾到点零两点。饮茶既重点只在心情，好明显系醉翁之意不在酒。你估真系贪拒D牛河够多油咩。

游水：

读书果阵中意同埋同学仔去游水。又健康，又舒服，又开心。试过大一放暑假枕住有一轮朝早5:50起身，同同学游6点半果场，游完翻来仲要顾9点钟起屋企做家教，一路上课一路偷偷打喊路。

家下游水宜不得一个人去。游完一转企一企，浮下冬瓜又得，潜下水又得，乜都唔做、摊直训，都得，边样舒服就边样。觉得烦就企起池边吸啖气mei落水，耳边静晒，一眼望晒，脑袋空晒，果日发生过咩事都放低晒。游到成个人都有如获新生既感觉，先披星戴月翻屋企。果一晚，特别好训。第二朝，零舍舒服。

一个人：

细个好怕自己一个人，去到边都要同屋企人痴到实。训醒一见唔倒大人就呱呱声，礼拜一朝早一上校车去幼儿园就喊到收唔倒声，以致于阿嫲好几次都屈服于我既“淫威”，自己都唔忍心送我上车又带翻我翻屋企。记得细个自己开始一个人训一间房，我成晚仍住屋企人唔要我，自己喊湿左一边枕巾，又唔敢起身去同翻阿妈训。最尾卒之都系喊下喊下训着左……

宜家巴不得屋企无人。睇就睇，训就训，唱就唱，边样舒服就边样。唔使惊嘈倒人，亦唔怕屋企以为我精神分裂。有压力，要解决。镜住镜住，点解决？一阵入来问跟唔跟拒去百佳，一阵又话饮唔饮牛奶，人地减紧压噶嘛，咩mood都无晒啦……